Read Tobelo O YEHEZKIEL 14 Bible Online

O YEHEZKIEL 14 - Tobelo bible

O YEHEZKIEL 14

¹Yamuruono naga o nyawa o Israel manyawa manga tutudaino yoboa ngohino mangale yoleha ma Jou Ai mau.

²Daha ma Jou wohitemo ngohino,

³”Hei o nyawa nokokakaliua, hagala o nyawa nënanga ihi ngongakuoka manga diri o gomangika hiädono önanga yodiodaka o baradoha magoronauku. Kaiyakunu ngohi tomodeke önanga ihileha?

⁴Hababu gënanga, nahetongo onangika Ngohi, o Jou Duru Tokokurutil̄e tobehehongo hokonenanga, ’Moi-moi o Israeloka manyawa ihi ngongakuoka manga diri o gomangika deʼ yamal̄aika manga diri iotaka o baradoha magoronauku, daha yoboa mangale yogahoko o nasihati o nabi womatengoika, aha Tohaluhu mahirete deʼ o bobaluhu imamoteke mangale hagala o gomanga iwoe-woe gënanga!

⁵Mata-mata o gomanga gënanga yahikurutikaka Ahi umati dede Ngohi, mä tanu deʼ Ahi bobaluhu gënanga Ahi umati aha imaidulu Ngohino.’

⁶Nahi ngahuö o Israel manyawaika Ngohi, o Jou Duru Tokokurutil̄e totemo onangika, ’Nima toba hagala nia baradoha, deʼ nia mal̄a hagala nia gomanga haemo-emono gënanga.’

⁷Moi-moi o Israeloka manyawa ekola o nyawa maporetino yogogogere o Israel manyawa manga hidogoronaka, imahi kurutika dede Ngohi deʼ ihingongaku manga diri o gomangika, daha yogahoko o nasihati o nabi womatengoika, aha Tibaluhu mahirete.

⁸Ngohi aha tilawani ünanga deʼ Tihidadi ünanga o dulada mangale mahomoa. Ngohi aha tihihupu ünanga o kawaha Ahi umatino, done Ahi umati ihi öriki Ngohi ma Jou.

⁹Nako o nabi womatengo iwitipuoka hiädono wohidöaka mabobaluhu ihowono, Ngohi tïtipuoka. Ngohi ma Jou Duru Tokokurutil̄e aha tihihupu ünanga o Israel manyawa manga hidogoronaino.

¹⁰Yaoa o nabi gënanga yaoa önanga yogaho-gahoko ai nasihati, aha yamake o hukumanga kaimatero.

¹¹Mata-mata gënanga Tadiai hupaya o Israeloka manyawa uhaoli imahi kurutika dede Ngohi deʼ uhaoli yapeseke manga diri deʼ o baradoha. De hokogenanga önanga aha yodadi Ahi umati, deʼ Ngohi todadi manga Jou Madutu.” Ngohi, o Jou Duru Tokokurutil̄e to temoka.

¹²Ma Jou wohitemo ngohino, ”Hei o nyawa nokokakaliua,

¹³nako moi o berera ibaradoha deʼ isetiaua Ngohino, Ngohi aha tahukumu o berera gënanga. Ngohi aha tabinaha manga inomo magogogono, Todotagao o balä o habirokata deʼ Tätoma yaoa o nyawa yaoa o aiwani.

¹⁴Ngaroka o Nuh, o Daniel deʼ o Ayub yogogere o ngïoka gënanga, done toönanga manga oa yaruange duga-duga yakunu yahihalamati toönanga manga nyawa mahirete dika. Ngohi o Jou Duru Tokokurutil̄e totemoka.

¹⁵Yakunu idadi Ngohi todotagao hagala o aiwani madorou mangale yagoli o berera manyawa gënanga, hiädono o daera gënanga idadi duru kohabahaya deʼ o nyawa moiuaö yobarani yatilakuru.

¹⁶Ngaroka o Nuh, o Daniel deʼ o Ayub yogogere genangokadau, done mangale Ngohi, o Jou Madutu towango-wango o Jou Duru Tokokurutil̄e, önanga aha yakunua yahihalamati onagona dika, ngaroka toönanga manga ngohaka mahirete maidadiua. Duga-duga önanga mahirete dika yohalamati, enahioko o berera aha idadi itoongoro.

¹⁷Yakunu idadi Ngohi tohiboa o parangi o bereraka gënanga, deʼ Tohidingoto hagala o dae kabiahaua mangale yabinaha yaoa o nyawa yaoa o aiwani.

¹⁸De ngaro o nyawa yaruange kangano yogogere genangoka, done mangale Ngohi, o Jou Madutu Towango-wango, O Jou Duru Tokokurutil̄e, önanga aha yakunua yahihalamati onagona dika, ngaroka toönanga manga ngohaka mahireteö maidadua. Duga-duga önanga dika mahirete yohalamati.

¹⁹Yakunu idadi Ngohi todotagao o balä o panyake o bobaku o bereraika gënanga, deʼ Tädogopoa Ahi gangamo onangika hiädono yaoa o nyawa yaoa oaiwani aha ibinaha.

²⁰De ngaroka o Nuh, o Daniel de o Ayub yogogere genangoka done mangale Ngohi, o Jou Madutu towango-wango, o Jou Duru Tokokurutil̄e, önanga aha yakunua yahihalamati onagona dika, ngaroka toönanga manga ngohaka mahireteö maidadiua. Duga-duga önanga mahirete dika yohalamati karana toönanga manga oa.”

²¹ Ma Jou Duru woko Kurutil̄e wotemo, ”Ngohi aha togelenga Ahi hukumanga hara iata duru hoboborohono o Yerusalemuku mangale yabinaha yaoa o nyawa yaoa o aiwani. O hukumanga gënanga enagenanga: O parangi, o balä o habirokata, o aiwani madorou deʼ o panyake o bobaku.

²²Hohiade naga yohasili imahirehene deʼ yahihalamati manga ngoha-ngohaka, önanga natailako nohidodiai nako önanga yoboa ngonaika. Nolega sarakia toönanga manga dorou, done ngini aha niamao itiai Ahi jojobo mangale Tä hukumu o Yerusalem.

²³Daha nginiö aha nimangarati hagala Ahi jojobo gënanga toenanga deʼ mahababu. Ngohi o Jou Duru Tokokurutil̄e totemoka.”