Read Tobelo O YEREMIA 38 Bible Online

O YEREMIA 38 - Tobelo bible

O YEREMIA 38

¹Ma Jou wohihuloko ngohi tohiadono o behehongo nënanga o kawahaika, ”O kota nënanga aha tohidöaka o Babel matentara, deʼ önanga aha inï utumu. O nagona honanga yogogere o kota magoronaka aha yohonenge o parangi magoronaka, ekola karana o habirokata ekola o bobaku o panyake. Mä o nagona honanga yohupu de imahidöaka manga diri o Babel ma nyawaika, aha yätomaua, manga jiwa aha ihalamati.” Sefaca o Mantan aingohaka, o Gedalya o Pasyhur aingohaka, o Yukhal o Salemya aingohaka, deʼ Pasyhur o Malka aingohaka yoihene mata-mata tahö heto-hetongo gënanga.

⁴De o popegawe gënanga yoiki ma koanoika deʼ yotemo, ”O nyawa nënanga kokiani iwihukumu iwihohonenge. Hababu, ai demo hoko gënanga ünanga wahibole o tentara manga hininga mata-mata deʼ o nyawa mahomoa kayo gögogerohi o kotaka nënanga. Unanga wäriwoua o kawaha, duga-duga wahiboditoönanga.”

⁵Ma Koano Zedekia wohaluhu, ”Ia! Niwidiai ünanga imamoteke de niamau, ngohi takunua tinïtatoko ngini.”

⁶De önanga ihi l̄ë ngohi deʼ ihihiguti ngohi deo gumini o ligihi ma koano aingohaka o nauru ai humu magoronauku, o kadato malooaka. Koiwa o akere o humu magoronaka gënanga, duga-duga o peseke, deʼ ngohi tohodoa o pesekuku gënanga.

⁷O öraha gënanga naga womatengo o Sudan manyawa wokökarajanga ma koano ai kadatoka. Ai romanga o Ebed-Melekh. Unanga woihene ngohi ihïnoaka o humuoka. Maoraha ma koano ai gogiria wodiai o rapat o Benyamin ai Ngorana ma Lago-agomoka.

⁸O Ebed-Melekh woiki genangika dewïtemo ma koanoika.

⁹”Jou Koano Nomomulia hagala o nyawa gënanga manga manarama itorou. Onanga iwinoaka ma nabi Yeremia o humuuku, ünanga maraioka aha o hahini wohihonenge genangoka, hababu o inomo koiwaka o kotaka nënanga.”

¹⁰De ma koano wihipareta o Ebed-Melekh, ”Naao o nyawa yaruange deniwihupu o Yeremia o humuil̄e gënanga kowahiohi unanga wohonenge.”

¹¹Done o Ebed-Melekh yoiki de yaruange gënanga o kadato magudangika, deʼ yal̄ë o ngoere madorou genangokadau, daha yawora de o gumini o ligihi ngohiuku o humu magoronaka.”

¹²O Ebed-Melekh wohihuloko ngohi o ngoere-o ngöere gënanga ahigugutu matimil̄e hokä o nanao hupaya o gumini o ligihi gënanga koihihiriua. De ngohi tödomoteke o Ebed-Melekh aipareta.

¹³De önanga ihitauru ngohi, o humuil̄ë gënanga. Genanga deiböto ngohi ihi tumunguku o kadatoka gënanga.

¹⁴Maöraha moiukuoli, ma Koano Zedekia wähuloko o nyawa ihiao ngohi tïhimanga ünanga o ngorana ilago-agomo mahangeoka ma Jou Ai Tauoka. Unanga wohitemo ngohino, ”Ngohi tomau toleha ngonaika, deʼ ngona kokiani nohaluhu nohi totararonika. Uha nagögogono okianaga.”

¹⁵Ngohi tïbaluhu, ”Nako ngohi tahetongo madiai, maraioka Jou Koano nohi gelenga o hukumanga ihi hohonenge; deʼ nako ngohi tonihidöaka o nasihati, Jou Koano aha noluku nömodongo nödomoteke ahi nasihati gënanga.”

¹⁶Ma Koano Zedekia woma hibongonino wohijaji ngohino, wato, ”De ma Jou Madutu Wowango-wango, ma Jou Madutu Wohidoa-döaka o wowango ngoneino, ngohi tokoboto ngohi aha kotoni tomaua ngona ekola tonihilapahi ngona hagala o nyawaika yomö mau-mau initoma.”

¹⁷De ngohi tahetongo o Zedekiaika ma Jou Duru Wokokuaha, ma Jou Madutu iwihö huba-huba o Israel manyawa, Wotemo hoko nënanga, ”Nako ngona nomahidöaka o Babel ma koano ai popegaweika, ngona aha koini tomaua, deʼ o kota nënanga ma aha koyatuhukua. Ngona deʼ ani hekata de ani ngohaka aha nihalamati.

¹⁸Mä nako ngona noluku nomahidöaka, o kota nënanga aha i tifa o Babel manyawa manga giamuku. Onanga aha yatuhuku hiädono imata-mataka, deʼ ngona aha kono otanua.”

¹⁹Ma koano wohaluhu, ”Ngohi tämodongo nanga hoana deo nanga berera ma nyawaika yopopiringanoka o Babel ma nyawaika. Uha-uha ngohi aha ihi hilapahi onangika deʼ ihihangihara.”

²⁰Ngohi tïbaluhu, ”Kowali” ”Jou Koano aha koini hilapahiua onangika. Ngohi togahoko de magiria hupaya Jou Koano namoteke ma Jou Ai behehongo; done mata-mata aha kairorahai, deʼ Jou koano aha koini tomaua.

²¹Mä nako Jou koano noluku nohidöaka ani diri, ma Jou wohi himatokoka okianaga aha idödadi.

²²O himatoko magoronaka gënanga ngohi tamake mata-mata o ngongoheka kao Yehuda makadato okahi yatatauru yahihupu o Babel ma koano ai popegaweika. Magogiriaka önanga imädagi önanga yo temo, ’Ma Koano iwï budioka ai hoba-hobata, deʼ önanga iwi kuaha. Oraha nënanga, ai l̄ou ihodoaka o pesekuku, önanga mata-mata imadohuku.’ ”

²³Ngohi tahetongoli, ”Ani hekata de ani ngohaka mata-mata aha yahihupu yaao o Babel manyawaika. Jou koano mahirete ma aha koini otanua. Jou koano o Babel ma koano aha wonitagoko, deʼ o kota nënanga yatuhuku yamata-mataka.”

²⁴De o Zedekia wohitemo, ”Kamoi ikaö de uha nahetongo nanga ade-ade nënanga, hupaya ani nyawa uha ibodito.

²⁵Nako o popegawe yoihene ngohi homa ade-adeoka dede ngona, önanga aha yoboa deʼ yoleha ngonaika mangale tongone nanga ade-ade. Onanga aha inijaji la initomaua ngona, nako ngona nohi jarita mata-mata onangika.

²⁶Nahetongo dika ngona nohibaja ngohi hupaya ngohi toni hidingotokaua ngona noma kilioroli o buika deʼ nohonenge dokengoka.”

²⁷Ipahaika itedekanua mata-mata o popegawe gënanga yoboa deʼ ihi leha-leha ngohino. Ngohi tahingahu onangika tahitotiaika hokä ma koano wohi hi popareta ngohino. De hoko gënanga önanga yakunua yodiai okianaga hababu komoiua ihioriki ma koano dede ngohi mia ade-ade.

²⁸ Ngohi kahirahi ihitumunguku o kadato malooa oka hiädono manga haturu yaora o Yerusalem.