Read Tobelo O YEREMIA 48 Bible Online

O YEREMIA 48 - Tobelo bible

O YEREMIA 48

¹ Nenanga doka wahö heto-hetongo ma Jou Duru Wokokuaha, o Israel manga Jou Madutu mangale o Moab, ”Yobodito o Nebo yogögogere, makota irubaka! O Kiryataim yaora, deʼ mabebeno o mehele ikökua-kuata yawedere, hiädono yogögogere yämal̄eke;

²ihihanga o Moab ima hiamo-amoko. Manga haturu yaoraka o Hesybon deʼ dokengoka önanga yödatoro layanohihanga o Moab manyawa mata-mata. Hagala o ilingi o Madmen makotaka aha imatogumu, hababu o kota gënanga aha yaparangi o tentara.

³Ni ihene! O Horonaim manyawa yopöaka, ’O binaha! O bodito!ʼ

⁴O Moab ibinahaka! Mangohaka mahohumujuru manga böaka hiädono o Zoarika.

⁵Ni ihene o gari mailingi o ngekomika idoa o Luhitil̄e, deo dodora mailingi o ngekomika iuti o Horonaimuku.

⁶Onanga yato, ’Itiai! Nohihalamati nia jiwa! Hopiringana hokä o keledai ihühuhuku o tonaka ikokakahaka!ʼ

⁷Moab! Ngona nangaku anibilipere deʼ ani kaya. Maöraha nënanga ngona mahirete aha inihohihanga. O Kamos, anigikiri, kamamoi dema imam-imam deʼ mapopegawe aha yätoraka o tabuanga mangï ika.

⁸Mata-mata niakota aha iwedere, kamoiö maya otanua. O Wai deʼ o tonaka irata mata-mata ibinaha, Ngohi, ma Jou totemoka.

⁹Nihigoko o jere mahelewo mangale o Moab, hababu itedekanokaua o berera gënanga aha ibinaha mata-mataika. Ma kota-kota aha iruba deʼ kao nyawa moiö makoyö gogerua dokengoka.”

¹⁰Yobodito o nyawa yododiaiua manga manarama ma Jouino yagou-goungu. Wobodito ünanga wataurua aioworo deʼ wotoma.

¹¹Ma Jou wato, ”Kahuruoninohi o Moab yowango yosanangi. Komaiwahi ënanga yätoraka o tabuanga mangï ika. Enanga hokä o anguuru ma akere yamal̄aika itokoruku deʼ komaiwa yauhe o angguru mangï mahomoauku. Ma angguru kai jameohi deʼ mabounu kai hemorohi.

¹²Mä aha maoraha iboa ngohi tohuloko hupaya o Moab yauhe hokä o angguru, deʼ mangï yahomoa deʼ yapooteke.

¹³O Moab aha yosanangiua o Kamosika, toönanga manga gikiri, imatero hokä o Israel manyawa yosanangiua o Bethelika önanga yangö ngaku-ngaku gënanga.

¹⁴Sarakia yakunua o Moab manau-nauru yobarani yotemo, ’Ngomi minauru, o tentara mipoputurungu imi uji-ujioka o parangi magoronaka?ʼ

¹⁵O Moab deʼ to ënanga makota-kota yawederoka, deʼ magogoduru maoa-oa yatomaka. Ngohi totemoka. Ngohi ma koano, ma Jou Duru Tokokuaha.

¹⁶O bodito mangale o Moab o ngoranoka yainoka, i tedekanokaua ënanga iwedere.

¹⁷Hei ngini hagala o negara nimakokadateke de o Moab nihioriki ënanga kayaheto-hetongo, niapake o huha mapakeanga mangale ënanga! Niahetongo, ’O Moab ikuaha okaua, makabaharanga deʼ makuata ihihangoka!ʼ

¹⁸Hei o Dibon nigögogere, niuti nia ngï dema hö horomatioka de niuti; nigogeruku o tonakoka deʼ o kota mal̄okuoka. Mahababu yakokilianga o Moab aniberera imahiadonoka, deʼ aha yawedere anidadatoko o mehele mata-mata.

¹⁹Ngini nigögogere o Aroer mabereraka, nima okoino o ngekomo madatekoka deʼ niatailako nihidodiai! Nileha onangika ihi oa-oara manga diri, deʼ yootana, ’Okia idädadioka?ʼ

²⁰Onanga aha yohaluhu, ’O Moab iotakoka deʼ okia-kiakaua yadaene, mahababu gënanga niogari ënanga. Nihingangahu o Arnon ma Ngairi magurutu o Moab iwedere.’ ”

²¹”O hukumanga yogelengaka hagala o kotauku o tonaka irata-rata ikökurutil̄e madaeraka: o Holonuku, o Yahas, o Mefaat,

²²o Dibon, o Nebo, o Bet-Diblataim,

²³o Kiryataim, o Bet-Gamul, o Bet-Meon,

²⁴o Keriot, deʼ o Bozra. Mata-mata o Moab makota, itigi-tigino deʼ ikökurutika, yahukumoka.

²⁵O Moab makuata itobikoka, deʼ makuaha yawederoka. Ngohi, ma Jou, totemoka.”

²⁶Ma Jou wotemo, ”Niadiai o Moab yädaluku, karana ënanga ihide edenge Ngohino. Enanga aha imahilulu ma ngunangika deʼ o nyawa yogogiete.

²⁷Koigoungua mahiraino o Moab manyawa yä gogietoka o Israel manyawa deʼ yafitana hokä yahidatagoko kamamoi de yotohi-tohiki?

²⁸Ngini nigögogere o Moab, niamal̄a hagala niakota deʼ nigogere o doporono ihohelewo hokä o totaleo o namodara imädiai maigutu o bako-bakorika.

²⁹Ngini duru niedenge! Ngohi toihenoka hokokia nia edenge, niahininga ikurutil̄e, niamao nisawaro, deʼ duru niedenge ngini!

³⁰Ngohi, ma Jou, tohioriki niaedenge. Nia demo-demo kaohomoa, deʼ niamanarama okiaua yadaene.

³¹Hababu gënanga Ngohi aha toari toma kua-kuatil̄e mangale ngini mata-mata deʼ mangale hagala o nyawa o Kir-Heres mabereraka, niaberera matiti.

³²Ngohi aha iholoi tögari o Sibma makota hokä o angguru hadato-datomo hagala majaga-jaga imahohe hiädono o Honenge ma Ngöto mahonongaika imatero magurutika de o Yaezer. Mä öraha nënanga o ngogoro mahohoko deʼ ma angguru mahohoko yabinahaka.

³³O morene maulili dema hagaga o Moab maberera iboburereoka ihihangoka. Ngohi tadiai o angguru ma akere ihahurokaua madedeoino; moiokaua o nyawa yododiai o angguru deʼ youlili yomorene.

³⁴O nyawa o Hesybon deʼ o Eleale mabereraka yoari deʼ manga gari yoihene hiädono o Yahas mabereraika, deʼ yoihenoli o Zoarino manyawa hiädono o Horonaimika deʼ o Eglat-Selisiaika. Onanga yoari karana o Nimrim ma Ngairi maitioka idudungoka.

³⁵Ngohi aha tadiai o Moab manyawa imatogumu yatuhuku o huhuba toönanga manga huhuba mangïoka deʼ imatogumu ihihuba o huhuba toönanga manga giki-gikiri. Ngohi, ma Jou totemoka.

³⁶Mata-mata o Kir-Heres makaya deʼ o Moab ingodumu ihihangoka. Ngohi ahi hininga ihuha tamake toönanga manga wowango madodagi gënanga; Ngohi hokä o nyawa yowuwu o duka manyanyi malugo o sulingoka.

³⁷Onanga mata-mata mangatadauru deʼ mangaparahi yakorioka, mangagiama yalui-luiti, deʼ yapake o ngoere o karongo manonako mangahininga ihuha.

³⁸O tau maponatoka mata-mata deo tanalapangoka duga-duga hoihene o gari. Hababu o Moab tapootekoka hokä o taupayanga yöigo-igoua.

³⁹O Moab duru iwede-wederoka! Hokokia o Moab mamal̄eke. Enanga iari ihikaukuoka deʼ o hoana deo berera magilolitino idadi mangagie-giete mangï. Ngohi, ma Jou, totemoka.”

⁴⁰Ma Jou wotemo, ”Hokä o totaleo o rajawali iutuku magahuhu irefeika, hokogënanga moi o hoana deo berera aha iboa deʼ yautuku o Moab.

⁴¹Hagala o kota deʼ madadatoko o bebeno o mehele aha yaora deʼ manga tentara aha yohawana hokä o ngongoheka manga ngohaka imahiadono.

⁴²O Moab aha iwedere de imahi rupaokaua o hoana deo berera karana önanga ihide edenge Ngohino.

⁴³Onanga imateke rihimanga deyohohatera, o baiti deʼ o modoi.

⁴⁴O nyawa ihi oa-oara manga diri yohohateraino aha yäotaka o baituku, deʼ yohupu-hupu o baitile aha o modoi yäliko. Mata-mata gënanga aha idadi maoraha Tohitotatapuoka mangale yawedere o Moab.

⁴⁵Ima hidito-ditokino imangaku-ngakunua yoiki yolingiri o hohohongo o Hesybon makotaika, mä o kota gënanga magogiria yöuku deʼ ma koano Sihon ai kadato mayöuku. O uku yabinahaka o daera mahiribatingi deʼ o Moab mal̄oku mabuturungu, manga berera hagala o nyawa yöigo-igo yoparangi.

⁴⁶Nobodito Moab! Yogögogere yahuba-huba o Gikiri o Kamos yabinahaka, deʼ toönanga manga ngoha-ngohaka yätoraka hokä o dagokino.

⁴⁷Mä o wange maduruino Ngohi aha tohigilio hoihira-hirali o Moab maberera. Ngohi, ma Jou, totemoka!” Genanga doka aha ma Jou wadiai o Moabika.