Read Tobelo O YEREMIA 43 Bible Online

O YEREMIA 43 - Tobelo bible

O YEREMIA 43

¹Ma Jou o Israel manga Jou Madutu Ai behehongo, kokiani tohiadono o kawahaika mata-mata.

²De o Azarya o Hosaya aingohaka deʼ o Yohanan o Koreah aingohaka de inoli mata-mata o nyawa mahomoa ima ede-edenge gënanga ihitemo ngohino, ”Ngona noeluku ma Jou tongomi mia Jou Madutu wonihulokua ngona nomï duhunu ngomi mangale mioiki migogere o Mesir matonakoka.

³O Barukh o Neria aingohaka gënanga wonidoduhuloko ngona la nomïlawani ngomi, hupaya o Babel manyawa imikuaha ngomi deʼ yakunu imïtoma ekola imïtoraka ngomi o Babelika.”

⁴Kayaoa o Yohanan kayaoa mata-mata o kokapita deʼ o kawaha yoluku yamoteke ma Jou Ai pareta la yogogere o Yehuda matonakoka.

⁵ O Yohanan deʼ mata-mata o kokapita gënanga yä ao o Mesirika moi-moi o nyawa kao Yehuda maberera okahi, mata-mata o nyawa yolio-lioka o berera mahomoaka de yaino manga ngï yahigerewoto.

⁶O nau-nauru, o ngongoheka, o ngoha-ngohaka, deʼ ma koano ai ngoha-ngohaka o ngoheka o Nebuzaradan wahilolapahi o Gedalya ai gogoanika, midogoika ngohi deʼ o Barukh, mata-mata imï ao-ao o Mesirika.

⁷Onanga yalawani ma Jou Ai pareta, deʼ yoiki o Mesirika hiädono imatero magurutika deo Tahpanhes makota.

⁸Dokengoka ma Jou wohitemo ngohino,

⁹”Na l̄ë o helewo ma ago-agomo, deʼ nohibaiti o tonakuku o kota gënanga mapopareta matau ma amo-amoko mangorana yowoha-wohama mahimanguku. Nohidailako hupaya o Yehuda manyawa inimake ngona nadiai o hali gënanga.

¹⁰Daha nahetongo onangika, Ngohi, ma Jou Duru Tokokuaha, Israel manga Jou Madutu, aha tinidotagao Ahi gilaongo ma Nebukadnezar o Babel ma koano, o ngï ika gënanga. Deʼ o helewo nohibai-baitoka o tonakuku gënanga mal̄okuoka, ünanga aha wohigoko ai popareta makuruhi inoli wohihohe to ünanga ai popareta matau-tau.

¹¹Ma Nebukadnezar aha woboa deʼ wahohihanga o Mesir. Deʼ hagala o nyawa tohi tantuoka la yohonenge mahababu o panyake aha yohonenge mahababu o bobaku o panyake. Onanga tohitantu oka la yätoraka hokä yatago-tagokino aha yätoraka hokä ya tago-tagokino, deʼ tohito tantuoka yohonenge o parangi magoronaka aha yohonenge o parangi magoronaka.

¹²Ngohi aha tatoka-tokarile o uku o Mesir manga gikiri mapupuji matauoka deʼ o Babel ma koano aha watuhuku hagala o gomanga madulada mapupuji matauoka gënanga ekola watoraka ai bereraika. Hokä womatengo o aiwani magogoana watebini o gani ai bajuoka, hoko genangö o Babel ma koano aha wa hehara o Mesir watebi-tebini daha womagorakoli de moiua naga iwi ruae.

¹³Hagala o gomanga matugu o Heliopolis mabereraka o Mesir matonakoka, aha yawedere, deʼ o Mesir manga gikiri mapupuji matau aha yatuhuku yamata-mataka.”