Read Tobelo O RATAPAN 4 Bible Online

O RATAPAN 4 - Tobelo bible

O RATAPAN 4

¹O gurasi malö leto-letongo idadioka kamakö kokihi ma Jou Madutu Ai Tau mahelewo-helewo ima hikabarihi o ngekomoka.

²Mahira o Sion makota magoduru maboro hokä o gurasi de maija-ijaka, mä o öraha nanga yahidiai hokä o bohoko tonaka mata-mata.

³Enahioko o serigala ma ayo yahuhu mangohaka, mä ahi umati duru manga hayanga koiwa hokä o totaleo o unta o tonaka malua-luasoka.

⁴O ngoha-ngohaka magil̄au yahuhuua, hiädono ihonenge ma kiriti madudungu. O ngoha-ngohaka yogahoko o inomo, mä moiua yahidöaka.

⁵Onanga biaha yajame o inomo mahemo-hemoro, deʼ yowango mata-mata dema enangoka, o öraha nënanga imatahe-tahe imälingiri o inomo o wal̄e madudumoka, deʼ o hahini ihihonenge o ngeko-ngekomoka.

⁶ Ahi umati yahukumoka iholoi itubuho de o Sodom manyawa o lako dadawi magoronaka yowedere mangale ma Jou Madutu Ai giama koiwa o nyawa manga manarama.

⁷Mahira tongomi mia tutuda-tutuda yotebini hokä o kapasi mamagarehe mamedebini. Onanga yookoil̄e deʼ yokuata, manga röehe yauwini deʼ yotumuloa.

⁸Mä o örahanënanga toönanga manga biono iholoi itaromo ngaro de o hilo manofo makuru yoluluika o ngeko-ngekomoka moiua yakunu yanako önanga. Toönanga manga kai yodokororomo manga kobo-kobongika, hokä o gota duru itötoolenguku.

⁹Onanga yohangihara deʼ ibole-bole yohonenge, karana kamamoiuku koiwa manga inomo; yohonenge o parangi mangïoka, iholoi youtumu de o hahini ihihö hone-honenge.

¹⁰ Duru hoborohono o bodito gënanga yatapal̄u Ahi umati hiädono o ayo-ayo manga hininga yabole-bole imä bohoko manga ngohaka mahirete, mangale ihidol̄a manga mamata.

¹¹Ma Jou Ai dohata wohiaiki deʼ watuhuku o Sion makota hiädono irataika de o tonaka.

¹²O kokoano deʼ o dunia manyawa manga hidogoronaka moiua o yongaku o Yerusalem makota mangorana maago-agomo yakunu yongohama manga lawani.

¹³Mä o hali gënanga idadioka, karana o imam-imam deʼ o nabi manga baradoha. Onanga yakopoaoka o nyawa manga awunu o nyawa ya howo-howonua.

¹⁴Hokä o nyawa yopilo-piloko yodadagi o ngeko-ngekomoka hoko gënanga o Yerusalem makota matutuda-tutuda. Toönanga manga pakeanga ipeseke mangale o awunu hiädono moiua yomau yapeke önanga.

¹⁵O nyawa yotemo, ”Nimahirehene nenangoka! Ngini nipese-peseke, uha nimïsö ngomi!” Done önanga yoiki deʼ yodadagi o hoana moioka de o hoana moiika, mä yahigumal̄aua yotatapu genangokadau o nagona o dika yogogere.

¹⁶Ma Jou walegaikakauaoli Ai umati; Unanga mahirete wahi kokitingakoka önanga deʼ wadiai o imam-imam yahibaragunaokaua o tutuda-tutuda yadoraokaua.

¹⁷Mipulo-pulono tongomi mialako kayabole, mio damä o roriwo koi boa-boaua. Ngomi mio nganono o roriwo o hoana moi, de madiai okia-kiaua yakunu imihidöaka.

¹⁸Ngomi miakunua mihupu o ngekomika, karana salalu imihi donga-donga mia lawani. Tongomi mia ngango mabaha imahi tigioka, karana hagala mia wange iganapuoka.

¹⁹Imigoginïki ngomi duru komanga japati iholoi japati de o totaleo rajawali. Onanga imiginïki ngomi o l̄okuoka, deʼ imi ngiunika o tonaka makokakahaoka.

²⁰Onanga iwitagoko o koano ma Jou Ai ngongiriki, o nyawa ngomi miangaku-ngaku hokä imihi doa-doaka o wowango, deʼ o gogoana o lawanika.

²¹Hei o Edom deʼ o Us manyawaika niiete, nimorene, maoraha kai yakunohi! O bodito aha iboa önginika deʼ karana ini daluku ngona aha nahekono ani diri.

²²O Sion yodadioka mahukumanga mangale hagala o baradoha yadodiai; o öraha nënanga ngomi aha womimal̄aikaua ma Jou deʼ aha womï ao kauaoli o tabuanga magoronaika. Mä ngona, hei Edom, aha ma Jou woni hukumu. Hagala anibaradoha aha ihimatoko.