Read Tobelo O YEREMIA 51 Bible Online

O YEREMIA 51 - Tobelo bible

O YEREMIA 51

¹Ma Jou wato, ”Ngohi aha tohidingoto o hidal̄oko i kokilianga iwuwu yameta o Babelika deʼ yameta yogögogere.

²Aha Tahuloko hagala o nyawa maporetino aha yakilianga o Babel hokä o hidal̄oko ihi hoho o gandum makai. O bodito mawangeoka gënanga önanga aha yaparangi o berera gënanga hagala okiaino honangino deʼ yahehara yatebi-tebini.

³Uha niahigumal̄a manga tentara imahidaene la ihimeta manga toimi madoto ekola ima hikuata manga parangi mapakeanga. Manga ngoha-ngohaka maduru uha niamal̄aika yowango. Niabinaha mata-mataka manga tentara!

⁴Onanga aha manga nabo, ma ago-agomo deʼ yohonenge toönanga manga kota mangeko-ngekomika.

⁵Ngohi, ma Jou, ma Jou Madutu Duru Tokokuaha, o Israeloka manga Jou Madutu To Tebi-tebini, aha tamal̄aikaua Israel deʼ o Yehuda, ngaroko önanga yobaradohaka Ngohino.

⁶Nohihalamati ani diri! Nipiringana o Babel de niaino, uha hiädono ngini ini hidotoma karana mabaradoha! Hababu nënanga doka maoraha Ngohi tabalahi o Babel madorou, deʼ Tahukumu ënanga imadaene de toënanga mamanarama.

⁷ O Babel hokokangano hokä o galahi o gurasi Tomahijö ino deʼ yadiai yamode-modekika o dunia yadaluku. Hagala o hoana deo berera yaokere o angguru o galahioka gënanga hiädono önanga idadi yatogohanga.

⁸Mä itodokanino o Babel itifa deʼ ipooteke. Nio gari ënanga, deʼ nilingiri o houru mangale manabo-nabo, mudukua ënanga yakunu itogumu.

⁹ O nyawa maporetino yogögogere dokengoka imakoketemo moi de moi, ’Ngone hohidailako höriwo o Babel, mä homahidaenua! Iholoi yaoa ngone hamal̄a o berera nënanga deʼ holio moi-moi tongone nanga bereraika. Ma Jou wahukumoka o Babel kahagiria, deʼ wakiliangoka mata-mataika.’ ”

¹⁰Ma Jou Ai umati yato, ”Ma Jou wohidumutoka ngone hatiai. Niaino hoiki o Yerusalemika deʼ hohijarita dokengoka okianaga tongone nanga Jou Madutu wadodiaioka.”

¹¹Ma Jou wahigaroka o Media manga kokoano, karana Unanga womau wakilianga o Babel. Hoko gënanga Ai datoro Unanga wabalahi hagala o nyawa manga manarama yakokilianga Ai tau. O duduono yopoparangi manga kokapita yahipareta, ”Nia tol̄omo o toimi madoto! Nihidiai o dadatoko!

¹²Nihidöaka o nonako la niaparangi o Babel de mabebeno o mehele. Niakuata o gogoana. Nia higogere yogoa-goana. Nima hidiai niangika!” Ma Jou wadiaioka naga Wodato-datoroka o Babel manyawaika.

¹³ O berera gënanga duru ikaya deʼ mangairi mangöe, mä o wowango maoraha koiwaka; mangango mabaha imahiadonoka.

¹⁴Ma Jou Duru Wokokuaha wokoboto de Ai diri mahirete Unanga aha wahidingoto o nyawa manga ngöe hokä o kahoho la yaparangi o Babel, deʼ önanga aha ihiböaka o utumu maulili.

¹⁵Ma Jou wohidadi o dunia de Ai kuaha, Wadiai o dunia de Ai barija, deʼ Wohihohe o dihanga de Ai akali maoa.

¹⁶Duga-duga Wohidöaka o pareta, o akere iruruhu o gitaoaka. O dunia mabaha-bahaino Woao o lobi, deʼ Wadiai o leletongo ijanga o awana magoronaka, inoli Wohidingoto o hidal̄oko magogogono mangï ino.

¹⁷Yamake gënanga mata-mata o nyawa imamao, önanga yobodo deʼ koiwa manga mangarati. Yososawaro yododiai o gurasi manga rupa hamakeokaua, hababu o gomanga madulada yododiai gënanga komadutuua deʼ komangangoua.

¹⁸Hagala manga gomanga gënanga koiwa maija, ipatutu yahohedu deʼ ihikauku. Nako maoraha iboa önanga aha yäbinaha.

¹⁹O Yakub ai Jou Madutu hokä hagala o gomangua gënanga; Unanga wohidadi hagala moi-moi. Ai romanga enagënanga ma Jou Duru Wokokuaha; Unanga wairikoka o Israel yodadi Ai umati.

²⁰Ma Jou wotemo, ”Babel, ngona hokä o tataka, Ahi däe mangale toparangi. Ngona Tonipake la nagohara hagala o hoana deo berera deʼ hagala o popareta ilago-agomo.

²¹Ngona Tonipake la nawedere o kuda deʼ yo bare-barene, inoli o kereta deʼ yohare-harenuku.

²²Ngona Tonipake la nätoma o nauru deʼ o ngoheka, o bereki kayaoa o gikiri magö, o moholehe deʼ o goduru.

²³Ngona Tonipake la nabinaha o aiwani magogoana deʼ manga aiwani o gigini, yototumule deʼ o hapi wopopajeko, yokokuaha deʼ o kapita yokökurutil̄e.”

²⁴Ma Jou watemo, ”Niahakihi mahirete sarakia oraha nënanga Ngohi tabalahi o Babelika deʼ yogögogere hagala o dorou önanga yadodiai o Yerusalemika.

²⁵Hei Babel, ngona hokä ol̄oku nawö wede-wedere o dunia yamode-modekika. Mä Ngohi, ma Jou, aha tonilawani ngona. Ngona aha Tonitatauru deʼ Toniluluiha ikali Tonimal̄aika ini harongo nodadi o kafo.

²⁶Ma doropaha mahelewo kamoiö mayal̄ëua ihipakeoli la ihigoko. Ngona aha nodadi hokä o tonaka ikokakaha kahiado-adonika. Ngohi, ma Jou, totemoka.”

²⁷”Hei ma koano o koremieil̄e! Nihidöaka o nonako mangale niparangi! Niawuwu niatrompet hupaya hagala o hoana deo berera yoihene! Niatoomu hagala o hoana deo berera la yoparangi yalawani o Babel! Niahuloko o Ararat, o Mini deʼ o Askenas mapopareta yoparangi. Niwigoraka womatengo o kapita manga baluhu la wohibaluhu o parangi gënanga.

²⁸Niahidiai hagala o hoana deo berera la yoparangi yalawani o Babel. Nia ahoko o Media manga kokoano kamamoi de yokokuaha deʼ manga balu-baluhu de inoli mata-mata o berera yakokuaha manga tentara.

²⁹O dunia ihahara deʼ igiwi mahababu Ngohi tadiai Ahi datoro la tadiai o Babel o tonaka madoongoro yakunua o nyawa yögogere.

³⁰O Babel manga tentara itogumoka yoparangi deʼ yogogere hagala o bebeno o meheloka. Onanga ihihangoka manga barani deʼ yododoaokaua. O kota mangorana malago-agomo mabebeno ya topahoka, deʼ hagala manga tau yatuhuku.

³¹O huhuloko-huhuloko imapopäta kaima kokinikika la ihingahu o Babel manga koanoika ai kota yongohamoka manga haturu.

³²De hagala o bebeno o mehele yatuhuku. O Babel manga tentara yoruaeuku.

³³Itedekanokaua önanga yohihanga deʼ yadoko-doko manga haturu hokä o gandum mabididoroka. Ngohi, ma Jou Duru Tokokuaha, o Israel manga Jou Madutu, Totemoka.”

³⁴O Yerusalem wawedere deʼ waol̄omo wamata-mataka o Babel manga koano; ünanga wamal̄aika o kota gënanga koma kia-kiaokaua hokä o nyawa yaihoro o boto. Hokä o aiwani ilago-agomo, ünanga wa l̄ahiri o Yerusalem deʼ wohidol̄a ai mamata de hagala ma oa-oa kotaino gënanga, daha waumo mahou.

³⁵O Sion nigögogere, niahetongo, ”Tanu o Babel yatapal̄u itotorou hokä yadodiai ngoneino!” O Yerusalem nigögogere, niahetongo, ”Tanu o Babel yatapal̄u o huha deo hangihara hokä inahitapal̄u ngoneino!”

³⁶Hababu gënanga ma Jou wätemo o Yerusalem ma nyawaika, ”Ngohi aha toriwo aniperekara, deʼ tabalahi ani haturu-haturu manga manarama ngonaika. O akere matiti deʼ o Babel mangairi aha Tadudungu.

³⁷O akere gënanga aha idadi o rutuku madoomu, mangï o kaho o honganika ima ngiu-ngiunu. O nyawa yäporohono yamake, deʼ moiua o nyawa yomau yogogere dokengoka.

³⁸O Babel manyawa yolau hokä o singa deʼ yomurutu hokä o singa mangohaka.

³⁹Magogiriaka manga nahihu yol̄omo, Ngohi aha tasadia önanga manga inomo de manga hiode, deʼ tadiai önanga yädaluku deʼ manga hininga ihihanga hiädono yakioko deʼ koyo momikokaua.

⁴⁰Onanga aha Taao la yätöaka hokä o duba mangohaka, o kabingi, deʼ o duba manauru. Ngohi, ma Jou, totemoka.”

⁴¹Ma Jou wato, ”O Babel ihi gogiriri o dunia yamode-modekika yaoraka deʼ yögogeroka! Hokokia hagala o hoana deo berera yöborohono o berera gënanga.

⁴²O gahi yaolu o Babel; mamoku-moku malulu maruruhu yödutuku o berera gënanga.

⁴³Hagala makota idadi o ngï höboborohono, hokä o tonaka ikokakaha madoongoro. Moiua o nyawa yomau yögogere ekola yakaino genangino.

⁴⁴O Bel o Babel maberera magikiri aha Tahukumu. Aha Tadiai ihigilio okianaga yaora-oraka. Hagala o hoana deo berera aha koya hubaokaua. O Babel mabebeno o mehele ikiliangoka.

⁴⁵Hababu gënanga nipiringana genangokadau, hei Israel manyawa! Ahi dohata ihebu-hebulu hoʼ nohihalamati ani diri.

⁴⁶Uha nihawana ekola nia hininga ihuha karana ni ihene imakokuhudu. O taongo ihigetongo ni ihene o abari imakoko howono — o abari mangale itotorou o berera magoronaka deʼ mangale o kokoano imateke parangi moi de moi.

⁴⁷Ningaku, maöraha aha iboa Ngohi tahukumu o Babel manga goma-gomanga. Yamode-modekika o berera gënanga, deʼ manyawa mata-mata yätoma.

⁴⁸ Hagala moi-moi o dihangoka deʼ o duniaka aha yomore-morene nako o Babel itifa o hoana deo berera o koremieil̄e manga giama mahoatika yobö boa-boa la yakilianga.

⁴⁹ Manga ngöe o nyawa o dunia yamode-modekika yohonengoka karana o Babel yätoma, maöraha nënanga o Babel aha itifa mangale o Israel manyawa yohonenge yätoma. Ngohi, ma Jou totemoka.”

⁵⁰Ma Jou watemo o Israel manyawaika o Babel matonakoka, ”Ngini inï tomaua! Ngaroko ngini niatau magurutika niatingaka, nimä hininga Ngohino, nia Jou, deʼ o Yerusalemika.

⁵¹Ngini niato, ’Ngomi imi hikauku deʼ imihimal̄eke; ngomi miarupa yamakeokaua mahababu hagala o nyawa maporetino yögogeroka, o ngï madebi-debini ma Jou Ai Tau magoronaka.”

⁵²Aah, niohininga nihidodiai Ahi demo nënanga. Aha iboa maoraha Ngohi tahukumu o Babel ma goma-gomanga. Yamode-modekika o berera gënanga aha yoihene o nyawa manga ilingi yokururihi mahababu manga nabo maago-agomo.

⁵³Ngaroko o Babel idoa o dihangil̄e deʼ ihigoko manga dadatoko koyakunua yadonil̄e, Ngohi kahirahi tahidingoto o nyawa la yakilianga. Ngohi, ma Jou totemoka.”

⁵⁴Ma Jou wato, ”Ni ihene! O Babel ma tonakoka o nyawa yopoa-pöaka deʼ yoari manga hininga ihuha karana o berera gënanga ikilianga.

⁵⁵Ngohi magogiriaka Takilianga o Babel deʼ Tohigumal̄aokaua hagala manga rame mailingi. Manga haturu yoboa hokä o moku-moku malulu maruruhu, deʼ manga tentara yangohama de ihi boa-böaka o parangi.

⁵⁶Onanga yoboa la yakilianga o Babel, yätagoko manga tentara deʼ yatobiki hagala toönanga manga dae. Ngohi ma Jou tahukumu o dorou, deʼ o Babel aha Tabalahi imamoteke de toënanga mamanarama.

⁵⁷Ngohi aha tadiai o Babel mapopareta mapopegawe yädaluku — hagala yososawaro, manga tutuda de o tentara. Onanga aha yomomikokaua, yäkioko kahiado-adonika. Ngohi totemoka; Ngohi ma koano, Ngohi ma Jou Duru Tokokuaha.

⁵⁸O Babel mabebeno o mehele ikökua-kuata aha Tawedere hiädono irata deo tonaka. Mangorana ilago-agomo magö gurutil̄e aha Tatuhuku tamata-mataka. Parasuma dika hagala o hoana deo berera manga huha de manga kangela, hababu toönanga manga karajanga mahasili mata-mata aha o uku ma inomo. Ngohi, ma Jou Duru Tokokuaha, totemoka.”

⁵⁹Iwi gögoa-goana ma Koano Zedekia ganga o Seraya o Neria aingohaka o Mahseya ai danongo. O taongo maiatoka o Zedekia o Yehuda manga koano ai popareta, o Seraya winïki Zedekia o Babelika. De ngohi tihidöaka unangika moi o manarama.

⁶⁰Mata-mata o bodito aha yatotapal̄u o Babel deʼ o hali-o hali mahomoa tatulihoka moi o buku ilüluluino magoronaka.

⁶¹Daha ngohi tï temoo Serayaika. ”Nako ngona noma hiadonoka o Babelika, nohidailako hupaya mata-mata ituli-tulihoka o buku nënanga magoronaka yakunu ngona nädabasa hagala o nyawaika dokengoka.

⁶²Genanga deiböto nomä niata hoko nënanga, ’Jou, Ngona notemoka o kota nënanga aha Ngona nawedere hiädono kayaoa o nyawa kayaoa o aiwani ihihangoka mata-mata, deʼ o ngï nënanga imadadi hokä o tonaka ikokakaha kahiado-adonika.’

⁶³ Aa, nadabasaoka madol̄a o buku nënanga hagala o nyawaika gënanga, naliko o helewo o bukuika nënanga, daha nohikaweli o Efrat ma Ngairi mahidö dogoronaika inoli notemo,

⁶⁴’Hoko nënanga aha idadi deo Babel. O berera nënanga aha yalutu deʼ ipudaokaua karana ibodito wohitotapal̄u ma Jou ena nguku.’ ” O Yeremia ai demo-demo mabobaha nenangoka.