Read Tobelo O YEREMIA 30 Bible Online

O YEREMIA 30 - Tobelo bible

O YEREMIA 30

¹Ma Jou, o Israeloka manga Jou Madutu,

²wohitemo ngohino, ”Natulihi o buku o gahumu moi magoronaka mata-mata taheto-hetongoka ngonaika.

³Hababu aha maoraha iboa Ngohi tohigilio hoihira-hirali yamomake-make Ahi umati o Israeloka deʼ o Yehuda. Ngohi aha tä ao önanga tahigilio manga bereraika Tahidoa-doakoka manga ete de manga tohoraika. O berera gënanga aha önanga yakilioli. Ngohi, ma Jou, totemoka.”

⁴Ma Jou wätemo o Israel deʼ o Yehuda manyawaika,

⁵”Ngohi toihenoka o nyawa kaima hidahaharuku manga böaka, o nyawa yohawa-hawana manga böaka koiwa-iwa manga dame.

⁶Abeika niapikiri deʼ niatailako! Kayakunu o nauru yongohaka o ngohaka magil̄au? Nako hoko gënanga, yadodoaho moi-moi o nau-nauru tämake manga biono kamamule-mule deʼ yatumungil̄e manga mamata de manga giama hokä o ngoheka yomau yongohaka?

⁷O wange niomodo-modongo iböaka, o wange koiwa naga hohitero. Mangale Ahi umati, gënanga o huha mawange; mä önanga aha Tahihalamati.”

⁸Ma Jou Duru Wokokuaha wotemoli Ai umatika, ”Nako gënanga mawange iboa, o momoku ihihago-hago niatotöuku aha Tatobiki, deʼ nialiliko aha Tahohe. Ngini aha nidadiokaua o nyawa maporetino manga gilaongo.

⁹Ngini aha nimahi gilaongo Ngohino, ma Jou nia Jou Madutu, deʼ womatengo o Daud aidifauku aha Tïgoraka hokä o koano unangika nima hi gilaongo.

¹⁰ Ahi umati o Israeloka uha niahawana! Ahi gilaongo o Yakub, uha nohahara! Ngini deʼ niadifauku Tinihihalamati o berera magögurutoka de niaino, o ngï ngini initabuanga. Ngini aha nilio deʼ nigogere niabereraka nimahi sosanangi. Ngini aha niwango niarirïdi; koiwa naga iparalu ngini niomodongo.

¹¹Ngohi aha toboa deʼ ngini aha Tinihihalamati. Hagala o hoana deo berera, o ngï ngini Tinihikokitingakoka mata-mata aha Tabinaha, mä ngini Tinihidiaiua hoko gënanga. Itiai ngini aha inïotanua o hukumanga mä Ahi hukumanga nginika ganga iadili imamoteke ihitö tantuoka. Ngohi, ma Jou, totemoka.”

¹²Ma Jou watemo Ai umatika: ”Nia panyake duru ikiria, mangale nianabo koiwa mahouru.

¹³Moiua o nyawa yömodeke inihidailako nitogumu, koiwa o houru mangale niaboroho, koiwa o ngonganono mangale ngini la nitogumu.

¹⁴Mata-mata inïdora-dora inï wohangoka; önanga yolukoka yapikiri niadiri. Hokä o haturu Ngohi tiniparangioka deʼ Ti nihukumoka ngini mahayangi koiwa karana ma ngoe nia baradoha deʼ ma amoko nia howono.

¹⁵Uhaoli nitaiana mangale nianabo-nabo, hababu mangale ngini koiwa naga o ngonganono nitogumu. Ngini Tinï hukumu hoko gënanga karana niabaradoha mangöe deʼ niahowono ma amoko.

¹⁶Maöraha nënanga mata-mata inilahi-lahiri aha yälahiri, deʼ mata-mata niahaturu aha yätoraka o tabuanga mangï ika. Ngohi aha Tätuku inïtuku-tuku, Ngohi aha Taora ini ora-ora.

¹⁷Ngaroko niahaturu yotemo, ’O Sion yaumoka, deʼ moiua yölegaika,’ mä Ngohi aha tadiai nitumuloali, deʼ nianabo-nabo aha Tahouru.”

¹⁸Ma Jou wotemoli: ”Ngini Ahi umati aha Tinïdora deʼ hoihira-hirali niamö make-make niaberera madutuoka mahirete. O Yerusalem aha ihi gokoli, deʼ makadato ihidiai.

¹⁹Yogögogere aha ihihigiriri Ngohi deʼ o nyanyi, deʼ youlili de yohagaga de manga morene. Ngohi tadiai önanga yähoromati deʼ yahikaukuokaua, deʼ toönanga manga gegetongo idogo-dogo.

²⁰Niahoana de niaberera aha Tadiai youtumu hokä kahuruonoli, deʼ nimaokoil̄eoli hokä Ahi umati. Mata-mata inïtuku-tuku aha Tahukumoli.

²¹O koano ini popareta ngini manga ahali niahoana de nia bereraino. Wobebasi ünanga aha womahitigi Ngohino nako ünanga Tiahoko Wohïhimanga. Hababu o naguna wobarani Wohihimanga Ngohi de toünanga ai mau mahirete? Ngini aha nidadi Ahi umati deʼ Ngohi todadi nia Jou Madutu. Ngohi, ma Jou tahö heto-hetongo gënanga.”

²³Ma Jou Ai dohata o taufani, hokä o rato ingamo-ngamo yätapal̄u hagala o nyawa madorou, de aha itourua kowahi de hagala Ai datoro idadi. O wange maduruino Ai umati aha yanako o hali gënanga.