Read Tobelo O YEREMIA 49 Bible Online

O YEREMIA 49 - Tobelo bible

O YEREMIA 49

¹ Nenanga doka ma Jou wahöheto-hetongo mangale o Amon, ”Yadodoaho o Gad aihöana manga tonaka yaora deʼ yogogere hagala o nyawa yahöhuba-huba o Gikiri o Milkom? Boteka komoiokaua o Israel manyawa yakunu yoduhunu o daera gënanga?

²Mä aha maoraha iboa Ngohi tadiai yogögogere o Raba, o Amon maberera makota matiti gënanga, yoihene ihiböaka o parangi o kota gënanga aha idadi kama ngedere deʼ makapo-kapongo magilolitino yamata yatuhuku. Deo Israel manyawa aha yakilioli manga tonaka hagala o nyawaino mahira yaora.

³Hei o Hesybon manyawa, niari hababu o Ai makota yawederoka! Hei o Raba makota mangongoheka, nidodora! Niapake o karongo manonako niahininga ihuha. Nimapopata niakaika niakaino kani bingu-binguika. O Milkom niagikiri aha yatoraka o tabuanga mangï ika kamamoi deo imam-imam deʼ mapopareta mapegawe.

⁴Hei ngini nisosatiaua! Yadodoaho ngini nihiamoko hagala niawai iboburere? Okia mahababu hoʼ ngini niangaku niakaya? Sarakia ho ngini niakunu nitemo moiua yobarani iniparangi?

⁵Ngini initapal̄u o bodito Toao-ao hagala okia honangino. Ngini aha nipiringana, moi-moi nima hidailako nihihalamati niadiri mahirete, deʼ moiua inï toomuoli ngini.

⁶Mä o wange maduruino, o Amon mahoana dema berera makia honanga aha Tohigilio hoihira-hirali. Ngohi, ma Jou, totemoka.”

⁷ Nenangadoka ma Jou Duru Wokokuaha wohö heto-hetongo mangale o Edom, ”Boteka o Edom manyawa yakunua imapikiri hokä yobobarija? Boteka yänonasihati yakunokaua yahidoakoli o nasihati onangika? Ihihangoka toönanga mangabarija!

⁸Hei o Dedan nigögogere, nimaidulu deʼ nioara! Nioiki nimangiunu. Ngohi aha Täbinaha o Esau ai difauku, karana maorahoka Ngohi tähukumu önanga.

⁹Nako o nyawa yopagele o angguru mahohoko, salalu naga mahouohi deʼ nako wotohi-tohiki woboa o hutu-hutu, ünanga duga-duga wal̄e okianaga wonö nahihu.

¹⁰Mä Ngohi tahehara tatebi-tebini o Esau aidifauku manga kiahonanga deʼ tahelenga imangiu-ngiunu marahasia; önanga yakunokaua imangiunoli. O Edom manyawa kamamoi de manga roriadodoto deʼ toönanga manga date-datekino, mata-mata yabinahaka, moiua yootana.

¹¹Hei Edom! Namal̄aika aningoha-ngohaka o gohihi Ngohioka, Ngohi aha tapaliara önanga. Mal̄aika aningongoheka o bobao ihingaku Ngohino.

¹²O nyawa ipatu-patutua yähukumu makayakoronali o hukumanga, o nagona yato ngini kowali? Maraioka ngini kokiani inïhukumu!

¹³Ngohi tokoboto de Ahi romanga mahirete o Bozra makota aha idadi o ngï yöboborohono yamal̄a-mal̄aika o nyawa. O nyawa yögogiete deʼ maromanga yapake hokä o lolai. Mata-mata o kapongo magilolitino aha imadadi kamangedere kahiado-adonika. Ngohi, ma Jou, totemoka.”

¹⁴Ngohi o Yeremia, totemo, ”Hei Edom, ngohi tatarimaka moi o abari ma Jouino. Unanga wahidingotoka o huhuloko hagala o hoana deo bereraika mangale wähukumu önanga yatoomu o tentara deʼ imahidiai la iniparangi ngona.

¹⁵Ma Jou aha wadiai ngona nobole deʼ o nyawa inihikauku.

¹⁶Ngona aniedenge initipu. Moiua inïmodongo ngonaika hokä ngona nato. Ngona nogogere o helewo madonga-dongaika, kahägurutil̄e ol̄oku matubuoka. Mä ngaroko nodiai anitau, o ngï duru magögurutil̄eoka, imatero magurutil̄e deo totaleo o rajawali imäigutu, ma Jou aha wonihiguti genangino. Ma Jou waho heto-hetongo mata-mata gënanga.”

¹⁷Ma Jou wato, ”Obodito yatotapal̄u o Edom aha hokogënanga magogiria hömodongo hiädono moi-moi o nyawa yakokaino genangino aha yätodokana deʼ yohawana.

¹⁸ Hokä sarakia o Sodom deʼ o Gomora ibinaha kamamoi dema kapo-kapongo magilolitino, hoko genangoli o Edom. Moiua o nyawa aha yogogeroli dokengoka. Ngohi, ma Jou, totemoka.

¹⁹Hokä o singa ihupu o honganino imahitigi-tigika o Yordan ma Ngairika deʼ yaino o tonaka ilua-luasino mangï o duba iol̄omo o momo, hokogenangoli Ngohi aha toboa deʼ tadiai o Edom manyawa itodokanino toönanga manga bereraka deyopiringana. De aha Ngohi tï iriki womatengo o tutuda la wapareta o hoana deo berera gënanga. O naguna wakunu womahitero dede Ngohi? O naguna wobarani wodiai o perekara dede Ngohi? Boteka naga o tutuda wakunu wohilawani Ngohi?

²⁰Karana gënanga, ni ihene okianaga Tödato-datoroka o Edom manyawaika, deʼ okianaga tomau Tadiai o Teman makota yogögogerika. Toönanga manga ngoha-ngohaka ma aha yoiki yäliliara, deʼ mata-mata o nyawa aha yohawana.

²¹Nako o Edom itifa, aha niögihene o gigoro hoko gënanga magiria hiädono yamode-modekika o dunia igiwi; hagala manga böaka yogögogere yögihene hiädono o Gelagah mangötika.

²²Hokä o totaleo o rajawali iutuku magahuhu yarefeika, hoko genangoli manga haturu aha yoboa deʼ yäutuku o Bozra. Mawange gënanga o Edom manga tentara aha yohawana hokä o ngongoheka yomau yongohaka.”

²³ Nenanga doka ma Jou wahöheto-hetongo mangale o Damsyik. ”O Hamat deʼ o Arpad makota yogögogere yohawatere deʼ yoihene o abari madorou. Toönanga manga hininga iruae hokä o moku-moku malulu o ngötoka.

²⁴O Damsyik yogögogere idadi yabole, deʼ yopiringana kayohawa-hawanika. Onanga kamanga hiri deʼ yamao yohangihara hokä o ngongoheka yomau yongohaka.

²⁵O kota kaya heto-hetongo deʼ kai more-morenika gënanga o öraha nënanga kai rïdika komoiua yögogerika.

²⁶Mawange gënanga manga gogoduru aha yohonenge manga kota mangeko-ngekomika, deʼ yongodumu manga tentara yabinaha.

²⁷O Damsyik mabebeno-bebeno o mehele aha Tatuhuku, deʼ ma Koano Benhadad ai kadato-kadato Tatuhuku. Ngohi, ma Jou Duru Tokokuaha, totemoka.”

²⁸Nenanga doka ma Jou wahoheto-hetongo mangale o Kedar mahoana deʼ o Hazor makuaha magoronaka madaera-daera, waora-oraka o Nebukadnezar ma Koano Babel, ”Hei Nebukadnezar, naparangi o Kedar ma hoana deʼ nabinaha hagala o nyawa o wange mahiwaroko yodaduoka!

²⁹Naora manga aiwani o gigino, o duba, o unta, inoli toönanga manga tau-tau dema dol̄a mata-mata, deʼ niaböaka onangika, ’O manarama itotorou initamunuku ngini!ʼ

³⁰Hei ngini o Hazor manyawa! Ngohi, ma Jou, totemo: Itiai nioiki nima hiditoko, deʼ nimangiunu. O Nebukadnezar ma koano Babel wödatoroka mangale winïparangi ngini. Unanga wotemo,

³¹’Ika nia ngika! Niaino ngone häparangi hagala o nyawa yamao yosanangi deʼ yorirïdi gënanga. Toönanga manga kota okiaua yatatoko hababu koiwa manga ngorana ma ago-agomo deʼ koiwa madudukuru.’ ”

³²Ma Jou witemoli ma Nebukadnezarika, ”Nia ora hagala manga unta deʼ ingodumu toönanga manga aiwani o gigini! Hagala o nyawa manga tadauru yatobiki yatotipokoka gënanga aha ta hikabarihi okiaika honanga. Ngohi aha tadotagao o bodito onanguku okiaino honanga.

³³O Hazor aha koyölegaikaua kahiado-adonika deʼ imadadi o kaho o honganika mangïima ngiu-ngiunu. O nyawa moiua aha yogogeroli dokengoka. Ngohi, ma Jou, totemoka.”

³⁴Itedekanua ipahaino o Zedekia wodadi o Yehuda manga koano, ma Jou Duru Wokokuaha wohitemo ngohino mangale o Elam maberera.

³⁵Ma Jou wato, ”Ngohi aha tätoma mata-mata yotoimi duru yososawaro yadiai o Elam duru kamangakuata.

³⁶Ngohi aha toduwuwu o hidal̄oko o Elamika o kiaino honanga mawuwu, deʼ Tahikabarihi yogögogere okiaika honanga hiädono koiwa moi o berera yadotoboaua imahidö dito-ditoko o Elam de yaino gënanga.

³⁷Ngohi aha tadiai o Elam manyawa yamodongo manga haturuika yomau-mau yätoma önanga. Ngohi duru Tängamo onangika deʼ aha Täbinaha önanga hiädono önanga duru yomata-mataka.

³⁸Manga kokoano deʼ toönanga manga popegawe aha Täbinaha deʼ toönanga manga bereraka aha tohigoko Ani popareta makuruhi.

³⁹Mä o wange maduruino, o Elam makia honanga aha Tohigilioli hoi hira-hiralil. Ngohi, ma Jou, totemoka.”