Read Tobelo O YEREMIA 31 Bible Online

O YEREMIA 31 - Tobelo bible

O YEREMIA 31

¹Ma Jou wotemo, ”Aha imahiadono maöraha Ngohi todadi mata-mata o Israeloka manga hoana manga Jou Madutu, deʼ önanga yodadi Ahi umati.

²O tonaka ikokakahaka Ngohi tohidumutu Ahi dora de Ahi hayangi onangika yo ota-otanoka o honganino. Maöraha o Israel manyawa yolingiri o sanangi,

³magurutikahi Ngohi tomahimatoko Ahi diri onangika. Hei Israel manyawa, kahuruoninohi Ngohi salalu Tinihayanga ngini, deʼ kahokogenangika aha Ngohi kahirahi Tohidumutu Ngohi salalu Tinï dora ngini.

⁴Niahoana de niaberera aha Tadiai youtumu hokä mahiraino. Mamoioli ngini aha nial̄ë o damunu, deʼ niselo de niamorene.

⁵Ngini aha nidiai o angguru madumule o Samaria mal̄oku ma buturungoka, deʼ yodödato-datomo aha yautukoli mahohoko.

⁶Igoungu aha iboa maoraha o kota magogoana yopöaka o Efraim mal̄oku mabuturungoka, ’Niaino ngone hodoa o Sionil̄e, ma Jouika tongone nanga Jou Madutu.’ ”

⁷Ma Jou watemo, ”Ninyanyi nimorene mangale o Israel Ahi umati — o hoana deo berera ipöparalu hagala o hoana deo bereraino. Nihinyanyi o higiriri manyanyi, deʼ nihingahu: ’Ma Jou wahihalamatoka Ai umati mahou-houohi.’

⁸O koremieil̄e Tä ao önanga yolio; önanga Tatoomu o dunia mabaha-bahaino. O nyawa yopilo-piloko, deʼ o nyawa yolugu-lugu aha dede önanga yonïki. inoli o ngongoheka gënanga dahaö manga ngohaka imahiadonino deʼ de manga röehoka manga dodubuhoka. Onanga mata-mata aha yolio manga gegetongo kamanga ngöe o bereraino nënanga.

⁹Imadagi magogiria manga kongo irero, Tälaru deʼ Tätuda önanga. Tä ao önanga yatilakuru hagala o ngï ma akere iwoe-woe, yanonu o ngekomo madiaika o ngï önanga aha koyopelekua. Mangale o Israel, Ngohi hokä manga Ama, o Efraim ganga Ahingohaka o nauru mariaka.”

¹⁰Ma Jou watemo, ”Ni ihene hagala o hoana deo berera! Niahiadono Ahi behehongo o ngöto mahonongaika: Ahi umati Tahikokitingakoka aha Tätoomu deʼ Täpaliara hokä o aiwani magogoana wögoana ai duba.

¹¹Ahi umati o Israeloka Tahihalamatoka, deʼ Tahibebasi o hoana deo berera yokua-kuatino.

¹²O Sion ma Doporonika önanga aha yoboa de manga hoana ihöhailoa, ikali yonyanyi de manga morene karana Ahi ngongike mata-mata onangika, enagënanga o gandum, o minya, o angguru, o hapi deʼ o duba. Onanga aha hokä hadödato-datomo ma akere iwedo-wedono, deʼ okia-kiaua yokuranga.

¹³O öraha gënanga o momoholehe aha yoselo manga hininga dema morene. O bobereki deʼ o gikiri magö mata-mata youtumu, hababu Ngohi aha Tälaru önanga. Toönanga manga duka Tangali idadi o morene, manga hininga mahuha Tangali idadi manga sanangi.

¹⁴Manga imam-imam aha Tahisanangi deo inomo dema boboloi; deʼ Ahi umati mata-mata yopöparalu aha Tahidöaka. Ngohi, ma Jou, Tahö heto-hetongo.”

¹⁵ Ma Jou wato, ”O Rama mabereraka yoihene o dodora mailingi, deʼ yokururihi manga hininga mahiri. O ngo Rahel mädodora ami ngoha-ngohaka, münanga moluku imi laru hababu önanga moiokaua.

¹⁶Nomatogumu noari deʼ nadudungu anikongo! Anihuha de ani kangela mangale ani ngoha-ngohaka koparahajaua. Ngonaika naga mabalahi, ani ngoha-ngohaka yolio ani lawani manga bereraino.

¹⁷Naga o ngonganono mangale ngona o öraha mahimangika; ani ngoha-ngohaka aha yolio manga kapongika.

¹⁸Toihene o Israel manyawa yotemo manga hininga dema huha, ’Ya Jou, ngomi hokä o aiwani yadana owahi ma Ngona Nomïdotoko Nomi hibiaha la mihingounu, deʼ öraha nënanga ngomi mima hidiai la mima idulu Ngonaika. Ho, nomïao ngomi milio, ya Jou, tongomi mia Jou Madutu.

¹⁹Ngona ngomi minïporetoka, mä o manarama gënanga ngomi mima toduba. Ngona nomï hukumoka ngomi deiböto, ngomi mimarukuku karana miahininga ihuha. Ngomi imïmaleke deʼ okiaua imïdaene karana kamima gö ikahi mibaradohaka.’

²⁰Israel, ngona Ahingohaka Tonihaya-hayangi, Ahingohaka Tonihohininga Ahi gate mabelaka. Tohigeto-getongo Ngohi toni ngamo Ngohi salalu tomahininga ngonaika de Töigo Tonimake. Ngona aha Tonihidiai dema dora dema hayangi.

²¹Nanonako hagala o ngekomo, nohibeloho o dodungu nalingiri o ngekomo mahira nanönonu. Hei, Israel, nolio! Noma idulu ani kota mahiraika.

²²Hiädono muruonoka ngona ka hokogenangika notaka-taka, hei o hoana deo berera yososatiaua Ngohino? Ngohi todiaioka o duniaka okianaga moi mahungi-hungi, Okianaga moi ihera-heranga — hokä o ngoheka mïriwo o nauru.”

²³Ma Jou Duru Wokokuaha, o Israel manga Jou Madutu wotemo, ”Mako Ahi umati Tadiaioka youtumu hokä kahuruonoli, done o Yehuda maberera dema kapo-kapongo aha yoihenoli o nyawa yotemo, ’Tanu ma Jou wohibarakati o doporono itebi-tebini o Yerusalem mabereraka o ngï wogogere widinga-dingakika.’

²⁴O nyawa aha yogogere o Yehuda mabereraka deʼ makapo-kapongoka. Dokengoka aha naga yototumule deʼ o aiwani yopöpaliara deo hapi deʼ manga duba.

²⁵Onanga yaböbole-bole aha Tadiai manga röehe yauwini, deʼ manga kuata koiwa-iwa karana yähanini aha tadiai yäpunuhu.

²⁶O öraha gënanga o nyawa aha yotemo, ’Tomä idu ihikioko ipahaino, ngohi tamao ahi röehe yauwini.’

²⁷Ngohi, ma Jou, totemo aha imahiadono maöraha o Israel deʼ o Yehuda maberera Tohiomanga deo nyawa deʼ o aiwani.

²⁸Hokä sarakia kahuruonino Ngohi Tagoanoka önanga hupaya ipahaika Ngohi Tärahuku, Täruba deʼ Täwede-wederuku önanga, hoko genangoli Ngohi aha Tägoana önanga hupaya Ngohi Tabitumu deʼ Tahigokoli önanga.

²⁹ O öraha gënanga o nyawa aha koyotemo okaua, ’O dimono yaol̄omo o hohoko masuka-suka, aingohaka ma ingiri yamao yakiohiki,’

³⁰duga-duga o naguna waol̄omo o hohoko masuka-suka, ünanga mahirete aha wamao magiohiki ai ingiri. Moi-moi o nyawa aha yohonenge karana manga baradoha mahirete.”

³¹ Ma Jou wotemo, ”Aha imahiadono maöraha Ngohi Todiai o jaji mahungi deo Israel deo Yehuda manyawa.

³²Mä o jaji gënanga hokä o jaji Tadodiaiua de toönanga manga ete de manga tohora maöraha Tätuda önanga o Mesir mabereraka deyohupu. Ngaroko ngohi hokä womatengo o rokata mangale önanga, mä önanga ihipongono Ahi jaji dede önanga.

³³ Nenanga o jaji mahungi aha tadiai deo Israel manyawa: Hagala Ahi tita aha Takelenga toönanga manga hininga madol̄a magoronaka, de Tatulihi toönanga manga hiningaka. Ngohi aha todadi manga Jou Madutu, deʼ önanga aha yodadi Ahi umati.

³⁴ Onangino kaima tengo mai paraluokaua wadotoko ai dodiawo mangale iwinako ma Jou. Hababu önanga mata-mata, yopako de yoaluhu, aha ihinako Ngohi. Hagala toönanga manga howono aha Tawohanga, toönanga manga baradoha aha Ta apongo. Ngohi, ma Jou, totemoka.”

³⁵O wange malako ma Jou wasadia la yatararono o wange-wange; o mede de hagala o murumu la yatararono o hutu-hutu. O ngöto Wohiruae hiädono malulu ipopotoka, Ma Jou Duru Wokokuaha gënanga Ai romanga.

³⁶Ma Jou wojaji, ”Hokokia madekana o alam madodagi ingaliua o Israel ma aha kahirahi naga hokä o hoana deo berera.

³⁷Nako maoraha moi o dihanga yakunu yatuga, deʼ o dunia mahohol̄e yakunu yatailako, maorahoka gënanga o Israel aha Tätila karana hagala toönanga manga manarama itotorou. Ngohi, ma Jou, totemoka.”

³⁸Ma Jou wato, ”Aha imahiadono maoraha o Yerusalem yamode-modekika Tohigokoli hokä Ahi kota, o Hananeel ma Candi de yaino hiädono o Sudut ma Ngorana ma Amo-amokika.

³⁹Genangoka de yaino mabatingi madodungu yodumutu o Gareb ma Doporonika, daha i rehene o Goaika.

⁴⁰O wai gënanga yamode-modekika, yapake hokä o jere deʼ o wale yaumo-umo mangï, deʼ mata-mata o dumule o Kidron ma Ngairi madatekino hiädono o Kuda ma Ngorana ma amo-amokika mameta o wange mahiwaroko aha yatingaka mangale Ngohi. O Yerusalem ma kota aha yarubaokaua ekola yawedere.”