Read Tobelo O YEREMIA 41 Bible Online

O YEREMIA 41 - Tobelo bible

O YEREMIA 41

¹ O mede matumidoka o taongo gënanga o Ismael o Netanya ai ngohaka o Elisama ai danongo woiki kamamoi de yangimoi o Mizpa mabereraika la imakamake de o Gedalya. (O Ismael ganga o kokoano manga difauku womatengo o popareta makapita yokökurutil̄e.) Magogiriaka önanga mata-mata yol̄omo,

²o Ismael deʼ yangimoi gënanga yatauril̄e toönanga manga oworo deʼ iwitoma o Gedalya, magubernur iwi gora-gorakil̄e o Babel manyawa gënanga.

³O Ismael wätoma o Yehuda manyawa mata-mataö yororimoi deo Gedalya o Mizpa mabereraka deʼ mata-mata o Babel matentara yahidadaenino naga genangokadau.

⁴O wange moi ukuoli, ihira deo nyawa ihioriki o Gedalya iwitoma,

⁵yoboaino yamori tufange o Sikhem, o Silo deʼ o Samaria de yaino. Onanga yakorioka manga parahi, yakakihi manga pakeanga, deʼ yalui-luiti toönanga manga röehe. Onanga yoao o gandum deʼ o manyanyi la ihi huba ma Jou Ai Tauoka.

⁶De o Ismael wohupu o Mizpa de waino deʼ woiki imakamake dede önanga. Woariö, ünanga wätemo, ”Niaino hoiki hïlega o Gedalya.”

⁷Onanga ima hiadonika o kota mahidogoronaka demajapati, o Ismael de hagala ainyawa yomulaenge yatoma önanga. Mä yangimoi toönanga manga hidogoronaka iwitemo o Ismaelika, ”Uha nomï toma ngomi! Ngomi kademia gandum okahi rupa hinoto, o zaitun maminya deʼ o madu. Mata-mata ngomi mia gogono o kota ma poretoka.” Mahababu gënanga o Ismael wätomaua önanga, mä mahomoa wätoma deʼ toönanga manga maiyeti yaumo o humuku.

⁹O humu gënanga o humu ma ago-agomo ma koano Asa wodiai maoraha o Baesa o Israel manga koano wïparangi ünanga.

¹⁰De ipaha o Ismael wätagoko ma koano ai ngoha-ngohaka o ngoheka deʼ mata-mata kanagaohi o Mizpa mabereraka wahi lolapahioka o Nebukadnezar o Gedalya ai gogoanika. O Ismael wä tagoko önanga daha womä jobo dede önanga yödumutu o Amon madaeraika.

¹¹O Yohanan o Kareah aingohaka deʼ mata-mata o kokapita ima komoteke dede ünanga yoihene mangale o Ismael ai dorou.

¹²Done önanga imakomoteke de toönanga manga nyawa yoiki iwiginïki ünanga, deʼ ünanga iwimake o lupanga ma amo-amokoka o Gibeon mabereraka.

¹³Iwimake o Yohanan imakomoteke deo kokapita gënanga yoboa, o Ismael wätago-tagokino duru yomorene.

¹⁴De ima idulu deʼ yopiringana imakamake de o Yohanan ai dodiawo.

¹⁵Mä o Ismael deʼ yatufange ai dodiawo yootana deʼ ihi oara manga diri o Amon mabereraika.

¹⁶De ipaha o Yohanan deʼ ai kokapita yatoomu hagala aitentara, o ngongoheka, o ngoha-ngohaka, deʼ o kadato mapopegawe wätago-tagoko o Ismael ipahaino wïtoma Gedalya.

¹⁷Onanga mata-mata Yamodongo o Babel manyawaika, mahababu o Ismael wïtomaka o Gedalya o Babel manga koano wï gora-gorakoka wodadi magubernur o bereraka gënanga. Hoʼ, önanga yopiringana o Mesir mabereraika. Manga dodagi magoronaka imatogumu o Kimham mabereraka imahi tigi-tigika o Betlehemika.