Read Tobelo O YEREMIA 33 Bible Online

O YEREMIA 33 - Tobelo bible

O YEREMIA 33

¹Maöraha ngohi kahitumungukuohi o kadato malooaka, ngohi tamake o behehongo mahomoa ma Jouino

²wohidödadi o dunia deʼ Watüku ikali Wakelengauku mangïoka. Unanga wohitemo,

³”Nopöaka Ngohino, done Ngohi aha Tohaluhu; aha Tohingahu ngonaika hagala o hali mahöhailoa deʼ nöhera-heranga nanö nako-nakouahi.

⁴O Yehuda manga koano ai kadato deʼ hagala o tau o Yerusalem makotaka yakiliangoka la yakuata toönanga manga gogoana nako manga haturu yäparangi. Mä Ngohi, ma Jou o Israel manga Jou Madutu, totemo,

⁵parasuma dika niälawani o Babel manyawa, mahababu o hali gënanga duga-duga aha yadiai o kota nënanga iomanga deo maiyeti hagala o nyawa Tahohohonenge Ahi dohata deʼ Ahi gangamo magoronaka onangika. Ngohi tolukoka Tamake o kota nënanga, ma karana toönanga manga nyawa yodiaioka itotorou.

⁶Mä Ngohi aha Tohigilio o kota nënanga deʼ yogögogere hoka ihira-hiraoli; önanga aha yokuatoli. Ngohi aha Tahidöaka onangika o lolä de o sanangi dema boboloi.

⁷O Yehuda deʼ o Israel aha tadiai youtumu hokä kahuruonino deʼ önanga aha ima okoil̄eoli hokä Ahi umati.

⁸Ngohi aha Tatebini toönanga manga baradoha önanga yadodiaioka Ngohino; toönanga manga baradoha deʼ manga satiaua aha Ta apongo.

⁹O Yerusalem aha idadi Ahi morene deʼ Ahi hininga iamoko. Hagala o hoana deo berera o duniaka aha yo awana deʼ kaima hidahaharuku ikali Ngohi ihihoromati, nako yoihene hagala o oa-oa Tododiai o Yerusalem yogögogere, deʼ mangale manga kuranga okia-kiaua Tahidö doa-döaka o kotaika gënanga.”

¹⁰Ma Jou wato, ”O nyawa yahetongo o ngï nënanga hokä o tonaka ikokakaha, moiua o nyawa ekola o aiwani igogere genangokadau. Toönanga manga demo igoungu itiai, hababu hagala o Yehuda makota deʼ hagala o ngekomo o Yerusalem mabereraka ihomoaka mata-mata; koiwa o nyawa ekola o aiwani igogere genangokadau.

¹¹ Mä hagala o ngïoka gënanga aha yoihenoli o morene mailingi deʼ o garago inoli o kawingi marameanga mailingi. Aha yoihenoli manga nyanyi hagala o nyawa yo ao-ao o syukur mahuhuba Ahi tauika. Onanga aha yotemo, ’Nisyukur ma Jou Duru Wokokuahaika karana Unanga yaoa deʼ Ai dora ikakali kahiado-adonika.’ O berera nënanga aha Tadiai okia-kiaua ikuranga hokä mahira inoli. Ngohi, ma Jou, totemoka.”

¹²Ma Jou Duru Wokokuaha wotemo, ”O berera deʼ makota-kota hokä o tonaka ikokakaha nënanga o nyawa ekola o aiwani yögogerua. Ma hokogënanga, o wange maduruino aha nagali hagala o tonaka dema mömomoka manga ngï o nyawa wögoana ai duba-duba.

¹³O kota-kota ol̄oku mabuturungu madaeraka, ol̄oku mabuturungu matimino, o Yehuda o koreharail̄e madaera, deʼ o Benyamin ai daera inoli o kapo-kapongika o Yerusalem magilolitino, deʼ o Yehuda makota-kotaka, o aiwani magogoana aha yaetongoli toönanga manga duba. Ngohi, ma Jou, totemoka.”

¹⁴ Ma Jou wato, ”Aha imahiadono maoraha Ngohi taganapi o jaji Tadodiai deo Israel deʼ o Yehuda.

¹⁵O öraha gënanga womatengo woadi-adili o Daud aidifauku aha Ti iriki wodadi o koano. O koano gënanga aha wodiai okianaga iadi-adili deʼ itiai o berera yamode-modekika.

¹⁶O Yehuda manyawa deʼ yogögogere o Yerusalem aha yahihalamati deʼ yowango yosanangi. O Yerusalem makota aha ihiromanga ’Ma Jou wonahi hohalamati.’

¹⁷ Ngohi, ma Jou, Tojaji salalu aha naga womatengo o Daud ai difauku yodadi o Israel manga koano;

¹⁸ aha salalu naga o imam-imam aihoanino ihïleleani Ngohi deʼ ihihuba o huhuba o aiwani, o gandum deʼ o huhuba yatö tuhu-tuhuku.”

¹⁹Ma Jou wohitemo ngohino,

²⁰”Ngohi tanikutoka o jaji de o hutu-hutu deʼ o wange-wange hupaya o hutu-hutu deʼ o wange-wange salalu iboa maorahoka; o jaji gënanga yakunua yahohihanga.

²¹Hoko genangö Ngohi tanikutoka o jaji de Ahi gilaongo o Daud, toünanga aidifauku aha salalu naga womatengo wodadi o koano; deʼ Ngohi tanikutoka o jaji deo imam-imam o Lewi aidifauku önanga aha salalu ihï leleani Ngohi. O jaji-jaji gënanga yakunua iehe.

²²Ngohi aha Tödogo Ahi gilaongo o Daud aidifauku deʼ o imam-imam o Lewi aihöana, hiädono manga gegetongo idadi iwöe manga ngöe hokä o dowongi o hohanino deʼ o murumu o dihangoka yakunua yaetongo.”

²³Ma Jou wohitemo ngohino,

²⁴”Nöhininga nohidodiai okianaga o nyawa yaheto-hetongo o Israel deʼ o Yehuda manyawaika? Onanga yotemo Ngohi Täumoka o hoana deo berera hinoto Täiri-irikoka gënanga. Genanga mahababu önanga yahikauku Ahi umati, deʼ yäpulonokaua önanga hokä moi o hoana deo berera.

²⁵Mä hokä sarakia Ngohi, ma Jou, tadiaioka moi o jaji maninikutu deo hutu-hutu deʼ o wange-wange, deʼ Todiai o tita yatätatoro o dihanga deʼ o dunia,

²⁶hoko genangoli aha Ngohi kahirahi Tasosö Ahi jaji deo Yakub aidifauku deʼ de Ahi gilaongo o Daud. Womatengo o Daud aidifauku aha Tï iriki la wäpareta o Abraham, o Ishak, deʼ o Yakub manga difauku. Ngohi aha Tädora de Tähayangi Ahi umatika, deʼ Tadiai önanga okia-kiaua yokuranga.”