Read Tobelo O YEREMIA 46 Bible Online

O YEREMIA 46 - Tobelo bible

O YEREMIA 46

¹Ma Jou wohitemo ngohino mangale o hoana deo berera ilago-agomo,

² imulaenge de o Mesir. Unanga wohingahu ngohino mangale o Nebukadnezar o Babel ma koano wahohininga o Nekho o Mesir ma koano aitentara o Karkemis imahitigi-tigika o Efrat mangairika o taongo maiatoka o Yoyakim o Yehuda ma koano wopareta. Nenanga doka waho heto-hetongo ma Jou mangale hagala o hali gënanga,

³”O Mesir manga kokapita ihiböaka yakua-kuatil̄e yopöaka manga tentara maduduonika imahidiai, ’Niatol̄omo o kuama! Nimahinoa niabaju o behi deʼ niasapeo o waja! Nihidiaino niadadatoko de nïwohama o duduonika! Ngini, o kuda niobare-barene, nihidiai niagogogere! Niö barene niakuda, nioiki nitagi niparangi!ʼ

⁵Mä Ngohi, ma Jou, Tämake önanga imadohuku kayohawa-hawanika. Toönanga manga tentara yohihanga, deʼ yopiringana kayohawa-hawanika koima legaua manga poretoka.

⁶Yopopilipere imangakunua yopiringana, deʼ yonau-nauru yakunua yootana manga haturuino. Onanga yopeleke deʼ yoruba o koremieuku, o Efrat ma Ngairi madatekoka gënanga.

⁷Unanga o naguna wodö doa-doa hokä o Nil ma Ngairi ma akere, hokä o Ngairi yönguihi madate-datekino? Genanga o Mesir maberera. Unanga wato, ’Ngohi aha tomomiki toma okoino deʼ takuaha o dunia. Aha Tabinaha hagala o kota inoli yogögogere.

⁹Hei kuda, nirorebe! Hei kereta, nimakelu. Nitagi nia himangika, hei ninau-nauru o dadatoko niao-ao o Sudan deʼ o Libiaino. Nginiö, hei nisosawaro nitoimi o Lidia mabereraino.’ ”

¹⁰Mä ngohi, o Yeremia totemo nënanga doka ma Jou o Jou Madutu Duru Wokokurutil̄e deʼ Duru Wokokuaha; o wange gënanga Unanga wodiai o balahi Ai haturuika mata-mata. Ai oworo aha yäol̄omo önanga hiadono yäpunuhu, deʼ yaokere toönanga manga awunu hiädono yäkihounu. O wange nënanga ma Jou Duru Wokokuaha, watoaka hagala Ai huhuba o koremieuku, o Efrat ma Ngairi gënanga madatekoka.

¹¹Hei o Mesir nigögogere, nioiki o Gileadika la nilingiri o houru! Mä, ngaroko hoko gënanga koiwa o houru yakunu ini hitogumu ngini.

¹²Nia kiahonanga dema mal̄e-mal̄ekoka ihiorikoka hagala o hoana deo berera. Nia böaka yogihenoka o dunia mata-mataika. O pajuretoko imake peleke moi de moika, kamamoi önanga yo ruba yomotumu o tonakuku.

¹³ Maöraha o Nebukadnezar o Babel ma koano woboa waparangi o Mesir, ma Jou wohitemo ngohino, Wato,

¹⁴”Yeremia, nohingahu o abari madohanga nënanga o Mesir makota-kotaika, enagënanga o Memfis, o Migdol deʼ o Tahpanhes makotaka, ’Nima hidiaino niöriwo niadiri hababu mata-mata okianaga nginioka aha yabinaha o parangi magoronaka!

¹⁵Yadodoaho o Apis, niagikiri ikökua-kuata gënanga i piringanoka? Karana ma Jou wahohihanga ënanga!ʼ

¹⁶Manga ngöe niatentara yopeleke deʼ yoruba. Onanga imaketemo moi de moika, ’Niaino holio nanga hoana de nanga bereraika hupaya ngone yakunu hootana nanga haturu manga oworino.’

¹⁷Nihidöaka o romanga mahungi ma koano Mesir, ’Ma tobagigoro wohigogule o öraha maoa.’

¹⁸Ngohi ma Jou Madutu Towango-wango, Ngohi o koano, o Jou Duru Wokokuaha. Hokä o Tabor mal̄oku ituboil̄e hagala ol̄oku mahidogorona il̄e, deʼ o Karmel mal̄oku ituboil̄e o ngöto mal̄okuino, hoko gënanga to ünanga ai kuata waino-ino woni parangi ngona.

¹⁹Nima hidiaino, nigögogere o Mesir, la inïtagoko deʼ inïao. O Memfis aha kamangedere — o ngï kairïdika mahababu moiua yögogere.

²⁰O Mesir hokä o hapi mangohaka maboburere, mä o guhuru i pako-pako o koremieil̄e yaburakiti.

²¹Maboboloi manga tentara imä hewa-hewaino koima ngakunua hokä o hapi mangohaka iburereholi. Onanga yakunua imä riwo. Mata-mata imaidulu deʼ yopiringana hupaya yohalamati. O hukumanga mawange imahiadonoka onangika; maoraha yadonoka önanga yätapal̄u obodito.

²²O Mesir ihioara manga diri kayo haga-haga hokä o dodiha mahababu manga haturu manga tentara kayotigi monga. Onanga yaparangi ënanga deo bahuku hokä o nyawa yotol̄anga o gota mautu

²³deʼ yatoongoro o hongana irubu-rubu yatotara yakunua. Manga haturu manga tentara duru kamanga ngöe, iholoi iwöe deo kahoho. Ngohi ma Jou totemo.

²⁴O Mesir yogögogere aha yämal̄eke, hababu yähohihanga o hoana deo berera o koremieil̄e. Ngohi, ma Jou, totemoka.”

²⁵Ma Jou Duru Wokokuaha, o Israel manga Jou Madutu, wotemo, ”Ngohi aha tahukumu o Amon, o gikiri o Tebeino, kamamoi deo Mesir yamode-modekika de hagala manga gikiri deʼ manga kokoano. O Mesir ma koano deʼ mata-mata o nyawa iwingamo-ngamo ünanga

²⁶aha Tahilapahi ma Nebukadnezarika o Babel ma koano de aitentara yomau-mau yätoma önanga. Mä deipaha, o Mesir aha yögogeroli hokä mahiraoli. Ngohi, ma Jou, totemoka.”

²⁷ ”Ahi umati, Israel, uha nihawana! Ahi gilaongo o Yakub, uha kanoma hidahahuruku! Ngini de nia difauku aha Tahihalamati o berera magogurutino, o ngï ngini initagokino. Ngini aha nilio deʼ nigogere nia bereraka nimasosanangi. Ngini aha niwango nirirïdi; koiwa naga iparalu ngini niö modongo.

²⁸Hoʼ uha nihawana, hei Ahi umati Ngohi aha toboa la tinihihalamati ngini. O hoana deo berera ilago-agomo o ngï ngini inihi kokitingakika, mata-mata aha Tabinaha, mä ngini Tini hidiaiua hoko gënanga. Itiai ngini aha inï otanua hukumanga mä Ahi hukumanga nginika ganga iadili imamoteke de ihi tötantu. Ngohi, ma Jou totemoka.”