Read Tobelo O YEREMIA 5 Bible Online

O YEREMIA 5 - Tobelo bible

O YEREMIA 5

¹Hei o Yerusalem manyawa, nia igo-igoro o ngekomo mata-mata nia kotaka! Nilingiri kiaika honanga, deʼ niahakihi mahirete. Niatailako o kota malooa ilua-luasika boteka naga womatengo ai hininga iriko-rikoto womahidailako wosatia ma Jou Madutuika. Nako naga, done ma Jou aha wohi apongo o Yerusalem.

²Ngini niato ngini niwihuba ma Jou, enahioko ngini niadungutu hoko genangua.

³Igou-goungu ma Jou wogahoko ikiria ganga o satia. Ma Jou winï gohara ngini, mä ngini nihaduliua. Unanga winï wede-wederuku ngini, mä ngini nioluku winï dotoko. Ngini niahaeke i togowini, deʼ nioluku nitoba hagala niabaradoha.

⁴Ngohi tapikiri, ”Aa, önanga duga-duga o kawaha biaha okia-kiaua ihioriki. Onanga yobodo okianaga yodiai, karana koyanakoua okianaga onangino wöigo-igo deʼ ikiria wogahoko ma Jou o Jou Madutu onangino.

⁵Yaoa ngohi toiki o gikiri yolago-agomika, deʼ mimäteke ade-ade dede önanga. Maraioka önanga ihioriki okianaga onangino wöigo-igo deʼ ikiria wogahoko ma Jou onangino.” Mä onangö mata-mata yoluku ma Jou wäpareta, önanga yoluku i hingounu Unangika.

⁶Mahababu gënanga önanga aha o singa o honganino yäol̄omo deʼ o serigala o tonaka ikokakahaino yakäkakihuku. O macan aha yakaika yakaino ilingiri o inomo toönanga manga kota madatekino, deʼ moi-moi o nyawa yohöhupu-hupu aha yägoli. Mata-mata gënanga idadi karana önanga manga ngöeoka yobaradoha, deʼ ihigali-gali iwïporete ma Jou Madutu.

⁷Ma Jou wato, ”Yadodoaho Ngohi kokiani tahiapongo Ahi umati manga baradoha? Onanga ihimal̄aka Ngohi deʼ yahuba o Jou Madutua. Ngohi tahidöaka o inomo onangika hiädono önanga yapunuhu, ma’ önanga kayohowono, deʼ mamoi-mamoi yadulu o nyawa manga röehe yahuku-hukunu.

⁸Onanga hokä o kuda manauru iboburere deʼ manahihu ikurutil̄e, moi-moi yänahihu manga dodiawo ngoi hekata.

⁹Boteka kokiani Ngohi tähukumua o hoana deo berera manga rupa hoko gënanga deʼ tabalahua okianaga önanga yadodiai?

¹⁰Ngohi aha tähuloko o haturu la yakilianga toönanga manga angguru madumule, mä koyäbinahaua. Ngohi aha tähuloko o haturu gënanga yapoporo toönanga manga angguru magota mautu majaga-jaga, hababu majaga-jaga gënanga koto Ngohiua.

¹¹O Israel deʼ o Yehuda manyawa igou-goungu ihihianatoka Ngohi. Ngohi, ma Jou, totemoka.”

¹²Ma Jou Ai umati ya hetongo itiaiua mangale ma Jou. Onanga yato, ”Aa, Unanga aha okia-kiaua wodiai. Ngone aha inä koronaua o bodito deʼ aha kohaohanua o parangi ekola o habirokata.

¹³Hapulono o nabi-nabi gënanga kao hidal̄oko dika, hababu ma Jou Ai behehongo koiwa naga onangoka.”

¹⁴Dema Jou Duru wokokuaha wohitemo ngohino, ”Yeremia, karana o nyawa geönanga yotemo hoko gënanga, done önanga aha yäkorona o bodito imoteke önanga aha koidadiua. Ngohi aha tohidadi Ahi demo-demo hokä o uku ani uru magoronaka. O hoana deo berera nënanga aha hokä o gota homahi dofo-dofo, deʼ o uku gënanga aha yätuhuku önanga hiädono yomata-mataka.”

¹⁵Hei o Israel manyawa, ma Jou magogiriaka winï dotagao moi o hoana deo berera magögurutino mangale iniparangi ngini. O hoana deo berera gënanga kahuruoninohi naga dema enangoka, manga bahasa ngini nia nakoua. Onanga duru yokuata,

¹⁶deʼ yotötoi-toimi önanga duru yokuata de yobarani; önanga yotoma koiwa mahayanga dema dora.

¹⁷Onanga aha yamata-mataka nia tonaka mahasili deʼ niainomo inoli yätoma niangoha-ngohaka. Niagigini o hapi deʼ nia duba aha önanga yatoaka, nia angguru madumule inoli nia ara magota mautu aha önanga yabinaha. Hagala nia kota dema bebeno o meheloka ngini niongano-nganono aha önanga yawede-wederuku.

¹⁸Ma Jou wato, ”Ngaroko hoko gënanga, maorahokaö gënanga Ahi umati aha Täbinahaua.

¹⁹Mä nako önanga yoleha yadodoaho Ngohi todiai mata-mata gënanga onangika, nahetongo hei Yeremia, hokä sarakia önanga ihi mal̄aika Ngohi toönanga manga bereraka mahirete la ima gilaongo o hoana deo berera mahomoa manga gikirika, hoko genangoli önanga aha yodadi o nyawa maporetino manga gilaongo o berera mahomoaka.”

²⁰Ma Jou wohihuloko ngohi tohiädono Ai behehongo nënanga o Yakub aidifauku yögogogerika o Yehuda ai tonakoka,

²¹ ”Ni ihene, hei ngini o bodo deʼ o fuma manyawa! Ngini de nialakoka ma nimahimakeua, de nia ngaukoka ma niihenua!

²² Ngohi nanga ma Jou; yadodoaho ngini nihï modongua Ngohino? Kokiani ngini nihaharoka Ngohino! Ngohi nanga tadodiai o dowongi o gahi madatekino idadi o ngöto mabatingi yakunua yatilakuru kahiado-adonika. O ngöto yakunu iluluaka hö modo-modongo deʼ o moku-moku malulu ingö ngamo-ngamo, mä koyakunua yatilakuru o batingi gënanga.

²³Mä ngini niahaeke itogowini deʼ nioigo nimalawani; ngini niahowonoka deʼ nihimal̄aika Ngohi.

²⁴Komaiwa ngini nima hiningala Ngohi nihihoromati, enahioko Ngohi nanga tohidö dingo-dingoto o awana, kayaoa madodihiraka o awana maöraha kayaoa mabobahaka o awana maöraha. Ka Ngohioli tinihidoa-döaka nginika o gugutuku maöraha o taongo ihi getongo.

²⁵Mä niabaradoha genangala yatatoko mata-mata maoa-oa gënanga hiädono ngini konia jameua.

²⁶Hei Ahi umati, tingini nia hidogoronaka naga o nyawa madorou. Hokä o nyawa wohi aka-akanika o modoi la wotagoko o totaleo, hoko genangoli önanga ihiakana o modoi layä tagoko o nyawa.

²⁷Hokä wo lingi-lingiri o totaleo wadol̄a ai kurunga de o totaleo, hoko genangoli önanga yadol̄a manga tau deo bara-baranga o tipu mahasilino. Hoko gënanga önanga yodadi yokokuaha deʼ yokaya

²⁸inoli yoburere deʼ okiaua yokuranga. Toönanga manga dorou koiwa mabatingi. Onanga koyo adilua o ngoha-ngohaka o gohihi manga perekara magoronaka, deʼ yöriwoua o nyawa yatö tuku-tuku manga haku.

²⁹Mä Ngohi, ma Jou, aha tähukumu önanga karana mata-mata gënanga; Ngohi aha tabalahi o hoana deo berera nënanga hagala manga manarama.

³⁰Okia naga moi homodo-modongo deʼ hoboborohono idadioka o bereraka nënanga:

³¹manga nabi-nabi yoeluku, o imam-imam yoleleani imoteke manga mau mahirete deʼ ngini Ahi umati niö igo o hali gënanga. Mä okia aha ngini nidiai nako o wange mabobaha imahiadono?”