Read Tobelo O YEREMIA 9 Bible Online

O YEREMIA 9 - Tobelo bible

O YEREMIA 9

¹Duruhe yaoa nako ahi haeke hokä o humu ma akere ioma-omanga, deʼ ahi lako hokä o heheli ma akere ihähahuru! Done ngohi yakunu toari o hutu deʼ o wange, tadodora mima kohoana deo berera moi manga haturu yätoma-toma.

²Nako o tonaka ikokakahaka yakunu tamake o ngï ima hidodogumu o nyawa o dodagi magoronaka! Done ngohi aha tamal̄aika ahi hoana de ahi berera, deʼ topiringana dokengika la tokurutika dede önanga. Onanga mata-mata yososatiaua, o nyawa yososatiaua manga doomu,

³deʼ salalu imahidiai la yoeluku. O berera yamode-modekika, o diai ikuahaua maboboloi o hininga iriko-rikotua ima hihininga mahuka. Ma Jou wato, ”Ahi umati yodiai o dorou imatogu-togumua, önanga yomangakua Ngohi hokä toönanga manga Jou Madutu.”

⁴Manga dodiawoika, o nyawa moi-moi kokiani ima hidodiai deʼ manga riadodoto madutu ma yakunua yängaku. Hababu hokä o Yakub hoko genangoli önanga, o nyawa moi-nyawa moi yätipu manga riadodoto. O nyawa moi-moi yotagi okiaika honanga la ihibarihi o fitana deʼ o tengeluku.

⁵Mata-mata imakokitipu, moiua naga yotemo itiai. Manga uru yabiahaka ielu-eluku, önanga yapoaua yamal̄a manga baradoha. Manga hayanga koiwa itagali manga hayanga koiwa imakitipu itagali imakitipu kahokohenangika önanga yodiai, önanga koma moiuku iwitila ma Jou.

⁷Hababu gënanga ma Jou Duru Wo kokuaha wato, ”Hokä o gurasi, Ahi umati aha täuji hupaya önanga idadi yotebini. Okiaoli takunu tadiai Ahi umatika yadodiaioka o dorou?

⁸Toönanga manga demo-demo duru demaboditoka, kayakunu yä hohonenge hokä o toimi madoto demabihaka. önanga yahö heto-hetongo mata-mataka o tengeluku. Toönanga manga demo-demo imutiti nanga hininga yadaene maimoteke madiai önanga ihiakana o modoi.

⁹Kiakaö de yakunu o hoana deo berera marupa hoko nënanga Tohitapal̄ua o hukumanga imadö dae-daene? Aha tabalahi toönanga manga manarama: Ngohi ma Jou, totemoka!”

¹⁰Ngohi, o Yeremia, totemo, ”Ngohi tomau toari deʼ tapake o huha mapakeanga karana o momo o tonaka ilua-luasi o tonaka ikokakahaka deʼ hagala ol̄okuoka duru itore-toreoka ikali moiua o nyawa yanonu. O aiwani o gigini mailingi yoihenokaua, o totaleo deʼ aiwani mahomoa ipiringanoka deʼ ihihanga.”

¹¹Ma Jou wato, ”O Yerusalem aha Tadiai o rutuku o kaho o honganika mangï imangiunu. O Yehuda makota-makota aha idadi kai rïdika, o ngï yögo gogerokaua.”

¹²Ngohi toleha, ”Jou, yadodoaho o berera nënanga yamal̄aika mamomo koiwaka deʼ yödudungu hokä o tonaka ikokakaha hiädono moiua yakokaino? Boteka naga yososawaro la yomangarati mata-mata nënanga? O nagunaika nihidoakoka o hitararono hupaya ünanga wakunu wohigila-gila o nyawa mahomoaika?”

¹³Ma Jou wohaluhu, ”Genanga idadi karana Ahi umati yolukoka yohininga hagala Ahi dodotoko Tahidoa-döaka onangika. Onanga ihihingounua Ngohino, deʼ yoluku yamoteke Ahi pareta.

¹⁴Onanga manga häeke itogowini deʼ yahuba o Baal magomanga hokä yädoto-dotoko manga ete de manga tohora.

¹⁵Karana gënanga, noihene okianaga Ngohi, ma Jou Duru Tokokuaha, o Israeloka manga Jou Madutu, aha tadiai; Ahi umati aha Tahidöaka o dadatomo mamali-mali la yaol̄omo deʼ o rasongo la yaokere.

¹⁶Onanga aha Tahikabarihi o hoana deo berera yanako-nakoua önanga ekola toönanga manga ete de manga tohora manga hidogoronaka. Ngohi aha igila-gila tahidingoto o tentara yängika önanga hiädono Ngohi täbinaha önanga mata-mata.”

¹⁷Ma Jou Duru Wokokuaha watemo Ai umatika, ”Niatailako nihidodiai okianaga magogiriaka idadi o bereraka nënanga, deʼ itaiti nia ahoko yododora. Niahuloko önanga yoboa deʼ ihi nyanyi o huha deo duka manyanyi.”

¹⁸O Yehuda manyawa yotemo, ”Niahuloko önanga itai-taiti ihinyanyi o huha deo duka manyanyi mangale ngone mata-mata, hupaya nanga kongo irero yapehaka nanga gotoaka.”

¹⁹O Sion makotaka hoihene o gari mailingi, ”Ngone hobinaha deʼ duru inahimal̄eke. Tongone nanga berera kokiani ngone hamal̄a, tongone nanga tau yakilianga ihikokabarihika.”

²⁰Ngohi tätemo, ”Ni ihene ma Jou Ai demo-demo, hei o ngongoheka mata-mata! Nia momoholehika niädotoko o dodora manyanyi, niadodiawoika o huha deo duka manyanyi.

²¹O honenge iwohamoka yanonu o jangela, yödotaroka o kadato magoronaika; ënanga yägoli o ngoha-ngohaka o ngekomoka inoli o gogoduru o tonaka ilua-luasoka.

²²O maiyeti ihikabarihi okia honanga hokä o wal̄e o tonaka mal̄okuoka; hokä o gandum yautukoka deyo dogumal̄aika deʼ koya toomuokaua. Genanga ma Jou Ai behehongo kokiani tohingahu.”

²³Ma Jou wato, ”O nyawa wososawaro yakunua womahiamoko karana ai barija, o nyawa wokuata karana ai kuata deʼ o nyawa wokaya karana ai kaya.

²⁴ O nagona yomau imahiamoko mangale okianaga moi, kokiani womahiamoko igoungu ünanga womangarati deʼ wohi nako Ngohi; igoungu ünanga wohioriki Ngohi tïdora kahiado-adonika deʼ Ngohi tohidailako o tita inoli o adili o duniaka. Mata-mata gënanga yasanangi Ahi hininga. Ngohi, ma Jou, tahö heto-hetongo gënanga.”

²⁵Ma Jou wato, ”Aha iboa maoraha Ngohi tähukumu o Mesir manyawa, o Edom, o Amon, o Moab, deʼ yögogogere o tonaka ikokakaha manga utu yatobiki ipopolulu. Onanga mata-mata yähuna imatero hokä o Israel manyawa, mä kayaoa önanga kayaoa o Israel manyawa imadiai hokä hagala o nyawa ima huna-hunaua, karana önanga ihingounua o jaji ihi nononako o huna gënanga.”