Read Tobelo O YEHEZKIEL 20 Bible Online

O YEHEZKIEL 20 - Tobelo bible

O YEHEZKIEL 20

¹O mede mamotoa mawange ngimoioka o taongo matumidi magoronaka maöraha ngomi imitabuanga, o Israeloka manga tutuda yamuruono naga yoboa ngohino mangale yogahoko ma Jou ahidumutu. Onanga yogogeruku iböto ahi himangoka,

²ngohi toihene ma Jou wohitemo ngohino,

³”Hei o nyawa nokokakaliua, na ade-ade hagala o tutudaika gënanga deʼ nahetongo Ngohi, o Jou Duru toko Kurutil̄e totemo hokonenanga, ’Duru kaniabarani ngini nigahoko ohidumutu Ngohino! Mangale Ngohi, o Jou Madutu towango-wango, Ngohi toluku ngini nihidotagahoko o hidumutu! Ngohi, o Jou Duru toko kurutil̄e totemoka.’

⁴Hei o nyawa nokokakaliua, ngona nomahidiaioka nä juru hakimi önanga? Aa, nadiai! Nahidoäka o hohininga önanga aha hagala ipese-peseke yadodiaioka toönanga manga ete deʼ manga tohora.

⁵ Nohiädono okia Totö temo-temoka nënanga. Ngohi täirikoka o Israel deʼ tokoboto mangale önanga. O Mesiroka, Ngohi tomahima toko Ahi diri onangika ikali totemo, ’Ngohi o Jou nia Jou Madutu.’

⁶Oraha gënanga Ngohi tokoboto aha Täao önanga yohupu o Me sirino yameta o bereraika Täö iri-irikoka mangale önanga. O berera gënanga ikaya deʼ iburere, o tonaka duru koharahai o dunia yamode-modekika.

⁷Tähuloko önanga yaumo hagala o dulada haemo-emono önanga yoigo-igo gënanga, deʼ Täduhunu önanga yapeseke manga diri deʼ yahuba hagala o gomanga o Mesirino, hababu Ngohi toönanga manga Jou Madutu.

⁸Mä önanga ihi lawani Ngohi deʼ yoluku ihihigihene Ngohi. Onanga yoluku yaumo hagala o dulada haemo-emono gënanga deʼ yoluku imatogumu yahuba o Mesir manga goma-gomanga. Maöraha önanga dokengokahi, Ngohi tomahidiaioka tomau tadogopoa Ahi gangamo onanguku.

⁹Mä Ngohi tadiaiua, hupaya Ahi romanga uha ihikauku o hoana deʼ berera o ngï önanga naga. Hababu o hoana deʼ o berera manga himangoka gënanga, Ngohi tohingahuoka o Israeloka manyawa aha o Mesiroka deʼ Tä ao tahihupu.

¹⁰Daha Tä ao önanga o Mesiroka deʼ tahihupu yameta o tonaka makokakahaika.

¹¹ Dokengoka Tohidoäka onangika hagala Ahi pareta deʼ Tädotoko Ahi tita kokiani önanga ihingounu, hababu o nyawa ihi ngou-ngounu aha kahirahi yowango.

¹² Tähuloko önanga yahoromati o Sabat mawange hokä Ahi jaji manonako dede önanga, mangale yohininga önanga Ngohi o Jou tahitingakoka önanga mangale Ngohi.

¹³Mä o tonaka makokakahaka gënanga önanga ihi lawani Ngohi. Onanga yatilakuru hagala Ahi pareta, deʼ yaoluku hagala Ahi tita yatö tago-tagongo o nyawa ihi ngou-ngounu kahirahi yowango. Onanga duru yapeseke o Sabat mawange. Hababu gënanga, o tonaka makokakahaka gënanga Ngohi tomahidiaioka tomau tadogopoa Ahi gangamo ikokiria onanguku deʼ tabinaha önanga.

¹⁴Mä Ngohi tadiaiua mangale Ahi romanga mahoromati, hupaya Ahi romanga uha ihikauku mangale o hoana deʼ o berera yamake Ngohi tä ao o Israeloka o Mesiroka deʼ yohupu.

¹⁵ O tonaka makokakahakaö gënanga Ngohi tomasadiaka tomau tahibodito o Israeloka manyawa aha taaoua tahingohama o tonaka tasosadiaka mangale önanga, o tonaka ikaya-kaya deʼ iboburere deʼ duru koharahai o dunia yamode-modekika.

¹⁶Tomau tahibodito gënanga Tähetongoka karana önanga yolegaikaua hagala Ahi pareta, yatilakuru hagala Ahi tita deʼ yapeseke o Sabat mawange. Onanga iholoi yoigo yahuba toönanga manga gomanga.

¹⁷Mä ipaha Ngohi tädora onangika, hiädono önanga idadiua Tätoma o tonaka makokakahaka gënanga.

¹⁸Idulu yaino hagala o nyawa o gö ngini niahidogoronaka, Tänasihati hoko nënanga, ’Uha nia nïki hagala o datoro yadodiai nia ete deʼ nia tohora. Uha nimä duru toönanga manga biaha deʼ uhaö nia peseke nia diri deʼ niahuba toönanga manga gomanga.

¹⁹Ngohi ma Jou tingini nia Jou Madutu. Nihingounu hagala Ahi tita deʼ hagala Ahi pareta.

²⁰Nia horomati o Sabat mawange hupaya idadi o jaji manonako Ngohi dede ngini nanga hidogoronaka, mangale ngini niohininga Ngohi o Jou tingini nia Jou Madutu.’

²¹Mä o gogo maduruil̄eö gënanga yatogowini manga haëke Ngohino. Onanga yatilakuru hagala Ahi tita deʼ yolegaikaua hagala Ahi pareta, yätagongo o nyawa ihi ngou-ngounu kajirahi yowango. Onanga yapeseke o Sabat mawange. Hababu gënanga Ngohi tomasadiaka tomau tagopoa ahi dohata ikokiria onanguku o tonaka makoka-kahaka gënanga deʼ Tätoma önanga mata-mata.

²²Mä Ngohi tadiaiua hupaya Ahi romanga uha ihikauku mangale o hoana deʼ berera yamake Ngohi ta ao o Israeloka o Mesiroka deʼ yohupu.

²³ O tonaka makokakahakaö gënanga Ngohi tokoboto Ngohi aha tahikabarihi önanga o dunia yamode-modekika,

²⁴karana önaga yolegaikaua hagala Ahi pareta, yatilakuru ha gala Ahi tita, yapeseke o Sabat mawange, deʼ kahirahi yahuba hagala o gikiri yapo puji-puji toönanga manga ete deʼ manga tohora.

²⁵Ipaha Tahidoäka onangika o tita madodorou deʼ hagala o pareta yakunua yahidoäka o ngango.

²⁶Tä mal̄aika önanga yapeseke manga diri deʼ hagala manga huhuba toönanga mahirete, ikali toönanga manga ngoha-ngohaka o nauru o riaka önanga ihihuba. Deʼ madodagi gënanga Ngohi tä hukumu önanga hupaya önanga ihi öriki Ngohi ma Jou.

²⁷Aa, o nyawa nokokakaliua, nahiadono o Israel manyawaika, okia Ngohi o Jou Madutu toko Kurutil̄e totemo onangika: Nënanga manonako mahomoa ihidumutu sarakia nia ete deʼ nia tohora ihihikauku Ngohi deʼ yosetiaua Ngohino.

²⁸Ngohi tä ao o tonaka Tahijä jajika onangika. Maöraha önanga yamake hagala o doporono magogurutil̄e deʼ o gota mautu irubu-rubu mahoka, önanga ihihuba o huhuba o ngïoka gënanga. Onanga yadiai Ngohi tongamo karana hagala o huhuba ituhu-tuhuku deʼ o huhuba toönanga manga angguru.

²⁹Ngohi täleha onangika, ’Hagala o ngï magogurutil̄e okia ngini niolega gënanga?ʼ Mulaenge o öraha gënanga hagala o ngï gënanga yahetongo ’Hagala o ngï magogurutil̄e.’

³⁰Hoʼ nahiadono o Isarel manyawaika okia Ngohi, o Jou ma Jou Madutu Duru toko Kurutil̄e totemo onangika. ’Yadodoa ngini niadiai hagala baradoha hokä yadodiai nia ete deʼ niatohora? Hokä önanga, nginiö nianïki hagala o gomanga haemo-emono gënanga.

³¹Ikali hiädono o wange nënangö ngini nia peseke nia diri deʼ niao o huhuba deʼ nia tuhuku nia ngoha-ngohaka hokä o huhuba hagala o gomangika. Daha kainimoroinohi ngini nigahoko o hidumutu Ngohino? Mangale Ngohi, o Jou Madutu towango-wango, o Jou Duru toko Kurutil̄e, ngini Tini higumal̄aua nigahoko o hidu-mutu Ngohino.

³²Ngini nioigo nimahitero o hoana deʼ o berera mahomoa deʼ hagala o berera mahomoa manyawa yahuba-huba o gota mautu deʼ o helewo. Mä nia nahihu gënanga nia makeua.’ ”

³³”Mangale Ngohi, ma Jou Madutu towango-wango, o Jou Duru toko Kurutil̄e, ngini Tinihidoäka o hohininga karana Ahi dohata ngini aha Tinipareta de mabuturungu deʼ tohitotiaiuku hiädono ngini niamao Ahi kuaha. Ngini aha Tinitoomu deʼ Tiniao tini higilio hagala o berera o ngï ngini inihi kokabarihikaoka.

³⁴

³⁵Daha ngini aha Tiniao deʼ o Hoana deʼ berera manga tonaka ma Kokakahaika. Dokengoka ngini aha Tini juru hakimi deʼ homakihima-ngino o biono deʼ o biono,

³⁶hokä Tadodiaioka nia ete deʼ nia tohoraika o Sinai matonaka i Kokakahaoka. Ngohi o Jou Duru toko Kurutil̄e totemoka.

³⁷Ngini aha Tinihidiai dema buturungu hupaya ngini nihingounu Ahi jaji.

³⁸Ima lawa-lawani deʼ o nyawa madorou aha Tahititoko nia hidogoronaka. Onanga aha Ta ao tahihupu hagala o bereraino o ngï öraha nënanga önanga yogogogere deʼ Tahigumal̄aua yolio o Israel matonakika. Done nihi öriki ngini Ngohi ma Jou.”

³⁹Ma Jou Duru woko Kurutil̄e wotemo, ”Hei o Israeloka manyawa, öraha nënanga nimahidailako dika ngini. Nihi gila-gila dika nidiai o baradoha deʼ niahuba hagala o gomanga! Mä niohininga iböto de gënanga ngini kiani nihihingounu Ngohi deʼ ibötohi niapeseke Ahi romanga itebi-tebini deʼ niao o huhuba ha-gala o gomangika gënanga.

⁴⁰Hababu o Israel matonakoka, Ahi l̄oku itebi-tebini matubuoka, ngini mata-mata, o Israeloka manyawa aha nihihuba Ngohi. Dokengoka aha tinisanangi nginika de Ahi hininga yadaene tatarima hagala nia huhuba, nihihö huba-huba duru maoa-oa de hagala nia ngongike nihi tinga-tingakoka.

⁴¹Ngini Tiniao tinihihupu ibötino hagala o ngï ngini nimahi kokabarihikaoka, Ngohi aha Tinitoomu ngini deʼ tatarima hagala nia huhuba itö tuhu-tuhuku. Done ihi öriki mata-mata o hoana deʼ berera Ngohi nënanga o Jou Duru totö Tebi-tebini.

⁴²Nako ngini Tiniao tinihigilio o Israel matonakika, o tonaka Tohijajaji nia ete deʼ nia tohoraika, done nihi öriki ngini Ngo-hi o Jou.

⁴³Dokengoka ngini aha nimahininga hagala nia manarama haemo-emono yapese-peseke niadiri. Done ngini aha niaemono niohininga hagala idadadi gënanga.

⁴⁴Nako ngini Tinihidiaioka hoko gënanga mangale Ahi romanga mahoromati, deʼ koigoungua imamoteke deʼ niakalakuanga ipatu-patutua ikali niamanarama itotorou, nihi öriki ngini o Israeloka manyawa Ngohi o Jou. Ngohi o Jou Duru toko Kurutil̄e totemoka.”

⁴⁵Ma Jou wohitemo ngohino, hoko nënanga,

⁴⁶”Hei o nyawa nokokakaliua, nolega o koreharail̄e idaduoka. Nataaere o tonaka o koreharail̄e natailako nohidodiai o hongana dokengoka.

⁴⁷Nahuloko o hongana gënanga ihigihene okia Ngohi o Jou Duru toko Kurutil̄e totemo enangika, ’Noihene! Ngohi aha totofo o uku yatuhuku yamata moi-moi o gota mautu naga ngonaka, yaoa madoole-nge yaoa kama gou-gouohi. O uku itoka-tokara gënanga yakunua yahonenge. Enanga aha imatahe o korehara deʼ yauku o koremieuku, deʼ mata-mata o nyawa aha yamao mahauku.

⁴⁸Onanga aha yamao Ngohi, o Jou tawangoka o uku gënanga, deʼ moiuaö yakunu yahonenge.’ ”

⁴⁹Mä ngohi o Yehezkiel tohinyata ahi kabaratanga deʼ totemo, ”Jou Duru noko Kurutil̄e, uha nohihuloko ngohi tahetongo gënanga! Mata-mata o nyawa yotaianoka hababu ngohi toigo totemo-temo deʼ o hitotero hiädono ihuha imangarati.”