Read Tobelo O YEREMIA 44 Bible Online

O YEREMIA 44 - Tobelo bible

O YEREMIA 44

¹Ma Jou wohitemo ngohino yakorona mata-mata o Israel manyawa yogögogere o Mesir matonakoka, enagënanga o Migdal, Tahpanhes, o Memfis makotaka, deʼ madaera o koreharail̄ë.

²Nenanga ma Jou Duru Wokokuaha, o Israel manga Jou Madutu ai behehongo, onangika, ”Ngini mahirete niahakihioka o bodito Tohitotapal̄u o Yerusalemuku deʼ mata-mata o kota mahomoa o Yehuda mabereraka. Hiädono öraha nenangö hagala o kota gënanga kama ngederohi moiua yögogere.

³O hali gënanga imadadi mahababu yogögogere yobaradoha, hiädono yodiai Ngohi tongamo. Onanga ihihuba o huhuba deʼ yopuji hagala o gikirika komaiwa önanga mahirete yahuba, ngini ekola nia ete de nia tohora.

⁴Ngohi koitogu-togumua Tahidingoto nginika o nabi-nabi Ahi gogilaongo, yäduhu-duhunu önanga yadiai o dorou Todoha-dohata gënanga.

⁵Mä ngini nioluku nihigihene nioluku niohohininga. Ngini nioluku nimatogumu nidiai o dorou, enagënanga nihihuba o huhuba hagala o gikirika.

⁶Mahababu gënanga Ngohi todogopoa Ahi dohata deʼ Ahi muruka o Yehuda makotauku deʼ o Yerusalem mangeko-ngekomuku. Mata-mata Tatuhuku hiädono imadadi kamagogilianga deʼ kao tonaka madoongoro hokä niamake-make öraha nënanga.

⁷Deʼ öraha nënanga Ngohi, ma Jou Duru Tokokuaha, o Israeloka manga Jou Madutu, toleha yadodoaho ngini niadiai o hali ini dödotagao o bodito ilago-agomo nia diriuku. Yadodoaho ngini nimau niabinaha mata-mata — o nau-nauru, o ngongoheka, o ngoha-ngohaka, deʼ o ngohaka magil̄au — hiädono nia hoanino komoiokaua yogögogere?

⁸Yadodoaho niadiai hagala o hali yadodiai Ngohi tongamo? Ngini niaino deʼ nigogere o Mesir mabereraka, o berera niabobiahaua gënanga, daha ngini niahuba o gomanga deʼ nihihuba o huhuba o berera gënanga magiki-gikirika! Yadodoaho ngini nimau niawedere niadiri mahirete hupaya ngini inihikauku hagala o hoana deo berera o duniaka deʼ nia romanga yapake hokä o lolai?

⁹Ngini ini wohangoka mata-mata o dorou o Yehuda matonakoka deo Yerusalem makota mangeko-ngekomika, yadodiai nia ete de nia tohora, o Yehuda ma kokoano deʼ toönanga manga heka-hekata, inoli ngini deʼ tingini nia heka-hekata?

¹⁰Mä hiädono o wange nënanga ngini niadiri nihitipokoukua. Ngini nihihoromatiua Ngohi deʼ niwangoua o tita Tohi doa-doakoka nginika deʼ nia ete de nia tohoraika.

¹¹Hababu gënanga, Ngohi, ma Jou Duru Tokokuaha, o Israeloka manga Jou Madutu, aha tinïlawani ngini deʼ tawedere o Yehuda yamode-modekika.

¹²Deʼ nako o Yehudaino manyawa mahouohi kahirahi yöigo yoiki o Mesirika la yogogere dokengoka, önanga aha yobinaha mata-mata. Onanga mata-mata, yo lago-agomo de yohohumujuru, aha yohonenge o Mesir matonakoka o parangi magoronaka ekola mahababu o habirokata. O nyawa aha yamao yäporohono yämake önanga deʼ aha önanga yähikauku. Toönanga manga romanga aha yapake hokä o lolai.

¹³Hokä Ngohi tahukumu o Yerusalem, hoko genangoli aha Tä hukumu önanga yogö gogere o Mesir matonakoka. Onanga aha yohonenge o parangi magoronaka, mahababu o habirokata ekola o babaku o panyake.

¹⁴O Yehuda manyawa mahou-houohi yoi-yoikoka o Mesirika la yogogere dokengoka, kao nyawa moiö ma onangino aha koyolioua o Yehudaika, ngaroko o hali gënanga önanga duru yönahihu. I goungu, moiua aha yolio sawaliua yamuruono naga imahidö dito-ditokino.”

¹⁵De yoboaino ngohino duru kamanga ngöe, enagënanga mata-mata o nau-nauru ihiö ori-oriki manga hekata ihihuba o huhuba o gikirika, deʼ mata-mata o ngoheka magogiriaka ima okoino genangokadau, yängohamika o Israel manyawa yogögogere o Patros mabereraka, o Mesir o koreharail̄ë idaduoka. Onanga ihitemo ngohino,

¹⁶”Ngomi mioluku mi ihene okianaga nahö heto-hetongo ngomino de ma Jou Ai romanga.

¹⁷Hagala ngomi mijäjajioka, aha ngomi kamiadiai. Ngomi aha kahirahi mihihuba o huhuba o Horoga ma Koano o ngohekaika, deʼ mia uhe o angguru mateongo hokä o huhuba munangika hokä o biaha yadodiai tongomi mia ete de mia tohora o Yehuda makotaka deʼ o Yerusalem ma ngeko-ngekomoka, mia kokoano de tongomi mia popareta mapopegawe inoli ngomi mahirete. Maorahoka gënanga ngomi miainomo imiwedono, ngomi misanangi okiaua mikuranga, miahuha okia-kiaua.

¹⁸Mä ka dengomi mimatogumu mihihuba o huhuba o Horoga ma Koano o ngohekaika deʼ miuhe okaua o angguru hokä o huhuba munangika, ngomi mikuranga hagala mata-mata; tongomi mia nyawa yohonenge o parangi magoronaka ekola mahababu o habirokata.”

¹⁹De ipaha o ngongoheka gënanga yotemo, ”Tongomi miarokata kayö modeke ngomi miharongo o roti madüku o Horoga ma Koano o ngoheka deʼ miatuhuku o huhuba inoli mihihuba o angguru mangale tongomi mia gikiri gënanga.”

²⁰Mata-mata o nau-nauru deʼ o ngohekaika yohöhalu-haluhu hoko gënanga, ngohi totemo,

²¹”Boteka ngini niatobote ma Jou wohiorikua ekola niawohangoka o huhuba-huhuba nihihö huba-huba nia ete de nia tohora o Yehuda makotaka deʼ o Yerusalem mangekomoka, niakokoano deʼ niapopareta mapegawe-pegawe, inoli o kawaha o bereraka nënanga deʼ nginimahirete?

²²Ma Jou wapoaokaua winïlega-lega ngini nihihuba o huhuba hagala o gikiri mahomoa. Niamanarama gënanga itorou deʼ ipeseke, Ngini nibaradohaka ma Jouika deʼ nihingounua hagala Ai paretaika. Hababu gënanga öraha nënanga dika niaberera iwederoka hiädono yakunokaua niogogere, deʼ maromanga yapake hokä o lolai. O nyawa yapulo-pulono yamao yaporohono.”

²⁴Daha ngohi tahingahu o nyawa mata-mataika gënanga, maboboloi manga ngongoheka, ma Jou Duru Wokokuaha wotemo hoko nënanga hagala o Yehuda manyawaika yogögogere o Mesir matonakoka, ”Ngini de nia heka-hekata nikobotoka o Horoga ma Koano o ngohekaika ngini aha niatuhuku o huhuba deʼ nihihuba o angguru mateongo enangika. Niajaji gënanga niaganapuoka. Hoʼ kayaoa! Niadiai dika naga nijäjajioka gënanga.

²⁶Mä öraha nënanga ni ihene okianaga taheto-hetongo nginika, hei Israel manyawa o Mesir matonakoka: Ngohi, ma Jou, tokoboto de Ahi romanga imomulia ngini Tinihigumal̄aokaua niapake Ahi romanga mangale nidiai moiani o jaji. Ngini yakunua nitemo, ’Ngohi tokoboto de ma Jou Madutu wowango-wango!ʼ

²⁷Ngohi aha tohidailako hupaya ngini nibodito deʼ nisanangiua, hiädono ngini nihonenge mata-mata, kayaoa o parangi magoronaka kayaoa karana o bobaku o panyake.

²⁸Duga-duga yamuruono naga dika aha yohalamati deʼ o Mesir matonakoka de yolio o Yehudaika. De mata-mata o Yehuda manyawa naga o Mesir matonakoka aha yamake boteka toönanga manga demo ekola to Ngohi ahi demo imahi nyatauku.

²⁹Ngohi aha tinïdotagao o bodito nginiuku o ngï oka nënanga la ihinyata igoungu nginika o hukumanga Tödato-datoroka mangale ngini igou-goungu idadi.

³⁰ O Hofra o Mesir ma koano aha tihilapahi hagala ai haturuika yöigo-igo iwitoma, imatero hokä Ngohi tihilapahi o Zedekia ma Nebukadnezar o Babel ma koanoika, ai haturu wömau-mau wïtoma gënanga.”