Read Tobelo O YEREMIA 36 Bible Online

O YEREMIA 36 - Tobelo bible

O YEREMIA 36

¹ O taongo maiatoka o Yoyakim o Yosia aingohaka wodadioka o Yehuda manga koano, ma Jou wohitemo ngohino,

²”Na l̄ë o buku ilüluluinoka o gahumu moi, deʼ natulihi genangikadau mata-mata Taheto-hetongoka ngonaika mangale o Israel de manga hagala o hoana deo berera. Na tulihi mata-mata Ahi demo kadema dero madodihirakahi Ngohi tonitemo ngonaika maorahoka ma Koano Yosia ai popareta hiädono o wange nënanga.

³Mudukua o Yehuda manyawa aha imatogumu yodiai o dorou nako önanga yoihene mangale mata-mata o bodito aha Tahitapal̄u onanguku. De Ngohi aha tahiapongo toönanga manga baradoha de manga dorou.”

⁴Karana gënanga ngohi tiahoko o Barukh o Neria aingohaka deʼ tïbeto-betongo unangika mata-mata ma Jou waheto-hetongo ngohino. Deo Barukh watulihi mata-mata o buku ilöluluinoika gënanga.

⁵De ipaha ngohi tohidöaka o pareta nënanga unangika, ”Ngohi tihigumal̄aokaua wöngohama ma Jou Ai Tau.

⁶Karana gënanga, nako mawange yadono o nyawa yopuaha, ngona kokiani noiki dokengika, deʼ nabasa de ani ilingi nakua-kuatil̄e mata-mata tonï beto-betongoka ngonaika, hupaya önanga yoihene mata-mata ma Jou waheto-hetongoka ngohino. Nadiai gënanga napake o ngï inihigumal̄a moi-moi o nyawa naga ma Jou Ai Tauoka yakunu yoihene, deo Yehuda manyawa yobö boa-boaino manga bereraka de yaino.

⁷Mudukua karana gënanga önanga aha imä niata ma Jouika, deʼ yotoba toönanga manga manarama madorouino. Ma Jou duru wängamo onangika deʼ Womau Waboditoönanga.”

⁸De o Barukh wabasa ma Jou Ai demo ma Jou Ai Tauoka, hokä tihulo-hulokoka unangika.

⁹O mede hiwo o taongo motoaka o Yoyakim o Yehuda manga koano, o kawaha yopuaha la yamake o hayanga deo dora ma Jouino. O Yerusalem yogögogere deʼ hagala o nyawa yobö boa-boa o Yehuda makota-kotaino, mata-mata yopuaha.

¹⁰Daha o Barukh wadabasa o buku ilöluluinoka gënanga hagala moi-moi taheto-hetongo, deʼ mata-mata o nyawa ihigihene o bobasa gënanga yabasa ma Jou Ai Tau magoronaka o Gemarya ai kantoroka, o Safan aingohaka o negara masekretaris. O kantor gënanga magogere o looa il̄oku-l̄okuil̄eoka, imahitigi-tigika o ngekomika höngohama o Ngorana ilago-agomo ma Hungika ma Jou Ai Tauoka.

¹¹O Mikhaya o Gemarya aingohaka deʼ o Safan ai danongo yoihene o Barukh wabasa ma Jou ai demo o buku iluluino gënanga.

¹²Daha ünanga woiki o kadatoika, ma sekretaris negara ai kantorika. Genangoka mata-mata yopangka-pangkati magogiria yo rapat. O Delaya o Semaya aingohaka, o Elnatan o Akhbor aingohaka, o Gemarya o Safan aingohaka, Zedekia o Hananya aingohaka, o Elisama womatengo ma sekretaris, de yopöpangka-pangkati mahomoa naga genangoka.

¹³Mikhanya wahingahu onangika, mata-mata waböbasa-basa o Barukh, ma Jou ai Tauoka.

¹⁴Daha yopöpangka-pangkati gënanga iwihuloko o Yehudi (enagënanga o Netanya aingohaka, o Selemya ai danongo, de o Kusyi ai tohora) o Barukhika, de manga pareta mangale woboa de wao onangika o buku iluluino waböbasa-basaka genanga. Done o Barukh wao o buku gënanga.

¹⁵”Ika nogogere” onanga yato, ”nabasa o buku ilululuino gënanga ngomino.” O Barukh wamoteke.

¹⁶Ipaha ünanga ibooto wabasa, onanga kaimakupuluno de o manga mamaö yohawatere de yohawana daha iwitemo o Barukhika, ”Ngomi kokiani mihingahu hali nenanga ma koanoika.”

¹⁷Ipaha önanga iwileha, ”Beika nomihingahu ngomino sarakia ngona-ngona matulihi mata-mata nënanga. Boteka o Yeremia womi beto-betongo ngonaika?”

¹⁸”Itiai, moi-moi mademo itötulihi-tulihi nenangokadau wohi beto-betongoka o Yeremia ngohino de ngohi tatulihi de o tinta o buku ilululuino uku nenanga,” wohaluhu o Barukh.

¹⁹”Ngona deʼ o Yeremia kiani nima ngiunu. Uha hiadono o nyawa ihi oriki mangï nima ngiu-ngiunika gënanga,” önanga yato.

²⁰Yopöpangka-pangkati gënanga yakelenga o buku ilululuino gënanga o Elisama ai kamaroka, ma sekretaris gënanga, ipaha yaiki ma koanoika de ihi ngahu mata-mata.

²¹Daha makoano wihulako o Yehudi woiki mangale wal̄ë o buku ilululuino genanga. Wal̄ë o Elisama ai kamarino de ibooto, o Yehudi wadabasa makoanoika deʼ mata-mata yopangka-pangkatika imaokoino magogirioka iwihigilolitino.

²²O öraha gënanga o mede hiwouku, deʼ ma koano magogiriaka wogogeruku o kadatoka womaraukika o uku mahimangoka o dumamata maorahoka.

²³Hoko gënanga o Yehudi wabasa o hidoku hange ekola iata deiböto, ma koano watöaka o hidoku gënanga de o gakana ma alu-aluhu deʼ wohikaweli o ukuika. Hoko gënanga wadiai gila-gila hiädono mata-mata o buku ilöluluinoka gënanga imata-mataka youku.

²⁴Ngaroko o Elnatan, o Delaya, deʼ o Gemarya yogahoko demagiria hupaya ma koano uha watuhuku o buku ilöluluinoka gënanga, mä ünanga woluku wahigihene önanga. Kayaoa ma koano kayaoa o popegawe yoihe-ihene o buku gënanga madol̄a koyohawanua ekola ihidumutu imatoduba.

²⁶Ma koano kai dogo wihipareta aingohaka o nauru, enagënanga o Yarahmeel, kamamoi deo Seraya o Azriel aingohaka deʼ o Selemya o Abdeel aingohaka, hupaya ngohi deʼ o Barukh ahi sekretaris imï tagoko. Mä ma Jou Womï iunoka ngomi.

²⁷Ma koano Yoyakim watuhuku o buku ilöluluinoka tibeto-betongo o Barukhika gënanga deiböto, ma Jou Wohihuloko ngohi,

²⁸tal̄ë o buku ilöluluinoka mahomoa, deʼ tatulihi mata-mata ituli-tulihoka o buku ilöluluinoka madodihiraka gënanga.

²⁹Ma Jou Wohihuloko ngohi toiki tahetongo hoko nënanga ma koanoika, ”Ngona natuhukoka o buku ilöluluinoka gënanga, deʼ ngona nileha o Yeremiaika yadodoaho ünanga wotulihi ma koano Babel aha woboa de wawedere o berera nënanga ikali wätoma yogögogere kamamoi de hagala ma aiwani.

³⁰Hababu gënanga, Ngohi, ma Jou, Tonitemo ngonaika, hei Koano Yoyakim, komoi-moiua ani difauku aha yopareta hokä ma koano o Daud aidifauku. Ani maiyeti aha ihikaweli maporetika, o wange-wange yödahauku, deʼ o hutu-hutu yöalo.

³¹Ngona, anidifauku, deʼ anipopegawe aha Tahukumu karana hagala o baradoha ngini niadodiai. Ngohi aha tinidotagao nginiuku o bodito mata-mata Tadodiai nginika, karana kayaoa ngona kayaoa o Yerusalem deo Yehuda yogögogere niolegaikaua hagala Ahi gogohara.”

³²De ngohi tal̄ë o buku ilöluluinoka mahungi, deʼ to hidöaka o Barukhika ahi sekretaris. Daha ünanga watulihi mata-mata tibeto-betongoka unangika, enagënanga o buku ilöluluinoka madodihiraka madol̄a tohidogo o behehongo muruono naga marupa hoko gënanga.