Read Tobelo O YEREMIA 42 Bible Online

O YEREMIA 42 - Tobelo bible

O YEREMIA 42

¹Genanga de iböto o nyawa mata-mata, yolago-agomo deyo alu-aluhu, imakomoteke deo kokapita, deo Yohanan o Kareah aingohaka deʼ o Azarya o Hosaya aingohaka yaino ngohino deʼ yotemo.

²”Bapa, hokä Bapa namake mahirete, ngomi nënanga kahuruonino mia ngöe, öraha nënanga mahou kamia muhutulokahi. Ngomi migahoko Bapa nomau nomäniata mangale o Jou Madutuika nihuba-huba Bapa. Nomi hihubayanga ngomi mahou-houohi nënanga,

³hupaya o Jou Jou Madutu womihimatoko ngomino okiaika ngomi mioiki deʼ okia kokiani ngomi miadiai.”

⁴Ngohi tohaluhu, ”Kayaoa nako hoko gënanga. Ngohi tatarima niagogahoko gënanga. Ngohi aha tomä niata ma Jou tongone nanga Jou Madutuika, deʼ okia dika Ai bobaluhu, aha tohingahu mata-mata, kamoiö ma aha kotinï ngiunua nginika.”

⁵Onanga ihitemo ngohino, ”Ngomi migahoko Bapa nomä niata ma Jou nanga Jou Madutuika, mahababu ngomi mimau mihingounu Unangika, hupaya ngomi midadi yaoali. Hoʼ yaoa-oa ekola yatotorou ma Jou Ai behehongo gënanga, ngomi aha miamoteke. Mal̄aikala ma Jou wodadi o hakihi Woriko-rikoto deʼ Wosatia ngomino, nako ngomi miamotekua Ai pareta mata-mata ma Jou wohidoa-döaka ngomino Wohingahu-ngahu Bapa.”

⁷O wange ngimoi ipahaika ma Jou wohi temo-temo ngohino.

⁸De ngohi tïahoko o Yohanan de inoli ai kokapita deʼ mata-mata o nyawa mahomoa yaino-ino dede ünanga.

⁹Ngohi tätemo onangika, ”Ngohi nihihuloko tohiadono nia gogahoko ma Jouika, o Israel manga Jou Madutu. Aa, ma Jou wato,

¹⁰’Nako ngini nimau kahirahi nigogere o bereraka nënanga, Ngohi aha tinïgoraka ngini, koini otakua; Ngohi aha tinï okoil̄e ngini, konirubaua. Ngohi duru ahi hininga ihuha mahababu tinï dotagaoka o bodito nginiuku.

¹¹Uha niwï modongo o Babel manga koanoika gënanga. Ngohi naga niahidogoronaka la tiniriwo tinïlapahi ngini ai kuahaino.

¹²Karana Ngohi tinï dora de tinï hayangi nginika, Ngohi aha tadiai o Babel manga koano winï dora ngini deʼ wini higumal̄a ngini nilio. Ngohi, ma Jou, totemoka.’ ”

¹³Mä ngini kanigö gogerohi o Yehuda mabereraka, uha niwi lawani ma Jou Madutuika deʼ uha nitemo, ”Ngomi mioluku migogere o bereraka nënanga. Ngomi mimau mioiki o Mesirika deʼ migogere o bereraka gënanga. Dokengoka ngomi miamakeokaua o parangi, komiihenua o trompet mailingi yoahoko la yoparangi, deʼ miamaoua o hahini.” Nako ngini niahininga nitogowini la nioiki o Mesirika deʼ nigogere dokengoka, nënanga doka ma Jou Duru Wokokuaha o Israel manga Jou Madutu Ai behehongo, nginika:

¹⁶”O parangi deʼ o habirokata ngini nio modo-modongo gënanga iniginïki ngini hiädono o Mesirika, deʼ ngini aha nihonenge o bereraka gënanga.

¹⁷Mata-mata o nyawa imatotogowini la yoiki o Mesirika deʼ yogogere dokengoka aha yohonenge o parangi magoronaka, ekola yohonenge mahababu o habirokata ekola o bobaku o panyake. Ka o nyawa moiö ma aha koyootanua deo bodito aha Tadö dotagao onanguku; mata-mata aha yohonenge.

¹⁸Hokä sarakia Ngohi, ma Jou o Israel manga Jou Madutu tädogopoa ahi dohata deʼ Ahi gangamo o Yerusalem manyawauku, hoko genangoli aha Takopoa Ahi dohata nginiuku nioi-oiki o Mesir matonakika. O nyawa aha yaporohono inïmake ngini, ngini aha ini hikauku, deʼ niaromanga aha yapake hokä o lolai. Ngini aha ko nia makeokaua nia berera madutu.”

¹⁹Daha ngohi tätemoli, ”Ma Jou wini hiparetaka hupaya ngini mahou-houohi o Yehuda mabereraka uha nioiki o Mesirika. Mahababu gënanga öraha nënanga ngohi tinihidöaka o hohininga

²⁰ngini niadiaioka moi o howono malago-agomo. Ngini ni gahoko hupaya ngohi tomä niata ma Jou tongone nanga Jou Madutuika mangale ngini, deʼ ngini nijaji la niadiai mata-mata ma Jou wahö heto-hetongo.

²¹Oraha nënanga ngohi tohiadonoka ma Jou nanga Jou Madutu Ai behehongo nginika, mä ngini nioluku niamoteke o behehongo gënanga.

²²Hababu gënanga, nio hohininga; o berera ngini nio igo-igo niadono la nigogere gënanga, ngini aha nihonenge o parangi magoronaka, ekola karana o habirokata ekola o bobaku o panyake.”