Read Tobelo O YEREMIA 7 Bible Online

O YEREMIA 7 - Tobelo bible

O YEREMIA 7

¹Ma Jou wohihuloko ngohi toiki Ai Tauika deʼ toma okoino o ngorana malamo-amokoka yonönonu o Yehuda manyawa yaino-ino yo puji. Unanga wohi huloko ngohi tohingahu Ai behehongo nënanga onangika, ”Niangali, nia kalakuanga deʼ nia wowango madodagi, done Ngohi, ma Jou Duru Tokokuaha, o Israeloka manga Jou Madutu aha wini higumal̄a ngini kahirahi nigogere nenangoka.

⁴Uha nia ngaku yotipu-tipuika yotö temo-temo, ’Ngone horirïdi, hababu nënanga ma Jou Ai Tau. Igoungu nënanga ma Jou ai Tau!ʼ

⁵Niangali nia wowango deʼ nia kalakuanga. Nimadiai niadili o nyawa moi deo nyawa moika.

⁶Yakunokaua niä tuku o nyawa dagi-dagino, o ngohaka o gohihi, deʼ o ngoheka bobao. Uha niatoma o nyawa yahowo-howonua o bereraka nënanga. Uha niahuba hagala o gikiri mahomoa, hababu o hali gënanga aha inibinaha ngini.

⁷Nako ngini niangali nia wowango madodagi deʼ nia kalakuanga inoli nimatogumu nidiai gënanga mata-mata, Ngohi aha tinï higumal̄a ngini kahirahi nigogere o bereraka nënanga tahidoa-doakoka hokä o tonaka o puhaka nia ete de nia tohoraika.

⁸Mä, igoungu parasuma dika ngini ningaku o tengeluku mademo-demoika.

⁹Ngini nitohiki, nitoma, nihowono, nihidöaka o hakihi i elu-eluku, nihihuba o huhuba o Baalika, deʼ niahuba hagala o gikiri ngini nia nako-nakoua.

¹⁰Mata-mata gënanga ngini nidiai deiböto, ngini niboa nihï himanga Ngohi nenangoka Ahi Tauoka mahirete, deʼ nitemo, ’Ngomi mia rirïdi!ʼ Deipaha ngini nihi gila-gila niamanarama ha emo-emono gënanga.

¹¹ Boteka ngini niapulono Ahi Tau nënanga yoora-ora manga igutu? Mata-mata niamanarama tamakeoka.

¹² Nioiki o Siloika, o kota madodihiraka Ngohi tairiki idadi o pupuji mangï Ngohino. Niolega okianaga Tadodiaioka o ngï ika gënanga karana Ahi umati o Israeloka manga baradoha.

¹³Ngaroko tohigali-gali Ngohi tinï temo-temo nginika, ngini nioluku nihigihene. Ngini niadiai o baradoha gënanga mata-mata, deʼ nioluku nihaluhu nako Ngohi tinïahoko.

¹⁴Aa, Ahi Tau ngini nihi lamo-amoko, deʼ o ngï tahidoa-döaka nia ete de nia tohoraika deʼ nginika nënanga aha Tadiai hokä o Silo kahuruono.

¹⁵Ngini aha tinïduhu Ahi himangoka hokä Ngohi täduhuoka nia roriadodoto, o Israel manyawa.”

¹⁶Ma Jou wohitemo, ”Yeremia, uha nomä niata mangale o nyawa neönanga. Uha nogahoko o roriwo ekola nomä niata mangale önanga; uha nohigegoto Ngohi, hababu Ngohi toluku toihene o gogahoko gënanga.

¹⁷Ngona namakeoka mahirete okianaga önanga yodiai o Yehuda makotaka deʼ o Yerusalem mangeko-ngekomika!

¹⁸ O ngoha-ngohaka yotoomu o gota ihidofo-dofo, o nau-nauru yodofo o uku, deʼ o ngongoheka yosapuru o gapuno la yodiai o kukisi mangale manga gikiri o ngoheka önanga ihi romanga o Horoga ma Koano o ngoheka. Deʼ mangale yahiri Ahi hininga, onangö ihihuba o angguru mateongo hagala o gikiri mahomoaika.

¹⁹Mä igou-goungu, Ngohiua önanga yahiri Ahi hininga, duga-duga toönanga manga diri mahirete hiadono önanga yämal̄eke.

²⁰Ngohi, ma Jou Duru Tokö kurutil̄e, aha tahitapal̄u Ahi dohata yömodo-modongo o pupuji matauuku nënanga, o nyawa deʼ o aiwaniuku, hagala o gota mautu ukuö deʼ o tonaka mahasili. Ahi dohata aha ihiru-hiru hokä o uku koyakunua yahohonenge.”

²¹Ma Jou wätemo, ”Hei Ahi umati, ngini nihioriki o huhuba ngini niatö tuhu-tuhuku o huhuba mangï ma l̄okuoka kokiani nia tuhuku hiädono nia mata-mataka, deʼ o huhuba mahomoa yakunu ngini nia ol̄omo. Mä Ngohi, ma Jou wato, ikadika nia ol̄omo mata-mata!

²²Maöraha Ngohi tä ao nia ete de nia tohora o Mesir mabereraka deyo hupu, Ngohi tahidoakua önanga o datoro mangale o huhuba yatö tuhu-tuhuku ekola hagala o huhuba mahomoa.

²³Ngohi duga-duga tahipareta önanga la ihihingounu Ngohi hupaya Ngohi idadi toönanga manga Jou Madutu, deʼ önanga yodadi Ahi umati. Ngohi tahuloko önanga yowango yamoteke hagala Ahi pareta hupaya önanga yosanangi.

²⁴Mä önanga yoluku ihigihene deʼ yoluku yöhohininga. Onanga kaidogo yödomoteke toönanga manga hininga mamau mahirete itotogowini deʼ itotorou gënanga. Onanga yodadiua yaoa-oa duga-duga yodadi iholoi yatorou.

²⁵Imulaenge manga ete de manga tohora o Mesir matonakoka deyo hupu hiädono o wange nënanga Ngohi salalu tähuloko Ahi gogilaongo, o nabi-nabi, nginika.

²⁶Mä moiua naga ihigihene ekola yöhohininga. Ngini kaidogo idadi iholoi niahäeke itogowini deʼ itorou ngaro de nia ete de nia tohora.”

²⁷Deipaha ma Jou wato, ”Karana gënanga, hei Yeremia ngaroko ngona nohingahu mata-mata gënanga Ahi umati, önanga aha yoluku yöhohininga ani demo-demo. Ngaroko ngona näahoko önanga, önanga aha koyohaluhua.

²⁸Ho, nahetongo onangika önanga ganga moi o hoana deo berera yoolu-oluku ihingounu Ngohino, ma Jou, toönanga manga Jou Madutu. Onanga yoluku imä dotoko o hukumangika yamao-maoka. Manga satia Ngohino ihihangoka, kaidogo ihi ade-adeokaua.”

²⁹Ma Jou wätemo, ”Hei nigögogere o Yerusalemoka, nimahipake o huha ma pakeanga! Nia kori nia tadauru deʼ nia umo! Nihi nyanyi o dodora manyanyi ol̄oku mabuturungu matubuoka, hababu Ngohi, ma Jou, magogiria ihi tohata deʼ tinï umoka ngini mata-mata.

³⁰O Yehuda manyawa yodiaioka o dorou. Hagala toönanga manga gomanga Tödoha-dohata gënanga önanga ihi gogeroka Ahi Tau magoronaka, hiädono yapeseke.

³¹ O gahumu moi o huhuba mangï maromanga o Tofet önanga ihigokoka o Hinom ma Waioka la ihihuba toönanga manga ngoha-ngohaka hokä o huhuba yatötuhu-tuhuku. Enahioko Ngohi komaiwa tähuloko yadiai o hali gënanga, maboboloi komaiwa o hali marupa hokogënanga ipuda Ahi dibanga magoronaka.

³²Karana gënanga, aha iboa maöraha o ngï gënanga yahetongokaua o Tofet ekola o Hinom ma Wai, duga-duga yä Toa-toaka ma Wai. O tonaka gënanga aha idadi o jere matonaka karana koiwa naga o ngï mahomoa.

³³Toönanga manga maiyeti aha idadi o totaleo deʼ o aiwani madorou mainomo, koiwa naga yöduhu.

³⁴ O berera nënanga aha idadi o tonaka ikokakaha. O morene mailingi deʼ o kawingi marameanga mailingi aha tohibareti o Yehuda makotaka deʼ o Yerusalem mangeko-ngekomika.