Read Tobelo O YEREMIA 52 Bible Online

O YEREMIA 52 - Tobelo bible

O YEREMIA 52

¹O Zedekia ai umuru o taongo monaoko de moi maöraha ünanga wodadi o Yehuda manga Koano. Unanga wopareta o Yerusalem mabereraka o taongo ngimoi de moi madekana. Ngoi ayo ami romanga ongo Hamutal, o Yeremia ngoi ora o Libna makotaino.

²Hokä ma Koano Yoyakim, ma Koano Zedekiaöwo baradoha ma Jouika.

³Ma Jou duru wa ngamo o Yerusalem deʼ o Yehuda manyawaika hiädono Unanga wäduhu önanga deʼ Wa goanokaua önanga. O Zedekia womalawani o Nebukadnezarika o Babel manga koano,

⁴ karana gënanga o Nebukadnezar de yongodumu aitentara yopoparangi yoboa deʼ yaparangi o Yerusalem mawange ngimoioka mamede ngimoi o taongo hiwo o Zedekia aipareta magoronaka. Onanga ihigoko manga tentara mabalu-baluhu manga ngï o kota maporetoka, ihigoko o bebeno o mehele mangale yoparangi

⁵deʼ ihigila-gilahi higiloliti o kota gënanga hiädono o taongo ngimoi de moioka o Zedekia aipareta.

⁶Mawange hiwoka o mede maiatoka o taongo genangoli, maoraha o habirokata hoko gënanga magiria hiädono o kawaha hakali-kali koiwaka manga inomo,

⁷ o kota mabebeno o mehele o haturu yakilianga. O hutu gënanga, ngaroko o Babel manyawa manga gogiriaka i higilolitino o kota gënanga, mata-mata o Yehuda manga tentara yo piringana ihioara manga diri yameta o Yordan ma Wai. Onanga yal̄ë o ngekomo yatobiki o kadato madumule, daha yohupu yanonu o ngorana ilago-agomo ima dohanga de o bebeno o mehele hinoto genangoka.

⁸Mä o Babel manga tentara iwiginïki ma Koano Zedekia deʼ iwitagoko o Yerikho matonaka ilua-luasoka. Mata-mata ainyawa iwinï ninïki iwï dogumal̄aika ünanga.

⁹De ipaha ma Koano Zedekia iwiao ma Koano Nebukadnezarika o Ribia makotaka o Hamat madaeraka, daha iwigelenga o hukumanga iwi hohonenge.

¹⁰O kotaka gënanga aingoha-ngohaka yätoma ai himangoka, deʼ mata-mata o Yehuda mapopareta mapegawe ma yätoma.

¹¹ Genanga deiböto o Zedekia ai lako yatubalenge, daha iwi rante deʼ iwiao o Babelika. Dokengoka ünanga iwihingohama o buika deʼ komaiwa wohupu genanginodau hiädono maoraha ünanga wohonenge.

¹²Mawange ngimoioka mamede motoaka o taongo ngimoi de hiwo o Nebukadnezar o Babel manga koano ai popareta, womatengo ai romanga o Nebukadnezar woboa o Yerusalemino. Unanga ganga wï nonasihati deʼ iwï goa-goana o Nebukadnezar manga häeke.

¹³ O Nebukadnezar watuhuku ma Jou Ai Tau, ma koano ai kadato, deʼ mata-mata o nyawa yahöheto-hetongo o Yerusalem mabereraka.

¹⁴Daha mata-mata ainyawa iwinö ninïki yatopaha o kota ma bebeno o mehele gënanga.

¹⁵De ipaha o kawaha kanagaohi o kotaka, enagënanga mahou-houohi yososawaro yokarajanga, hagala o nyawa o mihikini, deʼ hagala o nyawa yopopiringanoka o Babel manyawaika, mata-mata o Nebukadnezar wätoraka o Babelika.

¹⁶Mä mahononga moi o kawaha duru yomö mihikini deʼ koiwa-iwa manga arata, wämal̄aika o Yehuda mabereraka, deʼ wähuloko yakarajanga o angguru madumule deʼ hagala o dumule.

¹⁷ O liate-liate o tabaga deʼ hagala o kereta ma Jou Ai Tauoka kamamoi deo bohoko o tabaga yapootekoka o Babel manyawa, daha mata-mata matabaga yatorakoka toönanga manga bereraika.

¹⁸Onanga yatoraka o bara-baranga nënanga: hagala o huhugara o huhuba makafo mangï, hagala mapakakaha o hilo, hagala o mangko ihi taku-takunu o aiwani yatoa-toaka mangale o huhuba ma awunu, hagala o mangko mangale o dupa yöduhuku, deʼ mata-mata o tabaga mahomoahi yapö pake-pake mangale o pupuji maupacara.

¹⁹O bara-baranga o gurasi deʼ o haaka, ihide etongo hagala o mangko mahohumujuru deʼ o uku mangaboho mangï, hagala o mangko o aiwani yatö toa-töaka mangale o huhuba ma awunu mangï, o kafo mangï, o hilo ma l̄ou, hagala o mangko o dupa mangï, deʼ hagala o mangko mangale yöguhe-guhe o huhuba o angguru ma akere, mata-mata o Nebukadnezar mahirete wal̄ë.

²⁰O bara-baranga o tabaga ma Koano Salomo wododiai mangale ma Jou Ai Tau, enagënanga maliate hinoto, o kereta, o bohoko deʼ o hapi ngimoi de hinoto yatö tiki-tiki il̄e o bohoko gënanga, mata-mata hoko gënanga madubuho hiädono yakunua ihidi tibanga.

²¹O liate o tabaga hinoto gënanga imatero: moi-moi ma gurutil̄e o metere tufange, mabululunino o metere motoa de o senti moruange, deʼ magoronail̄e kamahomoa. Matabaga mabirini o mili mori tumidi de motoa. Maliate yögetongo ma l̄okuoka naga maliate mahaeke magurutil̄e o metere hinoto deo senti monaoko. Maliate mahaeke magilolitino gënanga naga o kokaraja ihiporomuika o delima mahohoko mata-mataö kadeo tabagali.

²³O delima mahohoko o kokarajaka o liate mahaeke yögetongo gënanga naga o ratuhu moi, mä duga-duga morihiwo de butanga kahö lega-legail̄e.

²⁴Mahomoa de gënanga, o Nebukadnezar wätagoko o Seraya ma Imam womo Mulia, ai wakili o Zefanya, yäruange ma Jou Ai Tau ma ngorana magogoana,

²⁵yatumidö iwi nonasihati ma koano kanagahi o kotaka, makapita, makapita ai wakili wohidö dailako o tentara manga juru tulis, deʼ yamoributangahi o pangkati ma ago-agomo.

²⁶Mata-mata o nyawa geönanga yä ao ma Koano Nebukadnezarika o Ribla makotaka, o Hamat madaeraka.

²⁷Dokengoka önanga yähangihara, daha yätoma. Hoko gënanga hagala o Yehuda manyawa yätoraka toönanga manga bereraka deʼ yä ao o tabuanga mangï ika.

²⁸Mata-mata naga yaribuhu iata de yäratuhu butanga. O Nebukadnezar wätoraka önanga wögogilio: ai popareta o taongo matumidoka yaribuhu hange deyamonaoko de yaruange, ai popareta o taongo ngimoi de tufangeoka yaratuhu tufange deya moruange deyahinoto o Yerusalemino, deʼ yaratuhu tumidi deya moruata deya motoa o Nebuzaradan wätoraka mataongo monaoko de hangeoka o Nebukadnezar ai popareta.

³¹Mawange monaoko de motoaka o mede ngimoi de hinoto o taongo mamoruange de tumidi o Yoyakhin iwi toraka o tabuanga mangï ika ipahaika, o Ewil-Merodakh wodadi o Babel manga koano. O taongo gënanga ünanga wohimatoko ai dora de ai hayangi o Yoyakhinika, deʼ wihihupu ünanga o buino,

³²inoli wihidiai yaoa-oa. O Yoyakhin wihidöaka o pangkati iholoi ikurutil̄e deo o kokoano mahomoa onangö yotabuanga o Babelika.

³³Unanga iwihigumal̄a watagali ai pakeanga o bui mapakeanga deʼ wohigila-gila ai wowango madekana ünanga yakunu wol̄omo o kadatoka, deʼ o wange ihi getongo iwihidöaka o tiwi mangale ai wowango maparalu.