Read Tobelo O YEHEZKIEL 11 Bible Online

O YEHEZKIEL 11 - Tobelo bible

O YEHEZKIEL 11

¹Daha ngohi ihi goraka ma Jou Madutu Ai Womaha deʼ ihiao o ngorana maamo-amokika o wange mahiwaroko ma Jou Ai Tauoka. Genangoka tämake yamonaoko deʼ yamotoa, manga hidogoronaka naga yahinoto o hoana deʼ o berera manga tutuda, enagenanga o Yaazanya o Azur aingohaka deʼ o Pelaca o Benaya aingohaka.

²Ma Jou Madutu wohitemo ngohino, ”Hei o nyawa nokokakaliua, nënanga hagala o nyawa ihidö dato-datoro o dorou o kotaka nënanga deʼ ihi döaka onasihati irö rehe-rehene.

³Mahababu gënanga nohiadono Ahi behehongo mangale o hukumanga onangika, hei onyawa nokokakaliua. Hababu önanga yotemo, ’Itedekanokaua hagala o tau nënanga aha ngone hohi gokookali. O kota nënanga nagala o bohoko deʼ ngone nagala o hiode maakeme magoronaka. Ngone aha horïdi o uku mahiru-hiruino karana inä paliara o bohoko nënanga.’ ”

⁵Ipaha ma Jou Ai Womaha ihi hawoino ngohi, deʼ ma Jou wohihuloko ngohi tätemo o Israel maumatika, ”Hei o Israel manyawa, ngohi tohi öriki okia ngini nitemo deʼ ngini nihidatoro.

⁶Hoko gënanga o nyawa manga ngoë ngini nia tomaka, hiädono o kota mangeko-ngekomo iomanga o mayeti.

⁷Hababu gënanga, Ngohi, ma Jou Duru to Kokurutil̄e tinï temo nginika: Igoungu, o kota nënanga nagala o bohoko, mä o hiode ma akeme toenanga magoronaka nginiua, mä hagala o nyawa manga mayeti ngini nia toma-tomaka! Enahioko ngini aha Tinïduhu o kotaka nënanga deʼ nihupu!

⁸Ngini niomodongo o oworika? Aha Tinidatao o nyawa yoö ao-ao o oworo mangale inï parangi.

⁹Ngini aha o kotaka deʼ Tiniao nihupu deʼ Tinï hilapahi o nyawa maporetinoika. Ngohi tinï gelengaka o hukumanga nginiuku inihohonenge.

¹⁰Ngini aha nihonenge o parangi magoronaka nia bereraka mahirete, done ngini nihi öriki Ngohi ma Jou.

¹¹Ho, ngini aha niridua o kota nënanga magoronaka, hokä o hiode ma akemua moi o bohoko magoronaka. Ngohi aha tiniginïki deʼ tinï hukumu ngini okiakaö ngini naga o Israel manga bereraka.

¹²Done ngini nihi öriki Ngohi ma Jou deʼ ngini Tinï hukumu karana nia tilakuroka hagala Ahi datoro deʼ niolegaikaua hagala Ahi pareta deʼ nia nïki o hoana deʼ o berera inihi gogilolitino hagala manga hukumu.”

¹³Magogiriaka ngohi tahetongo o demo gënanga, kaitodokanino dika o Palaca woruba daha wohonenge. Daha ngohi tatilabukuku deʼ topöaka, ”Adede Jou Duru no Kokurutil̄e! Boteka o Israeloka mahou nënanga mata-mata nomau Nä toma?”

¹⁴Ma Jou wohitemo ngohino,

¹⁵”Hei o nyawa nokokakaliua, ngona deʼ hagala ani dodiawo o tabuanga magoronaka magogiria ihi ade-ade mangale o Yerusalem manyawa. Onanga yato; ’Hagala o nyawa yototabuangika gënanga o Yerusalemoka deʼ duru komanga gurutika mangale yopuji ma Jouika. O Israeloka manga tonaka ma Jou wonahi döakoka ngoneino.’

¹⁶Hababu gënanga, nohiadono Ahi behehongo nënanga ani dodiawoika o tabuanga magoronaka, Ngohi ta ao önanga magurutika o hoana deʼ o berera manga hidogoronaika deʼ tahikabarihi önanga hagala o berera gënanga. Mä maöraha utu önanga naga dokengoka, Ngohi aha tadatekuku önanga.

¹⁷Ngohi, Jou Duru to Kokurutil̄e, Tohinyata Ngohi aha Tä toomu önanga hagala o bereraino o ngï önanga yodo dogerewotoka, daha tohigilio o Israeloka manga tonaka onangika.

¹⁸Nako önanga yolio, önanga aha yaumo mata-mata o gomanga ipese-peseke deʼ haemo-emono önanga yamö make-make.

¹⁹ Onanga aha Tähidoaka o hininga mahungi deʼ okali mahungi. Toönanga manga hininga imatero madogowini o helewo talë deʼ Tatagagali deohininga ihi ngou-ngounu Ngohino.

²⁰Done önanga ihi ngounu hagala Ahi datoro deʼ yosetia yamoteke hagala Ahi pareta. Onanga aha yodadi Ahi umati deʼ Ngohi todadi toönanga manga Jou Madutu.

²¹Mä hagala o nyawa yoigo yahuba hagala o gomanga ipese-peseke deʼ haemo-emono aha Tähukumu karana toönanga manga kalakuanga itotorou gënanga.” Hoko genangala ma Jou Duru woko Kurutil̄e wotemo.

²² Hagala o dodadi gënanga imulaenge ihoho deʼ hagala o lululuö gënanga yanïki. O sahaya iloleletongo ihinonako o Israeloka manga Jou Madutu Ai boa naga toönanga manga l̄okuoka.

²³Ipaha o sahaya iloleletongo gënanga yamal̄a o Yerusalem deʼ imatururu ol̄okuika o kota gënanga o wange mahiwaroko idaduoka.

²⁴Ololega gënanga magoronaka, ma Jou Madutu Ai Womaha ihi goraka ngohi deʼ ihi higilio ngohi hagala o nyawa yototabuangika o Babeloka. Ipaha imahihanga ololega gënanga.

²⁵Daha ngohi tohi ade-ade hagala o nyawa yototabuangika hagala wohihimö mato-matoko ma Jou ngohino.