Read Tobelo O YEHEZKIEL 12 Bible Online

O YEHEZKIEL 12 - Tobelo bible

O YEHEZKIEL 12

¹Ma Jou wohitemoli ngohino, wato,

² ”Hei o nyawa nokokakaliua, ngona nogogere o nyawa yototalawani manga hidogoronaka. Toönanga deʼ manga lakoka mä imahi orikua; de manga ngaukka, mä imahihenua, hababu önanga yoigo imalawani.

³Hababu gënanga hei o nyawa nokokakaliua, kai wangeohi, nohidiai ani kiahonanga moi ohahawo magoronaka hokä biaha o yadodiai o nyawa yototabuanga. O hutu iboauahi, namal̄a ani tau nomahi totararonuku hokä o nyawa yä ao o tabuangika. Nodiai o pidaha ani tau mabebenoika de yahakihi o nyawa yolawa-lawani gënanga deʼ nao ani hahawo madol̄a ani kiahonanga gënanga nohupu nanonu o pidaha gënanga. Namoku o hahawo gënanga ani belekaka. Noma goraka o hutu mahohuhutu magoronaka; natamunu ani lako hïadono ngona namakeua o ngekomo nanönonu. Mal̄aika o Israel manyawa yongodumu yamake mata-mata nadodiai gënanga, hupaya idadi ohohininga onangika. Mudukua önanga aha yamao önanga gënanga yolawa-lawani.”

⁷Daha tadiai ma Jou Ai pareta ngohino. Mawange genangö, maöraha o wangeohi, tohidiai ahi kiahonanga moi o hahawo magoronaka, hokä biaha yadodiai o nyawa imahi dito-ditoko. Maöraha o wange mulaenge yohutu, ngohi todiai o pidaha deʼ ahi giama ahi tau mabebeno o mehelika, daha tohupu tanonu o pidaha gënanga. De kaihi totailako mata-mata o nyawa, o hahawo gënanga tamokuino ahi belekaka, ipaha ngohi tomä jobo.

⁸Iyarehino mawange ma Jou wohitemo ngohino, wato,

⁹”Hei o nyawa nokokakaliua, o Israel manyawa, o nyawa ima lawa-lawani gënanga ini lehaka ngonaika okia magogiria nakarajanga.

¹⁰Karana gënanga nahiadono onangika okia Ngohi, o Jou Duru Tokokurutil̄e Totemo onangika. Ahi behehongo gënanga mameta ma koanoika o Yerusalemoka, deʼ o kota gënanga manyawa yongodumu.

¹¹Nohitararono okia nadodiai gënanga nagala manonako okia aha idadi mangale önanga, enagënanga: Onanga aha yodadi o nyawa yototabuanga deʼ yatagokino.

¹²O hutu mahohuhutu magoronaka toönanga manga koano aha wamoku ai hahawo ai beleka mal̄okuoka daha womäjobo. Hagala o nyawa aha imadiai o pidaha bebeno o mehelika, hupaya ünanga wakunu wohupu. Unanga aha watamunoko ai lako hiädono wamakeua o ngekomo ünanga wanönonu.

¹³ Mä Ngohi aha tihiparono Ahi jä mangale Titagoko ünanga. Dahao Tiao ünanga o Babel ma kotaika, deʼ dokengoka ünanga aha wohonenge komaiwahi wamake o kota gënanga.

¹⁴Mata-mata o kadatoka yogogore, yodogoika yononasihati deʼ ma koano ai diri yogoa-goana aha Tahikabarihi hagala o ngï. Onanga Taginïki deʼ Tatoma.

¹⁵Maöraha önanga Tahikabarihi o hoana deʼ o berera mahomoaino manga hidogoronaika hagala o berea maporetino, önanga aha ihi öriki Ngohi ma Jou.

¹⁶Ohidoku mahuhutulu onangino aha oparangioka deʼ Tahihalamati, o habirokatino, deʼ opanyake o bobaku, hupaya o hoana deʼ o berera maporetino manga hidogoronaka gënanga aha yamao önanga yodiaioka duru kohamodorou. Done önanga aha ihigoungu Ngohi ma Jou.”

¹⁷Ma Jou wohitemo ngohino,

¹⁸”Hei o nyawa nokokakaliua, nohahara maöraha ngona nol̄omo, deʼ nohawana noma hidahaharuku maöraha ngona nokere.

¹⁹Nahiadono o hoana deʼ bereraika yongodumu okia Ngohi o Jou Duru Tokokurutil̄e Totemo o Yerusalem manyawaika kayo gogogerohi toönanga manga tonakoka. Onanga aha yohahara maöraha önanga yol̄omo, deʼ yohawana kaima hidahaharuku maöraha yokere. Toönanga manga tonaka aha idadi itoongoro, hababu mata-mata o nyawa yogogogere genangoka hokogenangika yatilakuru o tita.

²⁰Hagala o kota o öraha nënanga iomanga de manyawa aha yobinaha deʼ hagala o dumule aha idadi kama doongoro. La ihi öriki önanga Ngohi ma Jou.”

²¹Ma Jou wohitemo ngohino,

²²”Hei o nyawa nokokakaliua yadodoa o Israel manyawa yoigo yaheto-hetongo o dolabololo nënanga: ’O öraha imateketagali, mä hagala ohidodemo komaiwa idadi’?

²³Aa, nohiadono onangika Ngohi o Jou Duru Tokokurutil̄e, Tohidöaka obobaluhu nënanga: Odolabololo gënanga aha Taehe, hiädono o Israeloka ihi demokauaoli. Hokä madagali nahetongo onangika maöraha imahi adonoka, deʼ ohidodemo magetongo aha idadi.

²⁴O Israel madaeraoka aha koiwakaoli ololega ekola ohidodemo madutua,

²⁵Ngohi ma Jou Duru Tokokurutil̄e aha Totemo o Israel manyawaika, deʼ mata-mata Totö temo-temo marai aha idadi, koituda-tuda okauaoli. Nï ihene, o hoana deʼ o berera nima lawa-lawani! Maöraha nia wowango aha Tadiai hagala Tohi döa-döaka o hohininga nginika. Ngohi, ma Jou Duru Tokokurutil̄e totemoka.”

²⁶Ma Jou wato ngohino,

²⁷”Hei o nyawa nokokakaliua, hagala o Israeloka manyawa yotemo o lolega deʼ nia hidodemo dahao aha idadi magurutika o wange duruino.

²⁸Hababu gënanga, nahetongo onangika Ngohi, ma Jou Duru Tokokurutil̄e, totemo: Mata-mata Tototemo-temo maraioka aha idadi, ituda-tudaokauaoli. Ngohi, ma Jou Duru Tokokurutil̄e totemoka!”