Read Tobelo O YEREMIA 39 Bible Online

O YEREMIA 39 - Tobelo bible

O YEREMIA 39

¹O mede ngimoioka o taongo hiwo o Zedekia o Yehuda ma koano ai popareta, o Nebukadnezar o Babel ma koano de aitentara yopoparangi mata-mata yoboa deʼ yaparangi o Yerusalem.

²O wange hiwo o mede iatoka o taongo mangimoi de moi ma Koano Zedekia ai popareta, o kota mabebeno o mehele manga haturu yakilianga,

³deʼ o Yerusalem yaora. De mata-mata ma koano Babel ai popegawe yoboa deʼ yoiki yogogere o Ngorana i Lago-agomo i Kokorona ma Ngoranoka. Toönanga manga hidogoronaka yamake o Nergal Sarezer, o Samgar Nebo, o Sarsekim o kadato matau madol̄a manga haeke, o Nergal Sarezer Rabmag deʼ o kokapita mahomoa.

⁴Maöraha ma Koano Zedekia deʼ aitentara mata-mata yamake mata-mata idodädadi gënanga, önanga imahidailako yopiringana yödumutu o Yordan ma Wai o hutu gënanga dika. Onanga yanonu o ngekomo yatilakuru o kadato madumule, daha yohupu yanonu o ngorana ilago-agomo ma ngorana imadohangika hinoto o bebeno o mehele o ngïoka gënanga.

⁵Mä o Babel matentara yäginïki önanga deʼ iwitagoko o Zedekia o Yerikho matonaka irata-rataka. Deipaha ünanga iwi ao ma Koano Nebukadnezarika o Babel makotaka o Hamat madaeraka, daha iwihukumanga iwihohonenge.

⁶Makotaka gënanga ai ngoha-ngohaka yätoma ai himangoka, deʼ mata-mata o Yehuda mapopareta mapegawe-pegawe mayätoma.

⁷Genanga deiböto o Zedekia ai lako yatubalenge, daha iwi rante deʼ iwiao o Babel mabereraika.

⁸Maorahoka gënanga o Babel manyawa yatuhuku ma koano ai kadato deʼ o kawaha manga tau, de inoli yakilianga o Yerusalem mabebeno o mehele.

⁹Mabaha o kawaha kanagahi o kotaka, kamamoi hagala o nyawa yo oa-oaroka imahidogo o Babel manyawaika, o Nebukadnezar o Babel manga tentara mabaluhu wätoraka o Babelika.

¹⁰O hidukumoi o kawaha duru yomömihikini deʼ koiwa-iwa manga arata, yämal̄aika o Yehuda matonakoka de inoli yahidöaka o angguru madumule de o dumule mahomoa.

¹¹Ma Koano Nebukadnezar wïhulokoka o Nebuzaradan, aitentara manga baluhu, wohihupu o pareta hoko nënanga,

¹²”Nioiki niwilingiri o Yeremia, deʼ niwï goana ünanga nihidodiai. Uha okianaga nidiai unangika; niadiai okianaga wogö gaho-gahoko.”

¹³Hoʼ o Nebukadnezar kamamoi de ai kapita yahinoto, o Nebusyazban deʼ o Nergal-Sarezer de inoli mata-mata o Babel ma kokapita mahomoa,

¹⁴o kadato malooaka de ihi l̄ë ngohi. Daha ngohi ihi hilapahi o Gedalyaika o Ahikam aingohaka deʼ o Safan ai danongo, kokiani ihi ngotaka ngohi tolio ihihidodiai. De ngohi togogere o kawaha manga hidogoronaka.

¹⁵Maöraha ngohi ihi buika o kadato malooa okahi, ma Jou wohihuloko ngohi

¹⁶tahetongo o Ebed-Melekhika o Sudan manyawa gënanga ma Jou Duru Wokokuaha, o Israeloka manga Jou Madutu, wotemo hoko nënanga, ”Hokä Taheto-hetongoka mahira, Ngohi aha Todotagao o bodito o kotauku nënanga, deʼ koi sosanangiua. Ngona aha namake o hali gënanga idadi.

¹⁷Mä Ngohi, ma Jou, aha Tonï goana. Ngona koini hilapahiua o nyawa namö modo-modongika.

¹⁸Ngona aha koini tomaua, hababu Ngohi aha tonihihalamati ngona. Ani jiwa aha ihalamati karana ngona nomahinganono Ngohino. Ngohi ma Jou, totemo-temo.”