Read Tobelo O YEHEZKIEL 19 Bible Online

O YEHEZKIEL 19 - Tobelo bible

O YEHEZKIEL 19

¹Ma Jou Madutu wohihuloko ngohi tohinyanyi o dodora nënanga mangale o nyawa yahinoto o Israeloka manga koano manga ngohaka:

²Ngohi ayo hokä o singa mabeka kohagiria deʼ kabiahaua. Enanga yapaliara mangoha-ngohaka hagala o singa ipoputurungu mahi dogoronaka

³Mangohaka o dutu moiani yapaliara deʼ yodotoko imälingiri o inomo. Done enanga idadi o singa mabaluhu yägoli deʼ yäol̄omo o nyawa.

⁴Hagala o hoana deʼ o berera yögihene mangale enanga imatoomu mangale yatagoko. Enanga ihingohama o pidaha magoronaika deʼ yatumunguku, daha yatatauru de o lalakete o Mesirika.

⁵Kaparahaja yododamä mangohaka; daha enanga ihiöriki manganono ihihangoka. Done mangohaka mahomoa yodotoko idadi o singa ihohatera deʼ ipoputurungu.

⁶O singa mangohaka gënanga idadi ibaluhu deʼ ima tekedodiawo deʼ hagala o singa mahomoa. Enanga imadotoko imalingiri mainomo, deʼ idadi yä ol̄o-ol̄omo o nyawaö.

⁷Hagala o bebeno o mehele yaruba deʼ hagala o kota yakilianga. O berera manyawa yongodumu idadi yohahara yoihene imapoaka magiloanga.

⁸Mä hagala o hoana deʼ oberera o daera ihi gogilolitino yäparangi okiaino honanga. Onanga ihi parono o jä mangale yatagoko, deʼ enangö ihingohama toönanga manga dadagoko magoronaika.

⁹Enanga ihingohama o singa makurunga magoronaika daha yao o Babel mabereraika, iwihimanga makoano. Enanga yogoana magiria hupaya ipoaka uha yogihenoli o Israeloka manga doporono-doporono magogurutil̄e mal̄okuoka.

¹⁰Ngoni ayo hokä o angguru mautu mahohailoa iwango o dumuleoka o ngairi maiti madatekil̄e. Enanga irubu deʼ ihohoko hababu o akere genangoka de maboboloi.

¹¹Majaga ikuata, igapangua yatobiki ipatutu yadiai o popareta madiki-diki. Madekara magurutil̄e itol̄omil̄e yatikil̄e o lobi-lobil̄e. Enanga yöheranga mata-mata o nyawa hababu enanga magurutl̄e deʼ mahoka marubu.

¹²Mä enanga yarahuku deʼ yongamo-ngamo manga giama, ipaha ihikaweli o tonakuku. O hidal̄oko o wange mahiwara iwuwu, yatoolenge mahohoko kama gou-gouohi. Majaga itobiki, idadi itoolenge daha yatuhuku.

¹³Oraha nënanga enanga yadatomo o tonaka makokakahaoka, itoongoroka deʼ koiwa ma akere.

¹⁴O angguru maroëhe gënanga o uku yodahe ya al̄eme; majaga deʼ mahohoko youku yamata. Majaga madengeoti öraha nënanga koiwaka makuata yakunua yadiai o popareta madiki-diki. Genangala o dodora o umati ihi nyanyi yogogilio.