Read Tobelo O YEREMIA 4 Bible Online

O YEREMIA 4 - Tobelo bible

O YEREMIA 4

¹Ma Jou wätemo, ”O Israel manyawa, nako ngini nimau nimakilioro nilio Ngohino. Ihira niaumo hagala o gomanga Tö doha-dohata gënanga, deʼ nisatia Ngohino.

²Nako ngini nikoboto de Tongohi ahi romanga deʼ ngini niwango niahininga irikoto iadili deʼ itiai, done hagala o hoana deo berera aha yogahoko Ngohino hupaya Ta hibarakati önanga, deʼ önanga aha ihi higiriri Ngohi.”

³ Ma Jou wätemo o Yehuda deʼ o Yerusalem ma nyawaika, ”Niakarajanga niatonaka niakö karajangowahi; uha nihibarihi o gihihi o hihika iwango-wango mangï ika.

⁴Nia sö niajaji dede Ngohi, nia Jou, deʼ nihitingaka niadiri mangale Ngohi, hei o Yehuda deʼ o Yerusalem manyawa. Nako kowali, done Ani dohata aha ihebulu deʼ inïtuhuku hokä o uku de ngaro o nagunaoli ma wakunua wahohonenge. Mata-mata gënanga aha yatapalu niadiri karana hagala niamanarama madorou.”

⁵Niawuwu o trompet o berera yamode-modekika! Nipöaka nihi totararonika deʼ niakua-kuatil̄e. Niahuloko o Yehuda deʼ o Yerusalem manyawa yopiringana o kota-kotaika dema bebeno o meheloka.

⁶Niahimatoko o ngekomo o Sionika, ma Jou Ai doporono, itaiti nimahiditoko, uha kanima rirïdi. Ma Jou ma gogiriaka wodotagao o bodito deʼ o bodito ma amoko o koremieil̄e.

⁷Hokä o singa ihupu mangingiunino hoko genangoli imagorakoka yabobinaha o hoana deo berera yobö boa-boa yomau yabinaha o Yehuda. O Yehuda ma kota-kota aha idadi o rutuku o ngï yogogogerua o nyawa.

⁸Hababu gënanga niari deʼ nidodora, niapake o ngoere o karongo manonako niduka. Karana ma Jou Ai dohata itoka-tokara koitoruhowahi o Yehudaino.

⁹Ma Jou wato, ”O wange gënanga o kokoano deʼ yopopareta aha manga hininga mabuturungu itobiki; o imam-imam yohahara deʼ o nabi-nabi yatodokana.”

¹⁰Daha ngohi totemo, ”Jou Duru nokö Kurutil̄e, Ngona nätipuoka o Yehuda deʼ o Yerusalem manyawa! Ngona nato aha naga o dame, enahioko öraha nënanga miajiwa o oworo kaihi goa-goana.”

¹¹Maöraha aha iboa o Yehuda deʼ o Yerusalem manyawa yamake o abari o wange mahiwariha mahidal̄oko o tonaka i kokakahaino magogiria iwuwu madumutu onangika. O hidal̄oko gënanga o hidal̄oko biahaua duga-duga kaihi haili o afa,

¹²mä o hidal̄oko ikua-kuata iböboa-boa dema Jou Ai pareta mahirete la yägelenga o hukumanga Ai umatuku.

¹³Niamake, o haturu yoboa hokä o lobi. Manga kereta ihi poparangi hokä o hidal̄oko o taufani, hagala manga kuda iholoi isapati deo totaleo o rajawali. Uwee, ngone hobodito! Ngone hobinaha!

¹⁴Yerusalem, naumo o dorou anihiningaka hupaya ngona nohalamati. Hiädono muruonoka hagala anidibanga madorou gënanga nomau nagogono ani hininga magoronaka?

¹⁵O Dan makotaino, inoli o Efraim mal̄oku mabuturungino yoboaka o huhuloko-huhuloko yoao-ao o abari itotorou.

¹⁶Onanga yahidöaka o hohininga hagala o hoana deo berera deʼ ihingahu o Yerusalem ma nyawaika o haturu o berera magö gurutino magogiriaka yoboa. Onanga aha ihiböaka o parangi maböaka o Yehuda makota-kotaika

¹⁷deʼ ihi giloliti o Yerusalem hokä o nyawa yögoana o dumule. Mata-mata gënanga idadi karana o Yehuda manyawa yolawanoka ma Jouika. Ma Jou wotemoka.

¹⁸Yehuda, ngona mahirete nödotagao o bodito gënanga anidirika. Ani wowango madodagi deʼ ani manarama-manarama idadi o hababu mata-mata o huha deo hangihara gënanga yatohoko anihininga.

¹⁹Hokokia ahi hininga mahangihara, tatumungu takunokaua ngohi tamao o huha deo hangihara. Ngohi tapoaua ahi diri tomarirïdi ahi huo ihahara ahi alu mangunungu magoronaka, hababu toihene o trompet mailingi, deʼ o parangi maböaka igiloanga.

²⁰O bodito iboa yögogilio yawedere o berera yamode-modekika. Itodokanino ahi tau-tau yakilianga mangoere yakä kakihuku.

²¹Hiädono hokokia kokiani tahakihi o nyawa yoparangi imahohonenguku? Hiädono hokokia kokiani toihene o trompet mailingi ahingauku yatopongono?

²²Ma Jou wato, ”Duru yobodo Ahiumati gënanga, önanga ihinakoua Ngohi. Onanga hokä o ngoha-ngohaka yofuma-fuma kamahuhutulö ma koiwa manga mangarati; yosawaro o dorou magoronaka, okia-kiaua yanako o oa yodiai.”

²³Tohimeta o duniauku ahi lako yapulono tamake ihomoa deʼ ikakaha, tohimeta o dihangil̄e ngohi tomamataga uwee, koiwa o cahaya.

²⁴Tamake ol̄oku deʼ o doporono-doporono magögurutil̄e igiwi-giwi duru kahä kuata.

²⁵Tamake moiua o nyawa, o totaleo ma ihohoka mata-mata.

²⁶O tonaka maboburere idadi o tonaka makokakaha, hagala o kota ikilianga iwede-wederuku, karana ma Jou duru wängamo Ai umatika. (

²⁷Ma Jou wahetongo o dunia yamode-modekika aha idadi o tonaka ikokakaha, mä Unanga aha kowaboditoua duru mata-mata.)

²⁸O dunia aha iduka o dihanga duru ihuhutu. Ma Jou wotemoka deʼ aha koi ngaliua Ai datoro. Unanga wogelengaka maputuhu deʼ aha kaoaguru moiö woma dohukua.

²⁹Yoihene o gigoro imänere o kudauku yöbare-barene manga duduono deʼ yotoi-toimi, yadiai moi-moi o nyawa manga diri ihi oara yowomaha kama doa-döaka. Hagala o hongana önanga yongongohama o doporono helewo önanga yadoa. Mata-mata o kota kairidika, moiua yomau yögogeroli genangokadau.

³⁰Hei Yerusalem, ngona inimal̄aikaka deʼ okia-kiau yakunu nadiai! Mangale okia napake o baju madoka-dokara deʼ naporomu anidiri deo gurasi deo haaka, inoli anilako nohiehe madaro-daromo? Parasuma ngona nomapake nomahidodiaioka, hababu inïdora-dora iniolukoka ngona, maboboloioli önanga yomau ani jiwa yahohihanga.

³¹Ngohi toihene manga ilingi yokururihi hokä o ngoheka momau momagilianga; hokä o ngoheka o moholehe momagilianga ami ngohaka madodihiraka, hoko gënanga o Yerusalem iari mangomaha madoaka. Magiama itoa-toaka deʼ ënanga itaiana, ”Ngohi tobodito — ahi haturu yomau ngohi ihitoma!”