Read Tobelo O YEHEZKIEL 18 Bible Online

O YEHEZKIEL 18 - Tobelo bible

O YEHEZKIEL 18

¹Ma Jou wohitemo ngohino,

² ”Yadodoa o dolabololo nënanga hokogenangika kayaheto-hetongo o Israel manga bereraka? ’O dimono yaol̄omo o angguru mahohoko yamao masuka-suka, mä o ngoha-ngohaka manga ingiri magiohiki.’

³Mangale Ngohi, Ma Jou towango-wango, o Jou Duru toko Kurutil̄e, o dolabololo gënanga o Israeloka aha ihi demokauaoli.

⁴O nyawa moi-moi manga jiwa ganga Tongohi madutu, yaoa o dimono manga jiwa yaoa manga ngohaka manga jiwa. O nyawa yobobaradoha, ünanga aha wohonenge.

⁵Hohiade naga o nyawa maoa, woadili deʼ ai hininga irikoto.

⁶Unanga wahubaua o Israeloka manga gomanga ekola waol̄omo o huhuba ihihö huba-huba hagala o gomanga yapuji-puji mangïoka. Unanga komaiwahi wägoda o nyawa mahomoa manga hekata ekola imahidu de o ngoheka magogiria o mede imidaene.

⁷Unanga komaiwahi wotipu ekola woora. Hagala o baranga ihidodadanu o nyawa yonagi-nagimi salalu wohigilio. O nyawa yahohabirokata wahidöka yol̄omo deʼ o nyawa koö iwa-iwa manga baju, wahidoäka o pakeanga.

⁸Unanga komaiwahi wahibau dema bunga. Unanga woluku wodiai o dorou deʼ o ributu magetongo magoronaka ünanga wohidoäka maputuhu iriko-rikoto.

⁹ Unanga wamoteke Ahi pareta deʼ wohingounu hagala Ahi titaika. O nyawa hoko gënanga yorikoto deʼ aha kahirahi yowango. Ngohi, o Jou Duru toko Kurutil̄e totemoka.

¹⁰Mä hohiade o nyawa gënanga toünanga aingohaka yoigo yoora, yotoma, deʼ yodiai mangoë o dorou mahomoa

¹¹komaiwahi wadiai ai ama. Unanga wol̄omo o huhuba ihi huba-huba hagala o gikiri yapuji-puji mangïoka. Unanga wagoda deʼ wahidu o nyawa mahomoa manga hekata.

¹²Unanga woigo watipu o mihikini manyawa, waora, wal̄ë dema pakisa o nyawa yonagi-nagimi manga baranga ihi dodadanu unangika. Unanga woiki o nyawa iwinako-nakoua ma Jou manga gomanga matau-tauika deʼ yahuba o gomanga haö emo-emono.

¹³Unanga wahibau dema bunga. Boteka o nyawa hoko gënanga aha yowango? Kowali! Unanga wadiaioka mata-mata o manarama haö emo-emono gënanga, deʼ ünanga aha wohonenge! Ai honenge ganga ai manarama mahirete mahasili.

¹⁴Hohiade o nyawa yododiai o dorou mangoë-ngoë gënanga tounanga aingohaka, de o ngohaka gënanga wamake hagala ai manarama ai ama, madodorou.

¹⁵O ngohaka gënanga woluku wahuba o Israeloka manyawa manga gomanga, ekola waol̄omo o huhuba ihihuba-huba hagala o gikiri yapuji-puji mangïoka. Unanga komaiwa wagoda o nyawa mahomoa manga hekata,

¹⁶ekola watuku ekola waora onagona dika. Hagala o baranga ihi dodadanu o nyawa yonagi-nagimi unangika salalu wohigilio. O nyawa yahahahini wahi ol̄omo deʼ o nyawa koiwa manga baju wahidoäka o pakeanga.

¹⁷Unanga koiwa wodiai o dorou ekola wahibau dema bunga. Unanga wohingounu hagala Ahi tita deʼ wamoteke Ahi paretaika. O ngohaka gënanga aha wohonengua karana ai ama ai baradoha, mä kahirahi wowango.

¹⁸I idulu yaino, ai ama woigo wotipu-tipu, woora-ora deʼ wodiai o dorou mahomoa, aha wohonenge karana hagala o baradoha wadodiai mahirete.

¹⁹Mä mudukua naga o nyawa yoleha yadodoa o ngohaka gënanga watagongua ai ama baradoha? Mabobaluhu enagënanga, karana o ngohaka gënanga yaoa deʼ ai hininga irikoto. Unanga wohingounu hagala Ahi titaika deʼ wadiai deʼ ai setia, done ünanga kahirahi wowango.

²⁰ O nyawa yododiai o baradoha, unangala aha wohonenge. O ngohakua kokiani watagongo mahasili ai ama ai howono; idulu yaino, o amaua kokiani watagongo mahasili aingohaka manga baradoha. O nyawa maoa aha yamake mabarakati maoa-oa karana ai manarama maoa-oa. Deʼ o nyawa madorou aha yatagongo o hangihara mahasili manga dorouino.

²¹Nako womatengo iwitotorou wodiaiokaua o baradoha, deʼ mulaenge wohingounu hagala Ahi tita, ikali wadiai o manarama maoa-oa deʼ o diai, ünanga aha wohonengua.

²²Mata-mata ai baradoha aha iapongo; ünanga aha wowango, karana wamanarama o diai.

²³Boteka napikiri Ngohi ma Jou Duru toko Kurutil̄e tosanangi nako o nyawa madorou yohonenge? Hakali-kali kowali! Ngohi toigo ünanga wamal̄a hagala ai baradoha hupaya ünanga kahirahi wowango.

²⁴Mä nako womatengo o nyawa maoa-oa wodiaiokaua maoa-oa, koaholi mulaenge wodiai itotorou deʼ hagala o manarama haemo-emono biaha yadodiai o nyawa madorou, boteka ünanga aha kahirahi wowa ngo? Kowali! Hagala ai manarama maoa-oaino gënanga, kamoiö ma tohiningakaua. Unanga aha wohonenge karana wodiai o baradoha deʼ wosetiaua Ngohino.

²⁵Mudukua naga yotemo hokonenanga, ’Ma Jou Ai manarama ihowono.’ Ni iehene, hei o Israeloka manyawa! Ihowono Todiai? Nginila ia howono.

²⁶Nako o nyawa maoa-oa wadiaiokaua o oa-oa, koaholi wodiai o dorou, ünanga aha wohonenge, karana o dorou wadodiaioka.

²⁷Mä nako o nyawa madorou wodiaiokaua o dorou mä mulaenge wadiai o manarama madiai deʼ maoa-oa, ai jiwa aha ihalamati.

²⁸Unanga wamaoka hagala ai manarama daha womatogumu wodiai o baradoha. Deʼ hoko gënanga ünanga aha wohonengua, mä kahirahi wowango.

²⁹Deʼ ngini, hei o Israeloka manyawa, ngini nitemo ma Jou Ai manarama gënanga ihowono. Ihowono Ahi manarama, hei Israel? Nginila nia howono!”

³⁰Ma Jou Duru woko Kurutil̄e wotemo, ”Hei o Israeloka manyawa, Ngohi aha tä juru hakimi o nyawa moi-moi imamoteke deʼ ai manarama. Noma toba ani baradoha. Uha namal̄aika ani baradoha yabinaha ani diri.

³¹Nimatogumu hagala o dorou ngini niadodiai deʼ mal̄aika nia pikiranga idadi mahungi. Yadodoa ngini kokiani nihonenge?

³²Ngohi tosangua nako imatengoani yohonenge. Nia mal̄a hagala nia baradoha hupaya ngini kahirahi niwango. Ngohi o Jou Duru toko Kurutil̄e totemoka.”