Read Tobelo O RATAPAN 2 Bible Online

O RATAPAN 2 - Tobelo bible

O RATAPAN 2

¹Ma Jou wodiai ai gangamo magoronaka, o Sion Wohi kilolitino deʼ o huhutu. O Israel mamulia imateroino magurutil̄e o dihanga Wohi kawelioka o duniauku. Maöraha ma Jou womuruka, Ai tau o Sionoka ö Wolega ikakaua.

²O tonaka ilua-luasi mamomo yogetongo o Yehuda mabereraka, Wawedere wamaoua wodora. Ai gangamo magoronaka Unanga wahitomo hiädono ikilianga hagala o bebeno o mehele imahi tatatokino o berera gënanga. O pareta gënanga kamamoi matutuda-tutuda Wahiotaka hiädono yodadi okiaokaua yadaene.

³Ai gangamo itoka-tokara magoronaka, o Israel makuata Watobikoka. Maoraha ngone inaparangi nanga lawani, Unanga woluku Wonahidoaka o roriwo. Hokä o uku ihiru-hiru yabinaha hagala moi-moi, hoko genanga ma Jou wonä ngamo ngoneino mata-mata.

⁴Hoka o haturu, Unanga wohihoheika Ai toimi de wonahi meta Ai toimi madoto ngoneino. Mata-mata o nyawa yasosanangi tongone nanga hininga, yomata Unanga watoma. Unanga wohi opuru Ai gangamo hokä o uku o Yerusalem makota nënanga magoronaika.

⁵Ma Jou wodadi hokä o haturu; Unanga wagohara o Israel hiädono yokilianga. Unanga wawedere hagala o bebeno o mehele inoli o kadato, de wohi wöe o duka de o hininga mahuha o Yehuda yogogogerika.

⁶Unanga wawedere Aitau o ngï Ai umati imatotoomu mangale iwi huba Unanga. Unanga wadiai o nyawa yawohanga o Sabat deʼ hagala o wange ma ago-agomo. Karana ma Jou duru wamuruka, o imam de o koano watilaka.

⁷Ma Jou watila Ai huhuba mangï itebi-tebini, de wamal̄a Ai tau mahirete; de Wadogumal̄aika o haturu yaruba hagala mabebeno o mehele. Mangïoka ngone mahira hopuji de horameanga, o haturu youlili karana youtumu.

⁸Ma Jou waputuhoka o Sion mabebeno-bebeno mehele kiani yakilianga. Hagala mabebeno o mehele Watugaka, hupaya mata-mata yakunu Wawedere. Hagala mabebeno o mehele de hagala mamenara, öraha nënanga idadi madoropaha mata-mata.

⁹Hagala o ngorana ma ago-agomo yodoporono o tonaka, mata-mata madudukuru itobiki; ma koano de o popareta mapegawe naga yaumo-umoikaoka. Ma Jou Ai tita yadotokokauaoli; o nabi yatarima okauaoli o lolega ma Jouino.

¹⁰O kota mabalu-baluhu yogogeruku ima mouoka o tonakoka; onanga yoderero o kafo manga hʼaeke mal̄ukuoka, de yapake, o ngoere o karongo manonako manga hininga i huha. O momoholehö ihi tudukuku manga haeke hiädono o tonakuku.

¹¹Ahi lako il̄oboho karana toari toma togu-togumua, ahi jiwa kaipopanyakeika takunua tohidemo. Ahi hininga iwedere tamake yootaka o hoana de o berera; tamake o ngoha-ngohaka ikali o ngohaka magil̄au yokiditoko o kota mangeko-ngekomoka.

¹²De yabole önanga yoari yogahoko yol̄omo de yokere manga ayoika. Hokä o nyawa yal̄abo, önanga yoruba o ngeko-ngekomoka daha yohonenge manga ayo manga daparionoka.

¹³Hioko Yerusalem, o Sion ma Kota toni hohininga, ani gilianga imatero maamokika o ngöto. Okia yakunu totemo mangale tohidoaka o lolaru? Hababu komaiwahi naga yohangihara hokä ngona. Igoungu koiwa yakunu ihi gilio ani wowango hoi hira-hirali.

¹⁴Ihö ado-adono o nabi-nabi ngonaika, duga-duga o tipu deʼ o tengeluku mata-mata. Onanga komaiwa yahelenga ani baradoha, hiädono karana genanga ngona nomatobaua. Idulu yaino önanga duga-duga ihiadono nginika hagala o demo ielu-eluku yatau-tauru.

¹⁵Mata-mata o nyawa yakokaino, ini hohedu ngona, karana ngona nowederoka mata-matauku. Onanga yagiwi-giwi manga häeke de yotemo, ”Genanga o kota duru mahohailoa, o kota ihi amo-amoko o dunia?”

¹⁶Mata-mata ani haturu yapulono ani biono de madohata, önanga ini gogiete ngona de ini borohono. Onanga yotemo, ”O kota gënanga ngomi mia hohihangoka! Mabaha iboa dika maoraha madekanoka ngomi miododama!”

¹⁷Ma Jou wadiaioka Ai hikokamodongo mahira wohi datoroka de Wohidoaka o hohininga ngoneino. Ngone Wona wederoka koiwa madora dema hayanga, o haturu Wahidoaka o utumu. Unanga wadiai önanga yomorene yamake ngone inaotaka.

¹⁸Hei Yerusalem mabebeno-bebeno o mehele, nopoaka ma Jouika! Natifa ani koongo hokä ngairi ihahuru o hutu de o wange. Gila-gila noari, uha noma togumu hiädono ani röehe yabole!

¹⁹Nomomiki nogogilio o hutu magurutu mangale nopoaka nakopoa ani hininga madol̄a ma Jouika. Nogahoko hupaya Unanga woni dora de woni hayanga ani ngoha-ngohakika yahahahini de yokiditoko o ngekomo ma dupukuro yogetongo.

²⁰Jou, nolega de nohininga nohidodiai önanga Nahohangihara gënanga! Boteka naga mamoi iböto Nahidiai hoko gënanga? O ayo maol̄omo ami ngohaka madutu mahö hohininga, o imam de nabi yätoma Ani Tau i tebi-tebini magoronaka.

²¹Yobalu-baluhu de yogögö yohonenge yorubaiha o ngekomoka, o gogoduru de o momoholehe yohonenge mangale o oworo. Mawangeoka Ngona nomuruka, Natoaka onanga namaoua nadora.

²²Ngona na ahoko hagala o haturu ngomi mia modo-modongo mangale yodiai o rameanga madora de mahayanga koiwa-iwa imi kokilolitino ngomi. Onanga yatoma mata-mata ngomi mia popaliara de miahö haya-hayanga. Ani gangamo mawangeoka, moiuaö yakunu ihi oara manga diri.