Read Tobelo O YEREMIA 45 Bible Online

O YEREMIA 45 - Tobelo bible

O YEREMIA 45

¹ O taongo maiatoka o Yoyakim o Yosia aingohaka wopareta o Yehuda mabereraka, o Barukh watulihi okianaga tï beto-betongo unangika. De aha ngohi tohiadono unangika ma Jou, o Israel manga Jou Madutu Ai demo.

²Ma Jou wïtemo ”Barukh,

³ngona notaiana hoko nënanga, ’Aa, igoungu ngohi nënanga tosoe! Ahi huha de ahi kuranga duru iwöe, deʼ ma Jou kawö dogoli ahi huha de ahi hangihara. Ngohi totaiana ihiboleoka, hakali-kali koiwa ahisanangi!ʼ

⁴Hei Barukh! Ngohi, ma Jou, magogiriaka takilianga Tohigoko-gokoka, deʼ magogiriaka tarahuku Tadato-datomoka. O dunia yamode-modekika Tadiai hoko gënanga.

⁵Yadodoaho ngona nöigo nohihiakunu? Uha hoko gënanga, Barukh! Yongodumu o nyawa Tähukumu deo bodito, mä ngonaika, makuranguku ngona aha nohalamati. Ngaroko okiaika noiki ngona aha kahirahi nowango. Ngohi, ma Jou totemoka.”