Read Tobelo O YEREMIA 3 Bible Online

O YEREMIA 3 - Tobelo bible

O YEREMIA 3

¹Ma Jou wato, ”Nako momatengo o hekata ami rokata womioluku, daha o ngoheka gënanga modadi o nyawa mahomoa manga hekata, done amirokata mahira yakunokaua womil̄eoli hokä ngoihekata, hababu o hali gënanga aha yakilianga o berera nënanga. Ngona Israel, duru manga ngöeoka nähowo-howono, okiaka yakunu öraha nanga ngona nomau nolioli Ngohino!

²Abeika nomälega dakengil̄e, o doporono-doporono matubuil̄e! O ngï okia komaiwahi ngona naika la nimakihidu? Hokä o Arab manyawa o tonaka ikokakahaka, hoko genangoli ngona nogogeruku o ngekomo madatekoka nadamä o nyawa yomau nimäkamane. Ngona napeseke o berera nënanga deo hudali deʼ anidorou.

³Mahababu gënanga o akere o dihanguku imatumungu, deʼ o awana o bunga-bunga maorahoka koiboaua. Ngona imatero de o ngoheka yohowo-howono, deʼ ani mal̄eke koiwa.

⁴Ani huha maorahoka gënanga ngona nohitemo Ngohino Ngohi ani ama, Ngohi tonï dora ngona mulaenge ngona ani alu-aluhohi.

⁵Ngona notemoli Ngohi aha tohigila-gilaua tonitemo ngonaika. Genangadoka ngona naheto-hetongo, hei Israel, mä itai-taitino gënanga ngona nodiaioli hagala o dorou yakunu ngona nadodiai.”

⁶ Ma koano Yosia ai popareta maorahoka, ma Jou wohitemo ngohino hoko nënanga, ”Ngona namakeoka okianaga o Israeloka yadodiai, o ngoheka mososatiaua gënanga? Munanga moni dogumal̄aika Ngona deʼ mohowo-howono o doporono magögurutil̄eoka yogetongo deʼ o gota mautu mahoka irörubu-rubu matimiuku yögetongo.

⁷Ahi hiningaka münanga madiaioka mata-mata gënanga de iböto, münanga aha momaiduloli Ngohino. Mä münanga momaidulua, duga-duga moiki amiröehe mahukunu. Mahababu gënanga Ngohi tomioluku deʼ tomiduhu münanga. O Yehuda, o Israel ai dodoto, wososatiaua gënanga wamake mata-mata gënanga, mä ünanga kowohawanua. Unanga iholoioli womahimoteke wodadi wohowo-howono,

⁹deʼ duru kowamaoua iwimal̄eke. Unanga wohowono karana wahuba o helewo deʼ o gota mautu hiädono o berera gënanga idadi ipeseke.

¹⁰Mata-mata gënanga wadiai deiböto, o Yehuda wososatiaua gënanga womaidulu Ngohino mä kawoelu-eluku, karana ai hininga itebinua. Ngohi, ma Jou, totemoka.”

¹¹De ipaha ma Jou wohihingahu ngohino ngaroko o Israel iwiporetoka Unanga mainyata o Israel iholoi yaoa ngaro deo Yehuda wososatiaua genanga.

¹²Ma Jou wohihuloko ngohi toiki la tahetongo o hali nënanga o Israelika: ”Hei Israel nososatiaua, nomaidulu Ngohino! Ngohi ihiomanga o hayangi deo dora deʼ aha kahiado-adonikaua toningamo ngonaika.

¹³Nomangaku dika ngona nahowono deʼ nomalawanoka ma Jouika, ani Jou Madutu. Nomangaku o gota mautu mahoka irörubu-rubu matimiuku yögetongo ngona nogopoaka ahi hayangi o hoana deo berera mahomoa manga gikirika, deʼ nohingounua hagala Ahi pareta. Ngohi, ma Jou totemoka.”

¹⁴Ma Jou wato, ”Hei o umati nisosatiaua, nimakilioro Ngohiino! Ngini ganga Tongohi. Ngohi aha tinï l̄ë ngini, o kota yögetongo womatengo, nia ahaluku yögetongo yahinoto, deʼ tiniao ngini nimakilioro o Sion ma Doporonika.

¹⁵Ngohi aha tinihidöaka nginika o tutuda-tutuda ihihingou-ngounu Ngohino. Onanga aha inïtuda ngini deobarija deʼ iomanga o mangarati.

¹⁶Daha nako ngini nidogo niwöeoka o bereraka nënanga o nyawa aha yotemo-temokaua mangale Ahi Jaji ma Peti. Onanga aha yapikirua ekola yohiningaokaua, önanga aha kaidogo yoparaluokaua ekola yodiai o Jaji ma Peti mahomoali.

¹⁷Maorahoka gënanga o Yerusalem makota aha yahetongo ’Ma Jou Ai pareta makuruhi’, deʼ hagala o hoana deo berera aha imatöomu o kotaka genangala ihihuba Ngohi. Onanga aha yamotekokaua toönanga manga hininga mamau ifuma-fuma deʼ itotorou gënanga.

¹⁸O Israel imahiganu deo Yehuda, deʼ kamamoi imakomoteke yoboa o tabuanga maberera o koremieuku idaduoka de yaino. Onanga aha imakilioro o bereraika Tahidoa-döaka hokä o tonaka o puhaka manga ete de manga tohoraika.”

¹⁹Ma Jou wato, ”Israel, Ngohi töigo tonitarima ngona hokä Ahi ngohaka, deʼ tonihidöaka ngonaika o berera i sosanangi, o berera duru irorahai yamode-modekika o dunia. Ngohi töigo ngona nohihetongo Ngohi ani ama, deʼ Ngohioka de nopiringanokaua.

²⁰Mä hokä o hekata mososatiaua, ngona manosatiaua Ngohino. Ngohi, ma Jou totemoka.”

²¹Ol̄oku matubu-tubuoka hoihene o gigoro mailingi; gënanga o Israel manyawa manga ilingi yoari deʼ imahi gaho-gahoko, karana önanga yobaradohaka, deʼ iwiwohanga ma Jou toönanga manga Jou Madutu.

²²Hei ngini mata-mata niwimal̄aikaka ma Jou, kokiani nimakilioro! Unanga aha winihitogumu ngini, deʼ winihidadi ngini nisatia. Ngini niato, ”Ya, öraha nënanga ngomi miboa ma Jouika, hababu Unanga tongomi mia Jou Madutu.

²³Parahaja dika ngomi mirame-rame miahuba o gomanga ol̄oku matubu-tubuoka! O roriwo mangale o Israel duga-duga iboa ma Jouino tongomi mia Jou Madutu.

²⁴Mihuba-huba o Baalika, o gomanga imihimal̄e-mal̄eke gënanga, yadiaioka tongomi mia ngoha-ngohaka ihihanga inoli mia hapi deʼ miaduba, enagënanga hagala mata-mata mia ete de mia tohora ihidailakoka mulaenge kahuruoninohi.

²⁵Ho, mal̄aikala ngomi miatagongo o mal̄eke, deʼ mal̄aikala ngomi mi dadi okia-kiaua imï daene. Hababu, ngomi deʼ tongomi mia ete de mia tohora mibaradohaka ma Jouika tongomi mia Jou Madutu, deʼ komaiwa mihingounu hagala Ai paretaika.”