Read Tobelo O RATAPAN 1 Bible Online

O RATAPAN 1 - Tobelo bible

O RATAPAN 1

¹Hokokia mamirïdi o Yerusalem o örahanënanga, o kota mahiraino duru koharame. Mahira imulia o hoana deo berera ma ago-agomo manyawa manga hidogoronaka, örahanënanga idadi hokä o bobao. Mahira o kota duru yapuji, oraha nënanga idadioka o gilaongo.

²O hutu kaitaurika ënanga iari mahininga mahuha, makongo yoderero magotoakuku. Moiua yohöhohiningaino yomau yalaru ënanga. Enangika yosatiaua hagala ai dodiawo imaiduloka idadi ailawani.

³O Yehuda manyawa yamal̄aka manga berera, karana yogilaongo deʼ duru yohangihara. Orahanënanga önanga yogogere o hoana deʼ o berera ma ago-agomo manga hidogoronaka koiwa o ngï yahidöaka o dame deʼ yorïdi. O haturu yahigiloliti önanga maoraha önanga yohangihara.

⁴Hagala o wange ma ago-agomoka moiua yoboa ma Jou Madutu Ai Tauika. O momoholehe yonyönyanyanyi dokengoka yatagongo o hangihara, deʼ o imam-imam yotaiana. Moiua o nyawa hagala o ngorana ma ago-agomoka, o Sion makota yakilolitino o hininga mahuha.

⁵Hagala manga haturu youtumu karana yohasili yakuaha. Ma Jou wädiai önanga yohangihara, karana duru kohängöe manga baradoha. Manyawa yätagokoka, deʼ yatoraka o tabuangika.

⁶Mautumu o Yerusalem makota duga-duga kama jarita öraha ipaha-paha. Ma tutuda-tutuda idadi yaboleoka hokä o maijanga duru yahahini. Onanga imasikaua manga haturu yagoginïkika.

⁷Ibotino ikilianga deʼ mahangihara, o Yerusalem yohininga maoraha ipaha-paha, maoraha ënanga kai wöeohi ma arata; sarakia manyawa yootaka o haturu manga giamika, deʼ moiua o yoboa yäriwo. Hagala manga lawani duga-duga yoiete yamake magilianga.

⁸O Yerusalem yapeseke manga diri mahirete de yadiai o baradoha mangöe ipese-peseke. Mata-mata mahira yahoromati ënanga, öraha nënanga ihikauku karana yamake kama hekonoka. Enanga itaiana karana ihihangoka mabiono.

⁹Mapeseke hamake de manyata mä ënanga imalegaikaua okia aha idadi dema diri. Duru kohagiria magilianga, mä moiua o yalaru ënanga. Done ënanga igahoko o hayanga de o dora ma Jouino, karana hagala mahaturu iutumoka.

¹⁰Hagala ma arata yaoraoka ma haturu-haturu. Enanga koaholi kiani yämake önanga yongohama ma Jou Madutu ai Tau, moi o manarama woduhu-duhunu ma Jou mangale o nyawa Ai umatua.

¹¹De manga daiana manyawa imalingiri manga baajanga o wangeil̄e; o baranga de maija-ijaka önanga ihitagali de o roti, duga-duga hupaya önanga kahirahi yowango deʼ uha yohonenge. O Yerusalem ipöaka, ”Ya Jou nohilega ngohi, nohohininga hagala ahi hangihara.”

¹²”Hei hagala o nyawa nia nönonu o ngekomika, niolega, de niohohininga! Nagala o hangihara imatero ma amoko de tätago-tagongo örahanënanga, o hangihara wohihi bäbanga ma Jou ngohiuku, karana Ai dohata duru kohä amo-amoko gënanga?

¹³O dihangoka deʼ yauku wohiguti o uku yatuhuku hiädono ahi hininga magoronaika. Wohi akana o modoi ahi himangoka ihidiai ngohi toruba. Daha wohimal̄aika ngohi o diri tomatengo tatagongo o hangihara o wange moi magurutu.

¹⁴Wal̄ë mata-mata ahi baradoha, daha waliko idadi moi, deʼ wohihiguleuku ahi tomaruku, hiädono madubuho ihihibole ngohi, ma Jou wohihilapahi ngohi o haturuika; ngohi tomagakunua tälawani önanga gënanga.

¹⁵Ma Jou wapulono okiaua yadaene mata-mata tongohi yopoputurungu yobobarani. Watoomu o tentara hupaya mata-mata ahi nyawa yogögö yobinaha. Unanga wapito-pitoko ahi hoana hiädono yowedere, hokä o nyawa yateo o angguru mahohoko.

¹⁶Genanga hababu ahi kongo yodifa moiua ihi hidöaka o hikuata deʼ o lolaru. Ahi hoana ihihangoka hagala moi-moi, karana ahi haturu iholoi yokuaha.

¹⁷Ngohi tagoraka ahi giama togahoko o bobatumu, ma’ moiua ihihidöaka o lolaru. Hagala okiaino honanga, ma Jou wohidingoto o haturu; önanga yoboa ihiparangi ngohi. Ngohi ihihidiai hokä o wal̄e, o baranga yaemo-emono toönanga manga hidogoronaka.

¹⁸Mä ma Jou wotiai, hababu Ai pareta tatilakuroka. Nihigihene ngohi, hei hoana deo berera manyawa, nihimake ngohi o hangihara magoronaka. Ahi gogoduru deʼ ahi momoholehe yätagoko, deʼ yaao o tabuangika.

¹⁹Ngohi tä ahoko ahi dodiawo itötigi-tigi mä önanga yosatiaua ngohino. O imam deʼ o hoana matutuda mata-mata yohonengoka o kota mangeko-ngekomoka. Maöraha yolingiri o inomo mangale ihi tumungu manga nyawa.

²⁰O, Jou! Nohi hohininga ngohi, ahi hininga ihuha deʼ iruaeuku, iwedere karana ahi satiaua mahira. O ngeko-ngekomika naga o doma, o tau magoronaka naga o honenge.

²¹O, Jou! Noihene ahi daiana, moiua ihi laru ngohi. Hagala ahi haturu yomorene, karana Ngona nohidiai ngohi tobodito. Nohiboa o wange Nohi jäjajioka gënanga; nädiai önanga yatagongo o hangihara hokä ngohi.

²²Nohahininga mata-mata toönanga manga dorou gënanga, deʼ nahidapari önanga hokä Ngona nohihidapari ngohi, karana mata-mata o baradoha tadodiai Ngonaika. Ngohi tokururihi o hangihara magoronaka, ahi hininga ihuha deʼ kato popanyakeika.”