Read Tobelo O YEREMIA 8 Bible Online

O YEREMIA 8 - Tobelo bible

O YEREMIA 8

¹Ma orahoka gënanga o kokoano manga kobongo deʼ o pegawe-pegawe o Yehuda mabereraka manga popareta, o imam-imam o manga kobongo, o nabi, deʼ o Yerusalem yögogogere mahomoa aha ihihupu toönanga manga lungunil̄e,

²yatoomua deʼ yalungunokaua, duga-duga yamal̄aika o tonakoka hokä o wal̄e. O nyawa geönanga manga kobongo aha ihi barihika o wange malako, o mede deo murumu mahimangoka önanga ima higiki-gikiri, yöhohininga, yöloleleani, yahö huba-huba, deʼ yogaho-gahoko o hidumutu.

³Done hagala o nyawa kayo wango-wangohi o hoana deo berera madorouino nënanga yahi kokitingakoka kiaika honanga aha iholoi yöigo yohonenge ngaro deyo wango. Ngohi, ma Jou Duru To kokuaha, totemoka.”

⁴Ma Jou wohihuloko ngohi tahetongo Ai umatika hoko nënanga, ”Nako o nyawa woruba, marai ünanga aha womomikoli, deʼ nako o ngekomika dewo hihanga marai ünanga aha womakilioro.

⁵Mä yadodoaho ngini, Ahi umati, kanihigila-gila nirehene deʼ nihimal̄aika Ngohi? Ngini nimahijojo ikekete nia gomangika, deʼ nioluku nimakilioro Ngohino!

⁶Ngohi tohigihenoka tohidodiai, mä ngini nitemo koiwa itiai. Kaimatengoö de moiua nginino imatoduba manga manarama itotorou. Moiua naga yotemo, ’Okia ahi howono?ʼ Ngini mata-mata nianonu niangekomo mahirete hokä o kuda yöngohama o parangi magoronaika.

⁷O totaleo o hueko mayanako maöraha la ilio; o pombo furu, o totaleo o awana magagawi deʼ o baikoleö yanako yatururu mangï. Mä ngini, Ahi umati, nihiorikua hagala Ahi tita tohidö doa-döaka nginika.

⁸Duru nibarani ngini nitemo ngini nibarija, deʼ nihioriki hagala Ahi tita! Abeika niolega sarakia duru yososawaro o agama, yorö rusi-rusi yangali hagala Ahi tita gënanga!

⁹Yososawaro nia hidogoronaka aha yahimal̄eke. Onanga aha ihiorikokaua ihi akali deʼ yätagoko. Onanga yoluku yatarima Ahi nasihati; öraha nënanga o barija okiahi naga onangoka?

¹⁰ Karana gënanga Ngohi aha tohidöaka toönanga manga dumule o tonaka madutu mahomoaika deʼ toönanga manga hekata o nyawa mahomoaika. Onanga mata-mata, yolago-agomo de yoalu-aluhu, imä lingiri o utumu deo ngekomo iriko-rikotua. Maboboloi o nabi deʼ o imam mayä tipu o nyawa.

¹¹ Ahi umati manga nabo-nabo önanga yapulono o nabo maiteteke dika. ’Aa, koyadodoaua,’ önanga yato, ’mata-mata kayaoa-oa deʼ irirïdi.’ Enahioko hakali-kali kowali.

¹²Hei Ahi umati, kokiani ngini inï mal̄eke karana, nia diaioka mata-mata okia-kiaua yadae-daene gënanga! Mä ngini niabiono ipirini deʼ o mal̄eke nianakoua. Karana gënanga ngini aha inï otaka hokä o nyawa mahomoa yaota-otakoka; koiwaka nia jarita nako Ngohi tinihukumu ngini.

¹³Ngohi duru töigo tätoomu Ahi umati hokä o nyawa watoomu ai tonaka mahasili. Mä Ahi umati hokä o angguru ma gota mautu deʼ o ara magota mautu ihöhohokua, maboboloi mahoka-hoka ma imaaioka. Mahababu gënanga Ngohi tahigumal̄aka o nyawa maporetino yoboa deʼ yakuaha toönanga manga berera. Ngohi, ma Jou, totemoka.”

¹⁴”Yadodoaho ngone kökia-kiaua hodiai?” ma Jou Madutu Ai umati yato. ”Niaino ngone kamamoi homahiditoko o kota-kota ma bebeno o mehelika, mal̄aika ngone hohonenge dokengoka. Ma Jou nanga Jou Madutu waputuhoka kokiani ngone hobinaha. Unanga wonahidoakoka ngoneino o rasongo la haokere hababu ngone hobaradohaka Unangika.

¹⁵Parasuma dika ngone honganono o dame deʼ maöraha hotogumu, hababu naga duga-duga höboborohono.

¹⁶O haturu naga o Dan makotaka; toönanga manga kuda mailingi högihenoka, deʼ o berera yamode-modekika idadi yohawana. O haturu yoboa la yabinaha nanga berera yamode-modekika deʼ mata-mata yögogogere.”

¹⁷”Niatailako nihidodiai!” ma Jou wato. ”Oraha nënanga Ngohi tohidingoto hagala o dodiha niahidogoronaka la inï tuduku ngini, o dodiha ibiha-biha yakunua o matara yadaene.”

¹⁸Ahi hininga yal̄abo deʼ mahiri, ahi hininga mahuha yahouru yakunua.

¹⁹Ni ihene! O berera yamode-modekika igiloango yopöaka yoari ahi hoana de ahi berera yolö leha-leha, ”Kowiwakali ma Jou o Sion maberera? Kiaka waika manga koano örahanënanga?” Ma Jou toönanga manga koano, wohaluhu, ”Yadodoaho ngona noma hitudukuku nahuba hagala o gikirika hakali-kali koiwa mafaida? Yadodoaho Ahi hininga nahiri dena huba hagala o gomangika?”

²⁰O Israel manyawa yopöaka, ”O gugutuku maöraha deʼ o ngogoro maöraha o öraha nanga yatilakuru, mä ngone hamakeuahi o halamati.”

²¹Ahi hininga iwede-wederuku karana ahi hoana de ahi berera yopanyake yotodihiri; ngohi tapake o huha mapakeanga deʼ ahi hininga ihuha.

²²Okia idadi hababu hiädono ahi hoana de ahi berera hiädono o oraha nënanga koyotogumowahi? Boteka o Gilead yamode-modekika, koiwa naga o dotere ekola o houru?