Read Tobelo O YEREMIA 37 Bible Online

O YEREMIA 37 - Tobelo bible

O YEREMIA 37

¹ Maöraha o Nebukadnezar o Babel ma koano wihiguti o Yoyakhin o Yoyakim aingohaka, ünanga wïgohara o Zedekia o Yosia aingohaka o Yehuda ma koano.

²Mä kayaoa o Zedekia kayaoa ai popegawe deʼ ai kawaha yodomotekua ma Jou Ai behehongo Wohidö doa-döaka ngohino.

³Ma Koano Zedekia wïhuloko o Yukhal o Selemya aingohaka, deʼ ma Imam Zedekia o Maaseya aingohaka la wogahoko hupaya ngohi tomä niata ma Jou o Jou Madutuika mangale o hoana deo berera manga paralu.

⁴Maorahoko gënanga ngohi ihihingohamowahi o buika deʼ katobebasohi takaika-takaino o kawaha manga hidogoronaka.

⁵O Babel matentara magogiria ihigiloliti o Yerusalem, mä maoraha önanga yoihene o Mesir matentara imagoraka o Mesir de yosobo la yoparangi, önanga imadohuku.

⁶Ma Jou, o Israel manga Jou Madutu, wohihuloko ngohi

⁷totemo hoko nënanga ma Koano Zedekia ai huhulokika. ”Nahetongo o Zedekiaika, ’O Mesir matentara magogiriaka yödumutu nenangino la inïriwo, aha imakilioro deʼ yolio.

⁸Daha o Babel manyawa aha imakilioro deʼ yaparangi o kota nënanga, inoli yautumu deʼ yatuhuku.

⁹Ngohi, ma Jou, ngini tinihidöaka o hohininga, hupaya uha niatipu niadiri de nimapikiri o Babel manyawa yoikoka deʼ aha koima kiliorokaua. Hababu önanga maraioka aha imakilioro.

¹⁰O demo ma ade ngini niautumu mata-mata o Babel matentara hiädono yogögogere duga-duga hagala o nyawa manga nabo ilago-agomo toönanga manga tau-tau magoronaka, mä önanga aha yomomiki deʼ yatuhuku yamata-mataka o kota nënanga.’ ”

¹¹O Babel matentara o Yerusalemoka de imadohuku mahababu o Mesir matentara yotagi yödumutu o kota gënanga.

¹²De ngohi tamal̄a o Yerusalem de toiki o Benyamin ai daeraika la tatarima o hidoku ahi puhaka o tonaka toahi riadodoto.

¹³Mä maöraha ngohi tomahiadono o Benyamin ai Ngorana ma Ago-agomika, o tentara manga komandan wögoa-goana genangokadau wohitumungu ngohi deʼ wohitemo, ”Ngona nomau nopiringana o Babel manyawaika!” (O tentara manga kapita gënanga ai romanga o Yeria; ünanga o Salemya aingohaka deʼ o Hananya ai danongo.)

¹⁴Ngohi tïpaluhu, ”Itiaiua! Ngohi ahi dungutua topiringana nia haturuika.” Mä o Yeria woluku woihene. Unanga wohitagoko deʼ wohiao ngohi tähimanga yopangka-pangkati o poparetaka.

¹⁵Onanga duru ihi ngamo ngohino, de wapareta hupaya ngohi ihigohara deʼ ihikurunga o Yonatan ai tauoka, masekretaris negara. O tau gënanga yadiaioka o bui.

¹⁶Ngohi ihi hingohama o lupunguku o tonaka magoronaka, deʼ madekanino ihitumunguku genangokadau.

¹⁷De ipaha ma Koano Zedekia wähuloko o nyawa ihiao ngohi tïhimanga ünanga o kadatoka. Genangokadau warahasia ünanga wohileha ngohino boteka naga o behehongo ma Jouino. Ngohi tohaluhu, ”Naga” Daha tödogo, ”Jou koano aha ihi hilapahi o Babel ma koanoika.”

¹⁸Genanga deiböto ngohi tileha, ”Okia ahi dorou Jou Koanoika ekola Jou Koano ai popegaweika ekola o kawahaika, hiädono Jou Koano nohihingohama ngohi o buika?

¹⁹Kiaka Jou Koano ani nabi-nabi yahö heto-hetongo o Babel ma koano aha kowoni parangiua Jou Koano deʼ o berera nënanga?

²⁰Oraha nënanga, Jou Koano nomomulia, tanu nömodeke nohigihene ahi gogahoko nënanga. Uha Jou Koano nohihidingotoli ngohi tögilioli o buika o Yonatan ai tauika gënanga, done ngohi tohonenge dokengoka.”

²¹De ma Koano Zedekia wohi pareta hupaya ngohi ihi bui o kadato malooaka. Hoʼ ngohi togogere genangokadau deʼ o wange ihigetongo ihi hidöaka o roti, o roti mahaharongino hiädono o roti yasosadiauku o kotaka gënanga koiwaka mata-mata.