Read Tobelo O YEREMIA 28 Bible Online

O YEREMIA 28 - Tobelo bible

O YEREMIA 28

¹ O taongo genangö o mede mamotoaka mataongo ngimoi de iata ma koano Zedekia ai popareta, o Hananya o Azur aingohaka, womatengo ma nabi o Gibeon makotaino, wohi temo-temo ngohino ma Jou Ai Tauoka. O imam-imam deʼ o kawaha manga himangoka ünanga wahetongo ngohino

²ma Jou Duru Wokokuaha, o Israeloka manga Jou Madutu, wotemo hoko nënanga, ”Ma koano Babel ai kuata Tahohihangoka.

³Maoraha o taongo hinoto nënanga magoronaka Ngohi aha Tohigilio o bara-baranga to Ngohi Ahi Tauino watora-torakoka o Babelika ma Koano Nebukadnezar.

⁴Ngohiö aha tä ao tähigilio o Yoyakhin o Yoyakim ai ngohaka o nauru o Yehuda manga koano, kamamoi yongodumu o Yehuda ma kawaha yätora-torakoka o Babelika. Igoungu, Ngohi aha ta hohihanga o Babel manga kuata. Ngohi, ma Jou, totemoka.”

⁵O imam-imam manga himangoka deʼ mata-mata o kawaha imaoko-okoino ma Jou Ai Tauoka gënanga, ngohi tïtemo o Hananyaika,

⁶”Irahai! Nohi ngö ngahu-ngahu okianaga idädadiuahi tanu imahi nyata, deʼ ma Jou igou-goungu o Babel de yaino wao wogigilio ma Jou Ai Tau mabara-baranga kamamoi de mata-mata o nyawa yätotabuangoka dokengika.

⁷Mä ngona, Hananya, deʼ ngini mata-mata, hei o kawaha, ni ihene nënanga:

⁸O nabi-nabi tongone nanga orahowahi ihingahuoka okianaga idädadiowahi o parangi, o bodito inoli o bobaku o panyake aha yätapal̄u o hoana deo berera mangöe deʼ o popareta ikökua-kuata.

⁹Mä o nabi wohingö ngahu-ngahu okianaga idädadiowahi o dame, duga-duga yakunu ihigoungu hokä igou-goungu ma Jou wïhuloko, nako wohingö ngahu-ngahu okianaga idädadiowahi imahi nyata idadi.”

¹⁰Daha o Hananya waora wa l̄ë o momoku o gota ahi totö oka deʼ watobiki.

¹¹Yongodumu o kawaha manga himangoka yoboa-boaino genangokadau, ünanga wätemo, ”Ma Jou wotemo hoko nënanga madodagi Unanga aha Watobiki o momoku o gota wohihago-hago ma Koano Nebukadnezar hagala o hoana deo berera manga totöuku; Ma Jou aha Wadiai gënanga o taongo hinoto nënanga magoronaka.” Iböto gënanga ngohi matoiki.

¹²Hokokiaua madekana idödadi gënanga ipahaika, ma Jou Wohihuloko ngohi

¹³noiki o Hananyaika la nahetongo hoko nënanga, ”ma Jou wato ngona kanakunu natobiki o momoku o gota, ma Unanga aha Watagali deo momoku o behi.

¹⁴Ma Jou Duru Wokokuaha, o Israeloka manga Jou Madutu, wotemo Unanga aha Wohihago o momoku o Behi hagala o hoana deo berera nënanga manga totöuku, deʼ önanga aha imagilaongo o Nebukadnezarika, o Babel manga koano. Ma Jouö Wotemo o aiwani madorou ma aha Wohilapahi o Nebukadnezar ai kuahaika.”

¹⁵Mata-mata gënanga tohiadono o Hananyaika, de ngohi totemoli, ”Noihene hei Hananya! Ma Jou Wonihulokua ngona; ngona nadiaioka o hoana deo berera nënanga yongaku o tengeluku mademoika.

¹⁶Karana gënanga ma Jou mahirete wotemo ngona aha ini hohihanga o dunia mal̄okuoka. O taongo nënanga dika ngona aha nohonenge, hababu ngona nähulokoka o hoana deo berera nënanga iwilawani ma Jou.”

¹⁷De o taongo gënanga dika o mede tumidoka o Hananya wohonenge.