Read Tobelo O YEREMIA 40 Bible Online

O YEREMIA 40 - Tobelo bible

O YEREMIA 40

¹Ma Jou wohi temo-temo ngohino, o Nebukadnezar o tentara manga baluhu gënanga, ipahaino wohihibebasi ngohi o Rama mabereraka. Ngohi ihiao dokengika de ahi ranteoka kamamoi mata-mata o nyawa mahomoa o Yerusalem deʼ o Yehudaino magogiriaka yätoraka o Babelika hokä yatago-tagokino.

²De ipaha o tentara manga baluhu gënanga wohi ahoko ngohi mahirete deʼ wohitemo, ”Ma Jou ani Jou Madutu wagoharoka la iwedere o berera nënanga.

³Oraha nënanga o hali gënanga idadioka, karana ani hoana de ani berera yobaradohaoka deʼ ihingounua Unangika.

⁴Oraha nënanga tahohe o rante nënanga anigiamoka deʼ toni hibebasi ngona. Nako ngona nömodeke, ngona yakunu nonïki o Babelika, deʼ ngohi aha tonipaliara ngona. Mä nako ngona noluku, yadodoaua. O berera nënanga yamode-modekika ngona nobebasi okiaika dika ani mau ngona noiki.”

⁵Tosobouahi, o Nebukadnezar wohitemo, ”Nako nomau, ngona yakunu nolioli o Gedalyaika o Ahikam aingohaka deʼ o Safan ai danongo, wïgora-gorakoka o Babel manga koano wodadi o Yehuda ma kota-kota manga gubernur. Ngona yakunu nogogere dede ünanga o kawaha manga hidogoronaka ekola okiaikua dika noiki imoteke ani mau.” De ünanga wohihidöaka o inomo ahi bilaono deʼ o hadia ngohino, deʼ wohimal̄a ngohi toiki.

⁶Ngohi toiki o Gedalyaika o Mizpa mabereraka, deʼ togogere dede ünanga o kawaha manga hidogoronaka yämal̄a-mal̄aika o Yehuda mabereraka

⁷ O Babel manga koano wïgorakoka o Gedalya wodadi o gubernur o Yehuda mabereraka la wapareta mata-mata o nyawa kayo gögogerohi o Yehuda mabereraka, enagënanga hagala o nyawa duru yomömihikini. O Yehuda manga kokapita deʼ manga tentara imahidoa-doakowahi o Babelika, yoihene mangale iwï goraka o Gedalya gënanga.

⁸De o Ismael o Netanya aingohaka, o Yohanan o Kareah ai ngohaka, o Seraya o Tanhument aingohaka, deʼ o Efai o Netofaino ai ngoha-ngohaka, de inoli o Yezanya o Maakhaino yoiki de hagala toönanga manga nyawa o Gedalyaika o Mizpa mabereraka.

⁹O Gedalya wätemo onangika, ”Ngini ngarouha nihawana mangale nimahidöaka o Babel manyawaika. Nigögogere dika tongone nanga bereraka nënanga, deʼ nidadi o Babel manga koano ai gilaongo. Ngohi tohigoungu ngini aha nihalamati.

¹⁰Niö gogere hagala o kota ngini nio mau-mau, deʼ nimadoomu de inoli nimagogono o angguru, ohöhohoko deo zaitun maminya. Ngohi mahirete aha togogere o Mizpa mabereraka deʼ o kawaha tätagali nako hagala o Babel manyawa yoboino nenangino.”

¹¹Ihijai-jaino gënanga mata-mata o Israel manyawa naga o Moab, o Amon, o Edom mabereraka, deʼ o berera mahomoaka yoihene o Babel mabereraka, deʼ ünanga wïgorakoka o Gedalya wodadi magubernur.

¹²Mahababu gënanga önanga yamal̄a hagala o ngï kiaka önanga yahikokitingakoka, deʼ yolio o Yehuda mabereraika. Onanga yoboa o Gedalyaika o Mizpa mabereraka, deʼ imädoomu o angguru deʼ o hohoko duru kaha ngöe.

¹³Genanga de iböto, o Yohanan deʼ o kokapita imahidoa-doakua manga haturuika, yoboa o Gedalyaika o Mizpa mabereraka deʼ yato,

¹⁴”No hi orikoka o Baalis o Amon manga koano wïhulokoka o Ismael wonitoma ngona?” Mä o Gedalya ko wongakuua toönanga manga demoika.

¹⁵De wabole-boleil̄ë o Yohanan wïtemo o Gedalyaika, ”Kayaoa de ngohi toiki tïtoma o Ismael; kao nyawa moiö de aha koihiorikua o nagona iwitoma. Yadodoaho kokiani ünanga hï mal̄aika wonitoma ngona? Genanga mabaha mata-mata o Yehuda manyawa imatotoomuoka dede ngona nenangokadau, ima kokitingakoli, deʼ hali gënanga aha yabinaha mata-mata o kawaha mahou-houohi o Yehuda mabereraka.”

¹⁶Mä o Gedalya wïbaluhu, ”Uha! Nahö heto-hetongo mangale o Ismael gënanga koitiaiua!”