Read Tobelo O YEREMIA 32 Bible Online

O YEREMIA 32 - Tobelo bible

O YEREMIA 32

¹ Mataongo ngimoioka o Zedekia o Yehuda ma koano ai popareta, enagënanga o taongo ngimoi de tufange o Nebukadnezar o Babel ma koano ai popareta, ma Jou wohitemo ngohino.

²Maorahoka gënanga o Babel ma koano aitentara magogiria yaparangi o Yerusalem. Ngohi ma koano Zedekia wohitumunguku ai kadato malooaka

³karana ihikalaki tohingahuoka ma Jou wotemo hoko nënanga, ”O Babel ma koano aha Timal̄aika wautumu deʼ wögogere o kota nënanga,

⁴deʼ ma koano Zedekia aha koiwi otanua. Unanga aha iwi hilapahi ma koano Babelika, deʼ wïhimanga ma koano gënanga inoli imatemo-temo mahirete dede ünanga.

⁵De ipaha o Zedekia aha iwitoraka o Babelika deʼ wogogere dokengoka hiädono Ngohi tïhukumu ünanga. Ngaroko ünanga waparangi o Babel manyawa, ünanga aha wohasilua. Ngohi, ma Jou totemoka.” Ma Jou wohitemo ngohino

⁶o Hanameel, ahi pepe o Salum aingohaka o nauru, aha woboa la wogahoko hupaya ngohi taija ai tonaka o Anatot mabereraka o Benyamin ai daeraka. Hababu, ka ngohi ai riadodoto itö tigi-tigi de ahihaku taija o tonaka gënanga.

⁸De yakorona hokä ma Jou waheto-hetongo, o Hanameel woboaino o kadato malooaka, deʼ wogahoko hupaya ngohi taija ai tonaka. Karana gënanga ngohi tongaku ma Jou igou-goungu wohitemoka ngohino.

⁹Done ngohi taija o tonaka gënanga o Hanameelino dema ija o tiei haaka ngimoi de tumidi. Täahokino yohöhakihi deʼ toönanga manga himangoka tatanda tangan o bubukunu mahurata, daha tasegeluku deʼ taetongo matiwi.

¹¹De ipaha ngohi tal̄ë o bubukunu mahurata gënanga yasegeluku deʼ masyarat-syarat inoli hagala ihi tötantu. Tal̄ëoli o hurata masalinan koiwa-iwa masegel,

¹²deʼ o hurata hinoto gënanga tahidöaka o Barukhika o Neria aingohaka o Mahseya ai danongo. Ngohi tohidöaka o Hanameel ai himangoka ikali yohöhakihi yatötanda tanganoka o hura-hurata gënanga, deʼ hagala o nyawa manga himangoka magogiriaka yogögogeruku o looaka gënanga.

¹³Toönanga manga himangoka mata-mata ngohi tïtemo o Barukhika,

¹⁴”Ma Jou Duru Wokokuaha, o Israel manga Jou Madutu, wohipareta hupaya ngona nal̄ë o hurata hinoto nënanga, kayaoa ma asli kayaoa masalinan, deʼ nohingohama moi o bohoko o tonaka magoronauku hupaya itongohono itedekana.

¹⁵Ma Jou Duru Wokokuaha, o Israel manga Jou Madutu, wotemo o tau, o tonaka, de o angguru madumule aha imä kubukunoli de ima kiija o bereraka nënanga.”

¹⁶O bubukunu mahura-hurata gënanga tohidöaka o Barukhika deiböto, ngohi toma niata,

¹⁷”Jou Duru Nokokurutil̄e, ka Ngona o dihanga deo dunia madodadi de Ani kuaha deʼ Ani dagakunu malamo-amoko. Kamoiö makoiwa lai huha Ngonaika.

¹⁸Ngona nohidumutu Ani dora ikokakali o nyawa dema ribu-ribuhika, mä Ngonaö nähukumu o nyawa karana manga dimono manga baradoha. Ngona ma Jou Madutu nomomulia deʼ no poputurungu; Ani romanga o Jou Duru Nokokuaha.

¹⁹Hagala Ani datoro duru irahai, deʼ hagala Ani manarama i hera-heranga; Ngona namake hagala o nyawa yadodiai, deʼ nabalahi onangika imamoteke de toönanga manga manarama.

²⁰Kahuruonino Ngona nodiai ihö hera-heranga deʼ hagala o hali kabiahaua o Mesir matonakoka, deʼ hiädono o öraha nënanga Ngona kahokogenangikahi nadiai, kayaoa o Israel manyawa manga hidogoronaka kayaoa hagala o hoana deo berera mahomoa manga hidogoronaka. Karana gënanga o öraha nënanga kiaka dika Ngona kaini heto-hetongo.

²¹De Ani kuaha deʼ Ani kuata ma amo-amoko Ngona nä ao Ani umati Israeloka o Mesir matonakoka deyohupu. Ngona nodiai o nonako-nonako deʼ ihöhera-heranga inoli hagala idödadadi yomodo-modongo o haturu.

²²O berera maoa-oa deʼ iboburere nënanga Nahidöaka onangika hokä Nahijä jajioka toönanga manga ete de manga tohoraika.

²³Mä maöraha önanga yoboa o bereraino nënanga de yaora, önanga ihingonua Ani pareta-paretaika, deʼ yowangoua imoteke Ani dodotoko. Mata-mata Nahipopareta onangika kamoiö mä önanga yadiaiua. Hababu gënanga Ngona nadotagao hagala o bodito nënanga onanguku.

²⁴Hagala o Babel manyawa ihigokoka o bebeno-bebeno o mehele ihigiloliti o kota magilolitino la yaora, deʼ o öraha nënanga önanga yoparangi. O parangi, o habirokata, deʼ o bobaku o panyake aha idadi o hababu o kota nënanga iotaka toönanga manga giamika. Ngona namake mata-mata Nahö heto-hetongo idadioka manyonyata.

²⁵Mä hoko gënanga, ya Jou Duru Nokokurutil̄e, Ngona nohihö hulo-huloko taija o tonaka nënanga yohöhakihi manga himangoka, ngaroko mahutuohi aha o Babel manyawa yaora o kota.”

²⁶De ipaha ma Jou wohitemo Ngohino,

²⁷”Ngohi ma Jou, o nyawa mata-mata manga Jou Madutu. Okiaua mahuha Ngohino.

²⁸ O kota nënanga aha Tamal̄aika o Nebukadnezar o Babel manga koano wakuaha kamamoi de aitentara maduduono. Onanga aha yaora o kota nënanga,

²⁹deʼ yatuhuku hiädono yamata-mataka kamamoi de manga tau kiaka o nyawa yapuda Ahi dohata, karana hagala manga tau makatu ma l̄okuoka gënanga önanga yatuhuku o dupa o Baal deʼ o angguru yauhe mangale manga huhuba manga giki-gikiri.

³⁰Imulaenge toönanga manga sejarah madodihiraka o Israel manyawa deʼ o Yehuda manyawa yodiaioka Ngohi tosanangiua. Onanga yatomanga Ahi dohata de toönanga manga manarama itotorou.

³¹Ka deimulaenge o kota nënanga ihigoko, yogögogere yodiaioka Ngohi duru ihitohata. Ngohi taputuhoka la Täbinaha,

³²karana hagala o dorou yododiai o Yehuda deʼ o Yerusalem ma nyawa kamamoi de manga kokoano, manga popareta, o imam, deʼ toönanga manga nabi-nabi.

³³Onanga ihimal̄aka Ngohi deʼ ngaroko Ngohi hoko genangika Tadotoko önanga, önanga yoluku yoihene deʼ yoluku imamao.

³⁴ Maboboloioli o tau ihigö goko-goko mangale o pupuji Ngohino matau önanga yapesekoka yakelenga hagala toönanga manga gomanga haemo-emono o ngïoka gënanga.

³⁵ Onanga ihigoko hagala o huhuba mangï mangale o Baal o Hinom mawaioka, deʼ ihihuba toönanga manga ngoha-ngohaka o Molokh ma Gikirika. Enahioko, Ngohi komaiwa Tähuloko önanga yodiai o hali gënanga, maboboloi komaiwa ipuda Ahi dibanga magoronaka önanga aha yodiai o manarama ipese-peseke gënanga deʼ yadiai o Yehuda manyawa yobaradoha.”

³⁶Ma Jou, o Israeloka manga Jou Madutu, wohitemo ngohino, ”Yeremia, o Israeloka yotemo o parangi, o habirokata, deʼ o bobaku o panyake aha yadiai o kota nënanga itifa o Babel manga koano ai giamuku. O öraha nënanga, nohigihene okianaga Tahö heto-hetongo.

³⁷Ngohi aha Tätoomu o hoana deo berera nënanga o berera mata-mata Tahikokitingakoka önanga karana Ahi dohata de Ahi gangamo onangika. Onanga aha Täao oli o ngï ino nënanga deʼ Tahigumal̄a yogogere nenangokadau imahi sosanangi.

³⁸Onanga aha Tädiai Ahi umati, deʼ Ngohi todadi toönanga manga Jou Madutu.

³⁹Ngohi aha tahidöaka önanga duga-duga kamoi manga wowango madumutu: enagënanga, ihihoromati Ngohi kahiado-adonika; o hali gënanga aha yägao o oa mangale onangika mahirete, deʼ mangale toönanga manga difauku.

⁴⁰Ngohi aha Todiai o jaji ikokakali dede önanga. Ngohi Tomatogumua o oa todiai onangika. Ngohi aha Tadiai önanga ihïmodongo deʼ ihihoromati Ngohino de manga hininga magahumu hupaya önanga ihitingakua Ngohi.

⁴¹Ngohi aha tosanangi Todiai o oa onangika, deʼ Todiai önanga yogogere ihigila-gila o bereraka nënanga kahiado-adonika.

⁴²Hokä sarakia Ngohi Tadotagaoka o bodito o hoana deo bererauku nënanga, hoko genangoli Ngohi aha tahidöaka ma oa-oa mata-mata Tahijä jajioka onangika.

⁴³O nyawa yato o berera nënanga idadioka hokä o tonaka i kokakaha yogögogere o nyawa deʼ o aiwani, deʼ o berera nënanga iotakoka o Babel manyawa manga giamika. Mä Ngohi totemo hagala aha imäkubukunoli o bereraka nënanga;

⁴⁴imakubukunu mahurata aha yatanda tangan, yasegel, deʼ o hakihi-hakihi ihikuata. Genanga aha idadi o Benyamin ai daeraka, o kapo-kapongo o Yerusalem magilolitino o Yehuda makotaka, ol̄oku matimino madaeraka deʼ o Yehuda o koreharail̄e. O hoana deo berera nënanga aha Tohigilio hokä ihira-hirali o bereraka nënanga. Ngohi, ma Jou, totemoka.”