Read Tobelo O YEREMIA 50 Bible Online

O YEREMIA 50 - Tobelo bible

O YEREMIA 50

¹ Nenanga doka ma Jou Ai behehongo ngohino mangale o Babel makota deʼ yogögogere,

²”Nia tuboil̄e o nonako deʼ nihingahu hagala o hoana deo bereraika o Babel irubaka! Uha niagö gogono o hali gënanga! Magikiri o Merodakh yawederoka, deʼ madulada-dulada ihuda-hudala ipooteke ihikabarihika, inoli toënanga magomanga duru ihikauku.

³Moi o hoana deo berera o koremieil̄e aha yoboa yaparangi o Babel deʼ yadiai o berera gënanga idadi o tonaka madoongoro. O nyawa deʼ o aiwani aha yopiringana deʼ moiokaua yomau yogogere dokengoka.”

⁴Ma Jou wato, ”maorahoka gënanga o Israel deʼ o Yehuda ma nyawa aha yoboa imakutuono de yoari, ihilingiri Ngohi, toönanga manga Jou Madutu.

⁵Onanga aha yoleha o Sionika mangekomo, daha yotagi manga meta genangika. Onanga aha yodiai o jaji ikokakali dede Ngohi, deʼ aha kahirahi yasosö.

⁶Ahi umati hokä imatero o duba magogoana yamal̄aika o ngekomo yahihanga ol̄oku mabuturungoka. Onanga yotagi yakaika yakaino ol̄oku moioka de ol̄oku mahomoaika deʼ ihiorikokaua kiaka toönanga manga tau.

⁷Onanga yaparangi deʼ yähangihara mata-mata imakokamake dede önanga. Ahi umati manga haturu-haturu yotemo, ’Okia naga ngone hadiai ihowonua, hababu hagala o nyawa gënanga yobaradohaka ma Jouika. Toönanga manga ete de manga tohora iwi ngaku ma Jouika, hoʼ kokiani onangö kahirahi yosatia Unangika.’

⁸ Hei Israel manyawa, niodobiringana o Babel! Ngini kokiani madodihiraka nipiringana, hupaya mahomoa inïnïki.

⁹Ngohi aha Tatoomu o hoana deo berera o doomu moi yokua-kuata o koremieil̄e hupaya önanga yaparangi o Babel. Onanga aha yatatoro manga tentara maduduono la yoparangi yälawani o Babel deʼ yahohihanga. Onanga ganga yotö toi-toimi duru yososawaro manga toimi madoto komaiwa irehene o homoaika.

¹⁰O Babel aha yäora aha yal̄ë manga hagala moi-moi de manga hininga mahuka. Ngohi, ma Jou, totemoka.”

¹¹Ma Jou wotemo, ”Hei o Babel manyawa, ngini niaora Ahi umati. Ngini nimorene nima tototubo hokä o kuda ipoa-poaka, deʼ hokä o hapi magogiria o momo iol̄omo.

¹²Mä ngini aha nidiai o hoana deo berera duru kokia-kiaua inidaene hagala o hoana deo berera manga hidogoronaka. Nia kota mahirete ma ago-agomo gënanga aha ihikauku deʼ yahohedu. Nia berera aha idadi o tonaka makokakaha madoongoro deʼ madüdudungu.

¹³Karana Ngohi tongamo, done o Babel aha idadi ikokilianguku deʼ moiua yögogere. Mata-mata yakokaino genangino aha yatodokana deʼ yäporohono.

¹⁴Hei ngini nitö toi-toimi! Nia tatoro niaduduono la nihigilolitino deʼ niaparangi o Babel. Nihi meta nia toimi madoto mata-mata mameta o Babelika, karana ënanga ibaradohaka Ngohino.

¹⁵Nihiböaka o parangi maulili de mahagaga o kota gënanga magilolitino! Oraha nënanga o Babel imahidoakoka. Hagala ma bebeno o mehele ya topaha deʼ yaruba. Ngohi magogiria todiai önanga hokä önanga yahidiai o nyawa mahomoa.

¹⁶Uha niahigumal̄a o nyawa yödatomo ekola youtuku o bereraka gënanga. Mata-mata o nyawa maporetino yogögogere genangokadau aha yolio manga bereraika, karana önanga yämodongo o tentara yapoparangika.”

¹⁷Ma Jou wotemo, ”O Israel manyawa hokä o duba matika ihikitingaka deʼ yöginïki o singa. Madodihiraka önanga o Asyur manga koano wäparangi, daha o Nebukadnezar o Babel manga koano waporotoko toönanga manga kobongo.

¹⁸Karana gënanga, Ngohi, ma Jou Duru Tokokuaha, o Israel manga Jou Madutu, aha Tïhukumu ma Koano Nebukadnezar deʼ ai berera imatero hokä Tïhukumu o Asyur manga koano.

¹⁹Ngohi aha tahigilio o Israel manyawa toönanga manga bereraika. Onanga aha yaol̄omo o Karmel mal̄oku deʼ o Basan madaera matonaka mahasilino. Onanga aha yäpunuhu mangale o Efraim deʼ o Gilead madaera matonaka mahasiliono.

²⁰Maorahoka gënanga o Israel deʼ o Yehuda aha yotebini deo baradoha, karana Ngohi aha tahiapongo hagala o nyawa Tahiho halamatoka. Ngohi, ma Jou totemoka.”

²¹Ma Jou watemo moi o hoana deo bereraika o koremieil̄e, ”Nia parangi o Merataim deʼ o Pekod yogögogere. Niä toma deʼ niä binaha önanga. Niadiai Ahi pareta. Ngohi, ama Jou totemoka.”

²²O parangi mailingi iruruhu o bereraka, deʼ idadi o bodito ma ago-agomo.

²³O dunia yamode-modekika o Babel yatataka hiädono i wedere, maöraha nënanga o tataka gënanga mahirete itobikoka! Hagala o hoana deo berera yatodokana yoihene okianaga idä dadi deo berera gënanga.

²⁴Ma Jou wotemo, ”Babel, ngona nohilawani Ngohi, hababu gënanga ngona nödohodoa o modoi Tohiaka-akanuku mangale ngona, mä ngona konomamaoua.

²⁵Ahi dae magudangi Tahelengaka, deʼ de Ahi dohata To hihupu hagala o dae gënanga, karana Ngohi ma Jou Duru Tokokurutil̄e deʼ Duru Tokokuaha kokiani tadiai moi o manarama o Babelika.

²⁶Niaparangi o Babel okiaino honangino deʼ niatopaha magandum madugangi! Niatoporonil̄e okia honanga yaora-oraino hokä ngini nia toporono o gandum! Niabinaha o berera gënanga! Uha naga mahouohi!

²⁷Niatomaka mata-mata manga tentara! Nia hohonenge önanga! Yobodito o Babel ma hoana dema berera. Maöraha yadonoka önanga yähukumu!” (

²⁸Hagala o nyawa yopopiringana o Yerusalemika o Babel de yaino ihijarita sarakia ma Jou tongone nanga Jou Madutu wabalahi o Babel manyawa manga manarama ma Jou Ai Tauika.)

²⁹ Ma Jou wotemo, ”Niahuloko yotötoi-toimi yaparangi o Babel. Niatoomu moi-moi o nyawa yososawaro yotoimi. Nihigilolitino o kota gënanga deʼ uha nihigumal̄a imatengo ma uha yootana. Niabalahi mata-mata toönanga mamanarama deʼ niahidiai önanga nihitero de manga kalakuanga, hababu ënanga ihide edengoka Ngohino, Duru To Tebi-tebini, o Israel manga Jou Madutu.

³⁰Mawangeoka gënanga manga gogoduru aha yohonenge manga kota mangeko-ngekomika, deʼ yongodumu manga tentara aha yobinaha. Ngohi, ma Jou, totemoka.

³¹Babel, ngona ikurutil̄e holi ani hininga! Karana gënanga Ngohi, ma Jou Duru Tokokurutil̄e, ma Jou Madutu Duru Tokokuaha, toni lawani ngona. Maorahoka ngona Tonihukumu.

³²Ani hoana de ani berera manga hininga ikökurutil̄e gënanga aha yopeleke deʼ yoruba. Moiua o nyawa aha inïriwo ngona la nomomiki. Hagala ani kota aha Tatuhuku, deʼ hagala ani higilolitino aha Tabinaha.”

³³Ma Jou Duru Wokokuaha wotemo, ö Israel deʼ o Yehuda ma nyawa yätukuku. Mata-mata yatö tago-tagoko önanga yägoana duru ihidodiai deʼ yoluku yälapahi önanga.

³⁴Mä Ngohi tahihohalamati önanga gënanga Tokuata, Ahi romanga ma Jou Duru Tokokuaha. Ngohi mahirete aha Töriwo toönanga manga perekara deʼ Toao o dame o duniauku. Mä o Babel manyawauku aha Tadotagao o ruae deʼ o modongo.”

³⁵Ma Jou wotemo, ”Nobinaha Babel, kamamoi deo kawaha deʼ o pareta mapopegawe inoli toönanga manga nyawa duru yososawaro!

³⁶Yobinaha o Babel ma nabi-nabi! Onanga yoelu-eluku deʼ yofuma. Yobinaha o Babel matentara yopoputurungu. Hokokia toönanga manga hawana!

³⁷Nia wedere toönanga manga kuda deʼ manga kereta ihi poparangi! Yobinaha manga tentara ya hewa-hewaino! Hokokia önanga manga mobole! Niabinaha o Babel makaya!

³⁸Niadudungu hagala manga ngairi deʼ manga dumule! Hababu o Babel iomanga de hagala o gomanga höboborohono, yadiai yopö puji-puji yätogohanga.

³⁹ Karana gënanga o Babel aha idadi hagala o jin deʼ o womaha madorou ma inoli o totako o onta. Kahiado-adonika aha moiua o nyawa yomau yögogeroli dokengoka.

⁴⁰ Hokä sarakia Ngohi tabinaha o Sodom deʼ o Gomora dema kapo-kapongo magilolitino, hoko genangö Ngohi aha tabinaha o Babel. Moiua o nyawa aha yogogeroli dokengoka. Ngohi, ma Jou, totemoka.

⁴¹Moi o hoana deo berera yokokua-kuata magogiriaka yotagi o berera magogurutoka de yaino o koremieil̄e idaduoka. Onanga yoboa kamamoi de manga kokoano manga ngöe mangale yoparangi.

⁴²Onanga de manga däe o toimi deʼ o kuama; önanga yöigo yoaniaya deʼ koiwa ma apongo. Hokä o ngöto malulu ma ago-agomo makorongo hoko genangoli madibingi toönanga manga kuda imapopäta magogiria imateke rorebe itagi mahimangika yaparangi o Babel

⁴³Woihene o abari gënanga, o Babel manga koano okiaokaua wakunu. Unanga wamao kawohawa-hawanika, deʼ wohangihara hokä o ngoheka ami ngohaka imakil̄au.

⁴⁴Hokä o singa ihupu o honganino imahi tigika o Yordan ma Ngairika deʼ yaino o tonaka ilua-luasino mangï o duba i ol̄omo o momo, hoko genangoli Ngohi, ma Jou, aha Toboa deʼ Tadiai o Babel manyawa kaitodokanino toönanga manga kotaka de yopiringana. Daha Ngohi aha ti iriki womatengo o tutuda la wapareta o hoana deo berera gënanga. O naguna yakunu ihihitero dede Ngohi? O naguna wobarani wodiai o perekara dede Ngohi? Boteka naga o tutuda wakunu wohi lawani Ngohi?

⁴⁵Mahababu gënanga, ni ihene okianaga Todato-datoroka o Babel makotaika, deʼ okianaga Tomao Tadodiai yogö gogerika. Toönanga manga ngoha-ngohaka ma aha yätatauru, deʼ o nyawa mata-mata kayohawa-hawanika.

⁴⁶Nako o Babel iruba, aha yoihene o gigoro hoko gënanga magiria hiädono o dunia yamode-modekika igiwi. Hagala manga böaka yogögogere aha yögihene hagala o hoana deo berera ma homoa.”