Read Tobelo O YEREMIA 26 Bible Online

O YEREMIA 26 - Tobelo bible

O YEREMIA 26

¹ De majapati ipahaika o Yoyakim aingohaka o nauru wodadi o Yehuda manga koano,

²ma Jou wohitemo ngohino, ”Noiki nomaokoino Ani Tau malooaka deʼ nätemo-temo o Yehuda ma nyawaika yaino-ino yopuji genangokadau. Nohiadono onangika mata-mata Tohipopareta ngonaika lanohingahu onangika. Kama huhutulö mauha nakuranga.

³Mudukua o hoana deo berera gënanga yomau ihigihene, daha imatogumu yodiai o dorou, hiädono Ngohi tadohuku Ahi dungutu mangale Taboditoönanga imamoteke de toönanga manga manarama itotorou.”

⁴Ma Jou wohihuloko ngohi tahetongo hoko nënanga onangika, ”Ngohi, ma Jou, Tohiparetaka hupaya ngini nihihingounu Ngohino deʼ nihidagi hagala Ahi tita Tohidoa-doakoka nginika.

⁵Ngini kokianioli nihigihene okianaga yahö heto-hetongo Ahi gogilaongo, o nabi-nabi ihoa-hoanua Tähuloko nginika. Mä ngini nioluku nia higihene önanga.

⁶ Nako ngini kahirahi niahimotekua, o pupuji matau nënanga aha Tadiai hokä o Silo, hiädono hagala o hoana deo berera o duniaka yapake o Yerusalem makota maromanga nënanga hokä o lolai.”

⁷Mata-mata taheto-hetongo ma Jou Ai Tauoka gënanga yoihene o imam-imam, o nabi-nabi deʼ o kawaha.

⁸Dema japati ipahaika ngohi tohingahu ma Jou Ai behehongo mata-mata hokä Wohipoparetaka dei bötoönanga ihi tagoko ngohinoli yopoaka, ”Ngona kokiani nohonenge!

⁹Duru nobarani ngona nahetongo de ma Jou Ai romanga Ai Tau nënanga aha idadi hokä o Silo, deo kota nënanga aha yakilianga deʼ idadi o ngï yogö gogerokaua.” De ngohi ihi hidoomuino o nyawa manga ngöe.

¹⁰Maöraha o Yehuda mapareta mapopegawe yoihene okia idädadioka, önanga imatai-taiti yohupu ma koano ai kadatoino de yoiki ma Jou Ai Tauika, deʼ yogogeruku o Ngorana ma Amo-amoko ma Hungioka.

¹¹O imam-imam deʼ o nabi-nabi yatemo o popareta mapegaweika gënanga deʼ o kawahaika, ”O nyawa nënanga ipatutu iwihukumu iwihohonenge karana ünanga wohihupuoka o demo-demo walawani nanga kota nënanga. Ngini mahirete niihenoka.”

¹²Daha ngohi tätemo, ”Ma Jou Wohihö hulo-huloko ngohi tohiadono o behehongo yalawa-lawani ma Jou Ai Tau deʼ o kota nënanga hokä ngini ni ihene.

¹³Hababu gënanga nia wowango madodagi de hagala niamanarama niangali; niwihingounu ma Jou nia Jou Madutu, hupaya Unanga Wadohuku Ai dungutu mangale Winibodito ngini.

¹⁴Yakorona ahi diri, maraioka naga niakuaha magoronaka la nidiai okia dika imoteke niamau.

¹⁵Mä nimähohininga, nako ngini nihitoma ngohi, ngini de yogögogere o kota nënanga aha niatagongo mahowono o nyawa yahowo-howonua niatoma. Hababu, ma Jou Wohihuloko ngohila tohingahu o hohininga gënanga nginika.”

¹⁶De o popareta mapopegawe deʼ o kawaha yätemo o imam-imam deʼ o nabi-nabi ika gënanga, ”O nyawa nënanga wotemo-temo dema Jou tongone nanga Jou Madutu Ai romanga; ipatutua ünanga iwihukumu iwihohonenge.”

¹⁷Ipahaika de gënanga yamuruono naga o hoana deo berera manga tutuda manga hidogoronaka yoiki mahimangika deʼ yätemo hagala o nyawaika imatotoomuino genangokadau.

¹⁸ ”Maöraha o Hizkia wodadi o Yehuda manga koano, ma Nabi Mikha o Moresyet mabereraino wahiadono o kawahaika o demo nënanga ma Jou Duru Wokokuahaino, ’O Sion aha yapajeko hokä o dumule, o Yerusalem aha idadi o rutuku itotoporonil̄e, deʼ o Doporono ma Jou Ai Tau aha idadi o hongana.’

¹⁹Mä ma Koano Hizkia deʼ o Yehuda manyawa iwitomaua o Mikha. O Hizkia idulu yaino wïmodongo ma Jouika deʼ wogahoko iwïdora. De ma Jou Wadohukoli wohi dodemoka mangale Wäbodito önanga. Deʼ öraha nënanga, ngadekohi ngone nënanga homa dotagao o bodito ma ago-agomo tongone nanga diriuku.”

²⁰Mamoi iböto o nyawa mahomoa womatengo wotemo-temo walawani o kota deʼ o hoana deo berera nënanga dema Jou Ai romanga, hokä tadodiai. O nyawa gënanga ai romanga o Uria o Semaya aingohaka o Kiryat-Yearimino.

²¹Maoraha ma Koano Yoyakim kamamoi de aitentara mabalu-baluhu deʼ o popareta mapopegawe yoihene o Uria ai demo-demo, ma koano wohidailako wïtoma ünanga. Mä o Uria woihene o hali gënanga dewohawana deʼ wopiringana o Mesirika.

²²Mä ma koano Yoyakim wïhuloko o Elnatan o Akhbor aingohaka kamamoi de o nyawa mahomoa yamuruono naga yoiki o Mesirika deʼ iwil̄ë o Uria.

²³De önanga iwi ao ünanga ma Koano Yoyakimika. Deipaha ma koano wähuloko iwi toma ünanga, deʼ ai maiyeti yaumo o kawaha manga jereika.

²⁴Mä öraha nënanga o Ahikam o Safan aingohaka ai roriwo mabarakati, ngohi o Yeremia ihi hilapahiua o kawahaika la ihitoma.