Read Tobelo O YEHEZKIEL 1 Bible Online

O YEHEZKIEL 1 - Tobelo bible

O YEHEZKIEL 1

¹ Mawange o motoaoka o mede maiata o taongo mamoruangeoka, o taongo motoa magoronaka madero ma Koano Yoyakhin iwiao o tabuangika, ngohi, ma Imam Yehezkiel o Busi aingohaka, naga o Kebar ma Ngairi madatekoka o Babeloka kamamoi hagala o Yahudioka manyawa mahomoa mitotabuanga. Itodokanino o dihanga ihelenga deʼ ngohi tamake o lolega mangale ma Jou Madutu. Ngohi toihene ma Jou wohitemo ngohino deʼ ngohi tamao Ai kuata ikokuaha.

⁴Ngohi tomamataga deʼ tamake o rato iwuwu o koremieil̄e. O leletongo imakokepeleke o lobi o kapupu moino duru koha amoko, deʼ o dihanga magilolitino madodararono. O leletongo magoronaka ijanga-janga gënanga hapulo-pulono okianaga moi ma meletongo hokä o tabaga de o hori imaganuino.

⁵ O lobi gënanga mahidö dogoronaka, tamake o dodadi iwango-wango imahirupa o nyawa,

⁶mä moi-moi toënanga mabiono iata deʼ magahuhu o habi hinoto.

⁷Ma l̄ou mariko-rikoto deʼ mameletongo hokä o tabaga de o hori imaganuino hohigihoroka. Mal̄ou makuliti hokä o banten makuliti.

⁸Mahomoa de mabiono iata deʼ magahuhu o habi hinoto gënanga, toënanga magiama o nyawa magahuhu yogetongo matimioka.

⁹Magahuhu o habi moi o dodadi yogetongino gënanga ihoheika deʼ mabare-barene ima katabino de o dodadi mahomoa magahuhu, hiädono o dodadi iata gënanga madüku ipahagi iata. Nako imakelu, ënanga moi-moi imakelu yariko-rikoto mahimangika maröehe yaidulua.

¹⁰ O dodadi magetongo gënanga toënanga mabiono iata imä kokohowono; mahimangoka mabiono o nyawa mahimangoka manirakika idaduoka mabiono o singa de mahigilika idaduoka mabiono o banteng, deʼ maporetoko idaduoka mabiono o rajawali.

¹¹O dadodi magetongo gënanga magahuhu o habi moi yahoheika hiädono madekara imakepekeino o dodadi magahuhu-gahuhu mahonongaka, deʼ magahuhu o habi moioli yatupukoro ihi tamunu maröehe.

¹²Moi-moi o dodadi gënanga ihimanga kamamoi mameta ohara iatika, hiädono önanga yakunu yoiki okiaika dika önanga manga mau yalolitua maröehe.

¹³ Hagala o dodadi gënanga magoronaka naga okianaga moi hapulo-pulono hokä o uku mangaboho ekola o oboro itoka-tokara ikelu-kelu itogu-togumua. O uku gënanga ingama-ngama ihi opuru o leletongo idodotoreke.

¹⁴O dodadi-o dodadi gënanga mahirete imakelu yakaika yakaino majapati hokä o leletongo.

¹⁵ Magogiriaka ngohi tatotailako mata-mata gënanga, tamake o lululu o gahumu iata o tonaka mal̄okuoka, moi o lululu o dodadi gënanga yogetongo madatekoka.

¹⁶O lululu iata gënanga o rupa moi deʼ mameletongo hokä o intan de o folori, deʼ moi-moi toënanga moi malululu mahomoa itukurino mahi dodogoronaino.

¹⁷De hoko gënanga o lululu-lululu gënanga yakunu yameta mahimanga hara iatika.

¹⁸ Hagala mabululunu o lululu gënanga, iomanga de o lako.

¹⁹Hagala o dodadi gënanga ioiki okiaika dika manga mau, deʼ hagala o lululu gënanga salalu yanïki, karana o dodadi-dodadi gënanga yakuaha. Ihi geto-getongo hagala o dodadi gënanga imakelu idoa o ngawa-ngawa il̄e ekola matogumu, o lululu-lululu gënanga salalu ya nïki dede önanga.

²² Hagala o dodadi mahäeke mal̄okuoka gënanga ihoheika okianaga moi hokä o tatangu o kahinaino maloleletongo.

²³O tatanguö gënanga matimioka moi-moi o dodadi gënanga yahoheika magahuhu o habi moi mameta o dodadi mahonongaka, ho de magahuhu o habi moioli ihitamunu maröehe.

²⁴ Nako önanga yohoho, ngohi toihene mailingi magahuhu imahi tatal̄oko; mailingi hokä o akere magiweuku maruruhu, hokä o tentara manga duduono ma amo-amoko manga aguru madibïngi, hokä ma Jou Madutu Duru wokokuaha Ai ilingi. Nako önanga imatogumu yohoho, önanga yatupukoro hagala manga gahuhu,

²⁵mä o tatangu mal̄okuoka toönanga manga häeke mal̄okuoka, kahoihenohi mailingi.

²⁶ O tatangu gënanga mal̄okuoka naga okianaga moi imahirupa o pareta makuruhi o nilam mahelewoino, deʼ mal̄okuoka igogeruku okianaga moi hapulo-pulono hokä o nyawa.

²⁷ Mal̄okuil̄e idaduoka holega-lega mameletongo hokä o tabaga imaganuino o hori o uku madokara magoronaka. Ma timiuku idaduoka itararono duru kohä modararono,

²⁸deʼ marupa irupa-rupaoka hokä o ngawatoro. Genanga madararono mameletongo ihi dumutu ma Jou Ai boa.