Read Tobelo O YEREMIA 6 Bible Online

O YEREMIA 6 - Tobelo bible

O YEREMIA 6

¹Nioiki nimahidotoko, hei o Benyamin manyawa! Niamal̄a o Yerusalem! Niawuwu o trompet o Tekoa mabereraka, deʼ o uku niatokaril̄e o nonako o Bet-Kerem mabereraka. O huha deʼ o bodito malago-agomo aha iboa o koremieil̄e.

²O Sion makota duru ihailoa, mä ma Jou aha wawede-wederuku;

³yokokuaha aha imä tau dokengoka de manga tentara. O kota gënanga magilolitino önanga aha ihibeloho toönanga manga tenda-tenda, moi-moi mangï yöigo-igoka.

⁴Onanga aha yotemo, ”Ika, homa hidiaila höngika o Yerusalem! Niaino ngone hängohama o wange nënanga!” Mä deipaha önanga aha yotemoli, ”Uwee hotaituaholi! O wange i mulaengoka ihuhutu, o gurumini imulaengoka ikurutil̄e.

⁵Kayaoa de ngone hängohama o hutu-hutu, deʼ hawedere toönanga manga kota mabebeno o mehele gënanga.”

⁶Ma Jou Duru wokokuaha wahi paretaka yokokuaha gënanga hupaya yatol̄anga hagala o gota mautu deʼ ihigoko yodiai o tonaka yatotoporonil̄e lai higilolitino o Yerusalem. Ma Jou wato, ”O kota nënanga aha Tahukumu karana magoronaka yadiaioka duru kahangöe yätuku o nyawa.

⁷Hokä sarakia o akere malako kahirahi ihihupu o akere mamamäta, hoko genangoli o kota gënanga kahirahi mahasili o dorou. Duga-duga o abari yängamo deʼ yaora hoihene mata-mata o kotaino gënanga; o nabo deʼ o panyake hamake kiaika honanga.

⁸Hei o Yerusalem manyawa, kokiani o huha mata-mata gënanga idadi o hohininga nginika! Uha hiädono Ngohi tinï dogumal̄aika ngini deʼ Tangali niakota idadi o tonaka ikokakaha moiua o nyawa yögogere.”

⁹Ma Jou Duru Wokokuaha wohitemo ngohino, ”O Israel aha yäkori hiädono yamata-mataka hokä o angguru madumule mahohoko yapageloka mata-mata. Karana gënanga, magogiriaka nagaohi o öraha, hahihalamati mahouohi.”

¹⁰Ngohi tohaluhu, ”Jou, o nagonaika kokiani ngohi tätemo-temo, deʼ o nagona kokiani tahidöaka o hohininga? Onanga manga häeke itogowini deʼ yoluku yöhininga ihidodiai. Onanga yögogiete deʼ yödohata Ani behehongo tohiado-adono onangika.

¹¹Ani dohataö hokä o uku mangaboho ahi diri magoronaka, Jou! Ihuha tatumungu.” Dema Jou wato, ”Nohiaiki ani dohata gënanga manga ngoha-ngohakika o ngekomo ma amokoka deʼ o gikiri magöika magogiriaka imatoomuino. O nau-nauru deʼ o ngongoheka aha yätagoko, deʼ o nyawa manga umuru ikökurutil̄eoka aha koyo otanua.

¹² Toönanga manga tau aha yahidöaka o nyawa mahomoaika, hoko genangö hagala manga dumule deʼ toönanga manga heka-hekata. Yogögogere o berera nënanga aha Tähukumu.

¹³Onanga mata-mata, yolago-agomo deyo alu-aluhu yolingiri o utumu mangekomo itiaiua. Maboboloi ma nabi deʼ ma imam ma yätipu o nyawa.

¹⁴ Ahi umati manga nabo-nabo önanga yapulono o nabo ma alu-aluhu dika. ’Aa, yadodoaua,’ mata-mata kayaoa-oa deʼ kai riridi. Enahioko duru mata-mata kowali.

¹⁵Kokiani önanga yämal̄eke karana yadiaioka mata-mata okiaua yadae-daene gënanga. Mä önanga manga biono ipirini deʼ yanakoua o mal̄eke. Karana gënanga önanga aha yäotaka hokä o nyawa mahomoa; koiwaka toönanga manga jarita nako Ngohi tähukumu önanga. Ngohi, ma Jou, totemoka.”

¹⁶ Ma Jou wätemo Ai umatika, ”Nimaokoino hagala o ngekomo madupukoroka, deʼ niatailako nihidodiai! Niöleha hagala o ngekomo mahiraino, deʼ mahidogoronaka kiaka iholoi yaoa. Nia nonu o ngekomo gënanga, hupaya ngini niwango kairorahai.” Mä önanga yato, ”Kowali, ngomi mioluku mianonu o ngekomo gënanga!”

¹⁷Dema Jou wohi gali-gali wägoraka yogoa-goana la yahidöaka o hohininga önanga hupaya yoihene o trompet mahinonako. Mä o kawaha yato, ”Ngomi mioluku mi ihene.”

¹⁸Hababu gënanga ma Jou wato, ”Ni ihene hagala o hoana deo berera! Ngini kokiani nihioriki okianaga aha idödadadi Ahi umatika.

¹⁹Nia tailako nihidodiai, hei o dunia! Ahi umati yoluku yatarima Ahi dodotoko deʼ ihi hingounua Ngohino. Hokä toönanga manga hidailako mahasili Ngohi tädotagao o bodito onanguku.

²⁰Yohidodoa o manyanyi önanga yoao-ao o Syebaino mangale Ngohi, ekola o rampa-rampa o berera magö gurutino? Taoluku Ngohi tatarima toönanga manga huhuba. Ngohi töigoua toönanga manga huhubaika itötuhu-tuhuku.

²¹Ngohi aha todadi o hababu hagala o nyawa neönanga yopel̄eke deʼ yaotaka. O ama deʼ o ngohaka, manga dodiawo deʼ imakokadateke mata-mata yobinaha.”

²²Ma Jou wato, ”Moi o hoana deo berera yokua-kuata magogiria imakelu o berera magögurutoka de yaino o koremieil̄e. Onanga yoboa mangale yoparangi.

²³Onanga manga dae o toimi deʼ o kuama; önanga yöigo yoaniaya deʼ o apongo yanakoua. Hokä o ngöto iluluaka mailingi hoko gënanga madibingi toönanga manga kuda imapopata magogiria imateke rorebe yöngohama o Yerusalem.”

²⁴Yoihene o abari nënanga, o Yerusalem yogögogere yodadi okia-kiaokaua yakunu. Onanga yahokotino o hawana mamamao, deʼ yamao yohangihara hokä o ngoheka ami ngohaka imau ima kil̄au.

²⁵Onanga yobaraniua youti o ngekomuku ekola yoiki o dumuleika, hababu okiaka dika o haturu de manga daeoka yodiai o aniya.

²⁶Ma Jou wätemo Ai umatika, ”Niapake o ngoere o karongo deʼ nima lü lulu o kafo magoronaka. Niapake o huha mapakeanga deʼ nidodora de niahininga ihuha hokä o nyawa yogari manga ngohaka ima tengo-tengoka ihonenge, hababu inï bobinaha aha itodokanino inï ngino ngini.”

²⁷Dema Jou wïtemo o Yeremiaika, ”Nä uji Ahi umati, hokä ngona nauji o gurasi. Natailako toönanga manga kalakuanga!

²⁸Onanga mata-mata yotoba lawani manga häeke itogowini, madogowini hokä o tabaga deʼ o behi. Onanga imadiai itorou deʼ yotagi kiaika honanga la ihibarihi o abari yädadi dorou o nyawa mahomoa.

²⁹Yaui-uihi o gurasi duru kaha haukoka, mä o gurasi mapeseke iolukohi iuihi deʼ ihihanga. Parasuma Ahi umati kahoko genangika yäuji la yatebini, hababu manga nyawa yototorou yatingakua.

³⁰Onanga aha yahiromanga o haaka yaumo-umoika, hababu Ngohi, ma Jou, tä umoka önanga.”