Read Tobelo O YEREMIA 29 Bible Online

O YEREMIA 29 - Tobelo bible

O YEREMIA 29

¹ Ngohi totulihi o hurata o imam-imamika, o nabi-nabi, o hoana deo berera manga tutudaika kayo wango-wangohi, deʼ mata-mata o nyawa mahomoaika wätora-torakoka o Nebukadnezar o Yerusalemoka deo Babelika.

²O hurata gënanga totulihi ipahaika ma koano Yoyakhin, ngoi ayo, o kadato mapopegawe, o Yehuda deʼ o Yerusalem mapopareta, yogögao-gao, deʼ yososawaro yokarajanga yätoraka o tabuangika.

³Ngohi tohidoakika o hurata gënanga o Elasa o Safan aingohakika, deʼ o Gemarya o Hilkia aingohaka wähulo-huloko o Zedekia o Yehuda manga koano. O Nebukadnezar o Babel manga koanoika. O hurata gënanga mabetongo,

⁴”Hoko nënanga ma Jou Duru Wokokuaha o Israeloka manga Jou Madutu watemo o nyawa mata-mataika yatotabuangoka o Yerusalemoka de o Babelika:

⁵’Nigogere genangokadau. Nihigoko hagala niatau. Nimädumule deʼ mahasili nia ol̄omo.

⁶Nikawingi hupaya ngini niamake o ngohaka, deʼ nihigumal̄a nia ngoha-ngohaka yokawingi hupaya onangö mayamake de manga ngohaka. Niagegetongo kokiani idogo de yakunua ikuranga.

⁷Nikarajanga la hagala o kota mangï Tini umo isanangi. Nimä niata Ngohino mangale hagala nia kota gënanga maparalu, hababu nako hagala o kota gënanga mahasili iwöe, ngini ma aha nia hasili iwöe.

⁸Ngohi ma Jou, Duru Tokokuaha, o Israeloka manga Jou Madutu, Tinihidöaka o hohininga hupaya uha ngini nihigumal̄a nia diri o nabi-nabi yogögogere nia hidogoronaka inï tipu ekola o nagona dika yotö temo-temo önanga yakunu ihingahu okianaga aha idädadi niahimangika. Uha niolegaika hagala toönanga manga nanere.

⁹Onanga yapake Ahi romanga la ihijarita nginika hagala itotiaiua. Ngohi tahulokua önanga. Ngohi, ma Jou, totemoka.’

¹⁰ Ma Jou watemo, ’Nako yadonoka maoraha o taongo moritumidi mangale o Babel, Ngohi aha tinitailakoli ngini, deʼ tatotomo Ahi jaji la tinïao ngini nilio o ngï ino nënanga.

¹¹Koigoungua Ngohi mahirete tohioriki hagala Ahi datoro mangale ngini? Hagala Ahi datoro gënanga tinihiboditoua ngini, mä mangale niasanangi deʼ mangale tinihidöaka nginika o ngonganono ioma-omanga niahimangika.

¹²Done ngini aha nigahoko o roriwo Ngohino. Ngini aha niboa la nimä niata Ngohino, deʼ Ngohi aha töbaluhu nia niniata.

¹³ Ngini aha nihilingiri deʼ nihimake ngohi, hababu ngini nihilingiri de niahininga magahumu.

¹⁴Igoungu ngini aha nihimake Ngohi. Ngini aha Tinï toomu o hoana deo berera yögetongo manga hidogoronaino deʼ o berera yögetongo o ngï inihi kokitingakika deʼ initabuanga. Ngini aha Tinïao nilio niaberera madutuino nënanga hoi hira-hirali niamö make-make. Ngohi, ma Jou, totemoka.’

¹⁵Imoteke ngini, ma Jou winihidoakoka nginika o nabi-nabi o Babel matonakoka.

¹⁶Ni ihene okianaga waheto-hetongo ma Jou mangale ma koano wopopareta o öraha nënanga, enagënanga ma koano o Daud aidifauku, deʼ mangale yogögogere o kota nënanga, enagënanga nia roriadodoto yatora-torakua o tabuangika kamamoi dede ngini.

¹⁷Ma Jou Duru Wo kokuaha wotemo, ’Ngohi aha tadotagao o parangi, o habirokata, deʼ o panyake o bobaku onanguku. Onanga aha Tahidiai hokä o ara mahohoko duru imela-mela hiädono yakunua yaol̄omo.

¹⁸Ngohi aha Taginïki deo parangi, o habirokata, deʼ o panyake o bobaku hiädono hagala o hoana deo berera o dunia yamode-modekika aha yamao yäporohono yamake okianaga idädadi onangoka. O kiaka dika Ngohi Tahi kokitingakika önanga, o nyawa aha yamao yäporohono deʼ yohawana yamake okianaga idädadioka dede önanga. Onanga aha yähohedu, deʼ toönanga manga romanga yapake hokä o lolai.

¹⁹Mata-mata gënanga idadi onanguku, karana önanga yamotekua Ahi behehongo koi toa-toakua Tohiadono onangika itilakuru o nabi-nabi Ahi gogilaongo. Onanga yolegaikaua Ahi behehongo gënanga.

²⁰Deʼ ngini mata-mata nitotabuangoka o Babelika, ni ihene okianaga Ngohi, ma Jou, tahetongo.’

²¹Ma Jou Duru Wokokuaha, o Israeloka manga Jou Madutu, wotemoka iwikorona o Ahab o Kolaya aingohaka o nauru, deʼ iwikorona o Zedekia o Maaseya aingohaka o nauru yapö pake-pake ma Jou Ai romanga la ihiadono nginika hagala o hali itotiaiua. Ma Jou wotemo Unanga aha wahilapahi önanga o Nebukadnezar o Babel manga koano ai kuahaika, aha wätoma önanga nialako ma himangoka.

²²Ho nako hagala o nyawa yätora-toraka o Yerusalem deo Babelika yomau yälolai imatengoani, önanga aha yotemo, ’Tanu ma Jou wonidiai ngona hokä o Zedekia deʼ o Ahab, o Babel manga koano wätuhukoka kamanga ngango.’

²³Hoko gënanga toönanga manga nasib hababu gënanga yodiaioka hagala o baradoha ma ago-agomo o Israel mabereraka: önanga yo howono, deʼ yapake ma Jou Ai romanga la ihijarita hagala o hali itotiaiua. Genanga imalawani de ma Jou Ai mau. Unanga wohioriki okianaga önanga yodiai deʼ ünanga mahirete wodadi o hakihi wälawani önanga. Ma Jou wotemoka.”

²⁴Ma Jou Duru Wokokuaha, o Israeloka manga Jou Madutu wohidöaka o behehongo ngohino mangale o Semaya, o Nehelam manyawa, hababu o Semaya wohidingotoka o hurata de ai romanga mahirete o Yerusalem manyawaika yongodumu, ma Imam Zefanyaika o Maaseya aingohaka, deʼ mata-mata o imam mahomoaika. O hurata magoronaka gënanga o Semaya wotulihi hoko nënanga o Zefanyaika:

²⁶”Ma Jou wonigorakoka ngona nodadi o imam nïtagali o Yoyada, deʼ öraha nënanga ngona o pegawe nokökurutil̄e ma Jou Ai Tauoka. Ani manarama ena genangala napareta hupaya moi-moi o nyawa yatotogohanga, yomangaku manga diri o nabi, yaliko deo rante o behi manga tomarino.

²⁷Mä yadodoaho ngona nadiaiua o Yeremiaika o Anatot ma nyawa gënanga womadadioka hokä o nabi tongone nanga hoana de nanga berera manga hidogoronaka?

²⁸O nyawa gënanga kokiani ai uru natamunu, hababu ünanga wahetongo tongone nanga nyawaika o Babel matonakoka önanga kahä dekanohi yogogere dokengoka. Deʼ karana gënanga, wato, önanga kokiani imahigoko o tau inoli imadumule deʼ yapake mahasili.”

²⁹O hurata gënanga ma Imam Zefanya wohidabaca.

³⁰Hababu gënanga ma Jou wohihuloko ngohi

³¹tohidingoto o abari mangale o Semaya o Israel manyawaika yototabuangoka o Babelika. Nenanga doka o abari gënanga, ”O Semaya wotemo-temoka nginika hokä ünanga o nabi; enahioko Ngohi, ma Jou, tihulokua ünanga. Karana gënanga ünanga wodiaioka ngini niangaku o ade-ade tengelukika,

³²deʼ karana ünanga winihulokoka ngini nihilawani Ngohi, done Ngohi aha tïhukumu ünanga deʼ aidifauku. Komoiua toönanga manga hidogoronaka aha yogogere tongomi mia hidogoronaka la yamake hagala o hali ma oa-oa aha Tadodiai mangale Ahi umati yongodumu. Ngohi, ma Jou, totemoka.”