Read Tobelo O YEREMIA 35 Bible Online

O YEREMIA 35 - Tobelo bible

O YEREMIA 35

¹ Maöraha o Yoyakim o Yosia aingohaka wodadi o Yehuda manga koano, ma Jou wohitemo ngohino,

²”Noiki notemo-temo de hagala o nyawa o Rekhab ai ahaluku. Nä ao önanga o kamar moika Ahi Tau magoronaka, deʼ nahiokere o angguru onangika.”

³De ngohi toiki tängoho yongodumu o Rekhab ai ahaluku, enagënanga o Yaazanya (aingohaka womatengo ai romanga o Yeremia o Habazinya aingohaka) kamamoi mata-mata ai röriadodoto deʼ manga ngoha-ngohaka o nau-nauru.

⁴Ngohi tä ao önanga ma Jou Ai Tau ma nabi Hanan o Yigdalya ai muri-muri manga kamari magoronaika. O kamari gënanga magogere ma Imam Maaseya o Salum aingohaka ai kamari mal̄okuoka, ima hitigi-tigika deo pegawe-pegawe mahomoa manga kamari. O Maaseya ganga o pegawe yokö kurutil̄e wogoa-goana hagala o ngorana ma Jou Ai Tauoka.

⁵De ipaha ngohi takelenga o Rekhab ainyawa gënanga manga himangoka o udo-udomo deʼ hagala o galahi ioma-omanga deo angguru. ”Ika niokere.”

⁶Mä önanga yohaluhu, ”Ngomi miokerua o angguru. Tongomi mia ete de mia tohora o Yonadab o Rekhab aingohaka womïduhunu ngomi de tongomi mia difauku mia okere o angguru. O hiduhunu gënanga imadadi kahiado-adonika.

⁷Ngomi yakunua okianaga mimädatomo ekola de miadumule o angguru madumule. Ho miawowango maumuru, ngomiö yakunua o tau mimahigoko. Ngomi kokiani migogere miatau-tau magoronaka, hupaya yakunu migogere o tonakoka nënanga hokä o nyawa o dagi-dagino.

⁸Mata-mata o Yonadab womihi popareta ngomino ngomi mihingounoka. Ho miawowango maumuru, ngomi de tongomi mia ngohaka de miahekata miokerua o angguru.

⁹Ngomi mimahigokoua o tau mangale mia ngï migogere, mä ngomi migogere mia tau-tau magoronaka. Ngomiö koiwa mia angguru madumule, o dumule, ekola o gandum magihihi la midatomo. Madipoko, hagala wohipopareta mia ete de mia tohora o Yonadab gënanga, ngomi mihingounu itötotomo.

¹¹Mä öraha ma koano Nebukadnezar waparangi o berera nënanga, ngomi mima putuhu miadokaoara o Babel deʼ o Siria manga tentara, deʼ mimahidotoko o Yerusalemika. Genanga mahababu ngomi öraha nënanga migogere nenangokadau.”

¹²De ma Jou Duru Wokokuaha, o Israel manga Jou Madutu, wohihuloko ngohi toiki o Yehuda deʼ o Yerusalem ma nyawaika, deʼ tohiadono ma Jou Ai behehongo nënanga onangika, ”Ngohi ma Jou, Tinï leha yadodoaho ngini nioluku nihihigihene Ngohi, deʼ nioluku niamoteke hagala Ahi pareta.

¹⁴O Yonadab wäduhunu aidifauku yaokere o angguru, deʼ önanga ihingounu o hiduhunu gënanga. Hiädono o wange nënanga kao nyawa moiö ma onangino moiua yaokere o angguru. Mä Ngohi toma togu-togumua Tinïtemo nginika, deʼ ngini nioluku nihigihene.

¹⁵Toma togu-togumua Ngohi tähuloko nginika mata-mata Ahi gogilaongo o nabi-nabi, deʼ önanga ininasihatoka ngini la nihidiai niakalakuanga deʼ nimatogumu nidiai o dorou. Onanga inihidöaka o hohininga la niahubaua hagala o gikiri mahomoa deʼ nimahigiloangua onangika, hupaya ngini yakunu nihigila nigogere o bereraka nënanga Tinihidoa-doakoka nginika deʼ nia ete de nia tohoraika. Mä ngini nioluku niohohininga deʼ nioluku nihihigihene Ngohi.

¹⁶O Yonadab aidifauku ihingounu toönanga manga ete de manga tohora ai paretaika, mä ngini nioluku nihingounu Ngohino.

¹⁷Karana gënanga, Ngohi, ma Jou Duru Tokokuaha, o Israel manga Jou Madutu, aha Tinïdotagao nginiuku — o Yehuda deʼ o Yerusalem manyawa — hagala o bodito Tohitö tantuoka mangale ngini, hokä Taheto-hetongoka. O hali gënanga tadiai karana ngini nioluku nihigihene nako Ngohi Tinïtemo-temo nginika, deʼ ngini nioluku nihaluhu maoraha Ngohi tinï ahoko ngini.”

¹⁸De ngohi tätemo hagala o nyawaika o Rekhab ai ahaluku ma Jou Duru Wokokuaha, o Israel manga Jou Madutu, wotemo hoko nënanga, ”Ngini nihingounoka nia ete de nia tohoraika o Yonadab, mata-mata aipareta ngini niamotekoka, de nihidagioka.

¹⁹Karana gënanga, Ngohi, ma Jou Duru Tokokuaha, o Israel manga Jou Madutu, tojaji o Yonadab o Rekhab aingohaka aidifauku salalu aha naga o nau-nauru ihilö leleani Ngohi.”