Read Tobelo O YEREMIA 27 Bible Online

O YEREMIA 27 - Tobelo bible

O YEREMIA 27

¹ Itedekanua ipahaika o Zedekia o Yosia aingohaka o nauru wodadi o Yehuda manga koano, ma Jou wohihuloko ngohi

²o aiwani makai tadiai o liliko de ikali o momoku o gota, deʼ tohihagouku ahi totöuku.

³Unango wohihuloko tohiadono Ai behehongo o kokoanoika o Edom, o Moab, o Amon, o Tirus deʼ o Sidon ma kokoano, tapake toönanga manga huhuloko yoboa-boaka o Yerusalemino mangale iwihiadono ma Koano Zedekia.

⁴Ngohi kokiani tohingahu onangika ma Jou Duru Wokokuaha, o Israeloka manga Jou Madutu, wotemo,

⁵”De Ahi kuaha ilamo-amoko deʼ Ahi kuata Ngohi tohidadioka o dunia deʼ o nyawa de ikali hagala o aiwani, deʼ Ngohi yakunu Tohidöaka o nagonaika dika Ngohi Tomau.

⁶Ngohi tohilapahioka hagala o hoana deo berera nënanga Ahi gilaongo ai kuaha magoronaika, o Nebukadnezar o Babel manga koano. Maboboloioli o aiwani matohilapahioka unangika ma wakuaha.

⁷Hagala o hoana deo berera aha imagilaongo unangika, ai ngohaka o naurika, deʼ ai danongika hiädono maoraha imahiadono ai negara mahirete itifa. O öraha gënanga o Babel manyawa aha imagilaongo hagala o hoana deo berera yokua-kuatika deʼ hagala o kokoano yolago-agomo.

⁸O hoana deo berera ekola o popareta yolu-oluku imahidöaka o Nebukadnezarika aha Tähukumu deo parangi, o habirokata, deʼ o bobaku o panyake, hiädono mabaha o hoana deo berera gënanga imahidöaka unangika.

⁹Uha nia higihene o nabi-nabi ekola o nagona dika ihiduhu-duhunu nimahidöaka o Babek manga koanoika, ngaroko önanga yomangaku yatarimaka o hidumutu o nanerino yogogumaterino ekola yapake yomai-maihi.

¹⁰Onanga inïtipu ngini hiädono önanga inïao magurutika de niaberera. Ngohi aha niabereraka de tinïduhu ngini deʼ ngini aha nibinaha.

¹¹Mä o hoana deo berera yomau imahidöaka deʼ yomau imagilaongo o Babel manga koanoika aha Tähigumal̄a yogogere toönanga manga tonaka mahireteoka, deʼ imadumule de imadatomo genangokadau. Ngohi ma Jou, totemoka.”

¹²O Zedekiaika o Yehuda makoano, ngohi o Yeremia, tohiadono ohali kaima tero. Ngohi totemo, ”Nomaike makoano Babelika. Nihingounu unangika de aihöana de ai bereraika, hupaya Jou Koano nohalamati.

¹³Ma Jou wotemoka o hoana deo berera imahidoa-doakua o Babel manga koanoika aha ihihonenge o parangi, o habirokata, ekola o bobaku o panyake. Yadodoaho Jou Koano deʼ o kawaha nimau nihonenge madodagi hoko gënanga?

¹⁴Uha nahigihene o nabi-nabi inï duhu-duhunu nomahidöaka o Babel manga koanoika, hababu önanga inïtipu Jou Koano.

¹⁵Onanga yatoönanga yotemo de nia Jou Ai romanga, mä önanga yoeluku. Ma Jou mahirete wotemo Unanga Wahulokua önanga. Hababu gënanga Unanga aha Winihi kokitingakika deʼ Winïbinaha Jou Koano kamamoi deo nabi-nabi ini elu-elukoka Jou Koano.”

¹⁶De ipaha ngohi tohingahu o imam-imamika deʼ o kawahaika yongodumu ma Jou wotemo hoko nënanga, ”Uha niahigihene o nabi-nabi yotötemo-temo itedekanokaua o bara-baranga Ani Tauoka aha yaooli o Babel de yaino. Onanga yoeluku.

¹⁷Uha niahigihene önanga! Nima hidöaka o Babel manga Koanoika, hupaya ngini nihalamati. Mangale okia o kota nënanga kokiani ikilianga?

¹⁸Nako önanga igoungu itiai o nabi, deʼ yatarimaka o behehongo Ngohino, maraioka öraha nënanga önanga yogahoko Ngohino, ma Jou Duru Tokokuaha, hupaya o bara-baranga kanagahi Ahi Tauoka deʼ ma koano ai kadatoka o Yerusalemoka yatorakua o Babelika.

¹⁹Hababu Ngohi, ma Jou Duru Tokokuaha, o Israeloka manga Jou Madutu, taputuhoka mata-mata o baranga gënanga aha yatoraka o Babelika deʼ aha kahirahi dokengoka hiädono Ngohi tohohiningaoli. Maorahoka gënanga dahao Ngohi tao oli o ngï ino nënanga. Ngohi, ma Jou, totemoka.” O bara-baranga kanagahi ma Jou Ai Tauoka gënanga enagenangala: o liate-liate, o bohoko tabaga, o kereta, deʼ o baranga mahomoa muruono naga toma Jou Ai Tauoka. O bara-baranga gënanga ihi dotaoua o Babelika, maoraha o Yoyakhin o Yoyakim aingohaka o nauru o Yehuda manga koano de ikali o Yehuda deʼ o Yerusalem makawaha manga balu-baluhu ma koano Nebukadnezar wätoraka o Babelika.