Read Tobelo O YEREMIA 34 Bible Online

O YEREMIA 34 - Tobelo bible

O YEREMIA 34

¹ Maöraha o Nebukadnezar o Babel manga koano de aitentara yopoparangi ihikuata de hagala o hoana deo berera deo negara wautu-utumoka manga tentara yoboa yaparangi o Yerusalem deʼ hagala o kota magilolitino, ma Jou wohitemo ngohino.

²Unanga wohihuloko ngohi toiki o Zedekiaika o Yehuda manga koano, deʼ totemo hoko nënanga, ”Ngohi, ma Jou o Israel manga Jou Madutu, aha Tohidöaka o kota nënanga o Babel manga koanoika deʼ ünanga aha watuhuku.

³Ngona aha no otanua, duga-duga initagoko deʼ inihilapahi unangika. Ngona aha nimamake deʼ notemo-temo mahirete dede ünanga, daha ngona aha noiki o Babelika.

⁴Mä noihene Ahi demo nënanga inikorona ngona, Zedekia! Ngona aha konohonengua o parangi magoronaka,

⁵duga-duga nohonenge nohidodiai. Deʼ hokä sarakia o kawaha yotuhuku o manyanyi maoraha yälungunu ani ete de ani tohora yopopareta ihira de ngona, hoko genangoli o kawaha aha yatuhuku o manyanyi mangale ngona. Onanga aha yohahara deʼ yotemo, ’Kedede! Tongomi mia koano koiwi-waka!ʼ Ngohi, ma Jou, to temoka.”

⁶De ma Jou Ai behehongo gënanga tohiadono ma Koano Zedekiaika o Yerusalem mabereraka,

⁷maöraha o Babel manga koano aitentara manga duduono yaparangi o kota gënanga. Onanga yaparangi o Lakhis deʼ o Aseka, o kota hinoto mabebeno o mehele kaima tumungohi o Yehuda madaeraka.

⁸Ma koano Zedekia deʼ o Yerusalem yogögogere yodiai o jaji la yahibebasi

⁹toönanga manga gogilaongo o Ibranioka, kayaoa o nau-nauru kayaoa o ngongoheka hupaya kaima tengo mamoiua o Israel manga hoanino imagilaongo toönanga manga hoana manyawa.

¹⁰Mata-mata o kawaha de o popareta mapegawe yododiaioka o jaji la yahibebasi toönanga manga gogilaongo deʼ aha koima gilaongokaua, igou-goungu yalapahi toönanga manga gogilaongo gënanga.

¹¹Mä ipahaino önanga ingali manga dibanga, daha yal̄eoli o gogilaongo gënanga, deʼ yapakisa yodadioli o gilaongo.

¹²Done ma Jou o Israeloka manga Jou Madutu, wohihuloko ngohi tätemo hoko nënanga hagala o nyawaika gënanga, ”Maöraha Ngohi tä ao nia ete de nia tohora o Mesir matonakoka de yohupu deʼ Tahibebasi önanga o giloangino, Ngohi todiaioka o jaji dede önanga.

¹⁴ Ngohi tätemo mata-mata o gogilaongo o Ibranioka yoleleanioka o taongo butanga madekana, kokiani yahibebasi o taongo matumidi mabahaka. Mä nia ete de nia tohora yoluku yöhohininga ekola ihigihene okianaga Taheto-hetongoka gënanga.

¹⁵O wange muruono naga ipahaika ngini niangali niakalakuanga deʼ niadiai yasosanangi Ahi hininga. Ngini mata-mata nihimoteke la niahibebasi o gogiloango nimako hoana moi, deʼ niadiai o jaji dede Ngohi Ahi Tau magoronaka.

¹⁶O Yehuda deʼ o Yerusalem mapopareta mapegawe kamamoi deo kadato mapegawe, o imam-imam deʼ mata-mata yogoa-goana nia tonaka nihikuatoka o jaji gënanga de nitoaka o hapi, niadiai i dadi o dobiki hinoto, deʼ nimädagi o dobiki hinoto gënanga mahidogoronaika. Mä de ipaha ngini niangali niadibanga deʼ nihihikauku Ngohi. O gogilaongo nia hibebebasoka imoteke de toönanga manga mau, ngini nia l̄ëoli deʼ niapakisa la yodadi o gilaongoli. Karana gënanga Ngohi, ma Jou, totemo ngini nia tilakuroka Ahi pareta, deʼ nihingounua to ënanga madatoro, hababu ngini niahi bebasua niadodiawo o Israel manyawa. Aah, öraha nënanga kayaoa de Ngohi tinihibebasi ngini: nibebasi mangale nihonenge o parangi magoronaka ekola deo bobaku o panyake ekola deo habirokata. Ngohi aha tinihidiai ngini hokä niadiai o hapi niatoa-toaka gënanga. Ngohi aha tadiai hagala o hoana deo berera o duniaka yamao yaporohono yamake okianaga Tadodiai nginika.

²⁰Ngohi aha tinï hilapahi ngini niahaturuika yöigo-igo inï toma ngini. Nia maiyeti aha o totaleo deʼ o aiwani madorou yaol̄omo.

²¹O Zedekia o Yehuda manga koano deʼ ai popareta mapegawe aha Tahilapahi hagala o nyawaika yöigo-igo yatoma önanga. Ngohi aha Tahilapahi önanga o Babel manga tentaraika öraha nënanga inïmal̄aka ngini.

²²Ngohi aha Tahipareta hupaya önanga imakilioroli o kotaino nënanga, daha yaparangi, yaora deʼ yatuhuku. Hagala o Yehuda makota aha Tadiai hokä o tonaka ikokakaha yogö gogerua o nyawa. Ngohi, ma Jou, totemoka.”