Read Tobelo O YEHEZKIEL 21 Bible Online

O YEHEZKIEL 21 - Tobelo bible

O YEHEZKIEL 21

¹Ma Jou wohitemo ngohino, wato,

²”Hei o nyawa nokokakaliua, nalolai o Yerusalem. Nalolai o puji mangï-mangï dokengoka. Nohidoaka o hohininga o Israel matonakoka.

³Ngohi, o Jou, totemo hoko nënanga, ’Ngohi nënanga nia haturu. Ngohi aha tomarahuku Ahi oworo deʼ tinitoma ngini mata-mata, inito-torou deʼ yaoa-oa.

⁴Deʼ Ahi oworo aha Talawani mata-mata o nyawa o koremie deʼ yail̄e hiädono o koreharail̄e.

⁵Done o nyawa mata-mata ihiöriki Ngohi, o Jou, tomarahuku Ahi oworo deʼ taharumokauaoli.’

⁶Hei o nyawa nokokakaliua, notaiana deʼ nopoa-poaka o Israel manyawa manga himangoka, matero-tero ngona ani hininga itobiki deʼ ani nganono itoaka.

⁷Nako önanga inileha yadodoa ngona nopoa-poaka, nahetongo ngona ani hininga ihuha karana o abari aha iboa. O abari gënanga aha yadiai toönanga manga hininga ihahara, toönanga manga giama yabo le, deʼ toönanga manga buku ihahara, manga kuata ihihanga. Igoungu maöraha yadonoka, deʼ mata-mata gënanga aha idadi. Ngohi o Jou Duru toko Kurutil̄e totemoka.”

⁸Ma Jou wohitemo ngohino, wato,

⁹”Hei o nyawa nokokakaliua, nohidemo! Nohingahu hagala o nyawaika Ngohi, o Jou totemo hoko nënanga, ’Naga moi o oworo o oworo yogiho-gihoroko de, yadoto-dotoka.

¹⁰Enanga yadoto-dotoka hupaya yakunu yahonenge, yanouhoka hupaya kama leto-letongo. Mangale Ahi umati koiwaka manga morene hababu hagala o hohininga de, o hukumanga önanga yolegaikaua.

¹¹O oworo gënanga yaihoro hupaya salalu sadia yapake daha ihilapahi womatengoika wotö toma-toma.

¹²Hei o nyawa nokokakaliua, nododora deʼ nopoaka! Hababu o oworo gënanga imahidiaioka yalawani Ahi umati. O Israeloka manga tutuda imakinïki o hoana deʼ o berera yongodumu aha yatopoko o oworo hiädono yobinaha. Done niapoka nia aluoko deʼ nia hininga ihuha,

¹³Hababu Ngohi magogiria täuji Ahi umati, nako önanga yoluku yatiai manga kalakuanga, mata-mata gënanga aha imadadi onangika.’

¹⁴Ah, o nyawa nokokakaliua, nohidodemo. Nopopoka, hokä manonako mangale o oworo gënanga mangale mulaenge yätoma. O oworo gënanga duru yähawana.

¹⁵Enanga yadiai Ahi hoana manga barani yahihanga deʼ yopeleke ihidoduruba. Ngohi todobuturungu toönanga manga kota deʼ o oworo gënanga mameletongo hokä o leletongo deʼ isadia mangale yätoma.

¹⁶Hei o oworo madoto-doto, no oto o nirakika deʼ o higilika, deʼ ima moteke ani nahihu.

¹⁷Ngohi aha topopokaö, daha Ahi dohata aha itouru. Ngohi, o Jou totemoka.”

¹⁸Ma Jou wohitemo ngohino, wato,

¹⁹”Hei o nyawa nokokakaliua, natulada o ngekomo o gahumu hinoto wakunu wanonu o Babel manga koano womagö gao-gao ai oworo. O ngekomo hinoto gënanga kiani matiti imaberera moi deʼ yaino; o ngekomo moi mameta o Rabaika, o Amon makota; deʼ moioli o Yerusalemika, o kota dema bebeno o mehele o Yehudaika. Nohipake o papanga ihi dumu-dumutu o ngekomo, okiaka o ngekomo gënanga imu-laenge ijaga.

²¹Ma koano Babel womaokoino o aoto ihi dumu-dumutu o ngekomo, madatekoka gënanga. Mangale wohi öriki o ngekomo okia aha wanonu, ünanga wogahoko ohidumutu ai goma-gomangino, womagihoro ai toimi deʼ watailako o aiwani magate dahaö ihi huba-huba.

²²Inyata o toimi yal̄e-l̄e ai giama maniraka ihinonako o Yerusalem! Genanga mamangarati ma koano kiani waparangi o Yerusalem makota, ihiböaka o parangi maulili deʼ wahuloko aitentara ihidatoro o pakakaha ihikokilianga, ihipake hagala mangorana ma ago-agomo o Yerusalem, yodoporono o tonaka idadi o bebeno o mehele ihi gogiloliti deʼ yofaiti o baraka.

²³O Yerusalem manyawa aha yongakua önanga yaparangi, karana önanga yodiaoka o jaji de o Babel. Mä o hidodemo nënanga aha yahidoäka o hohininga önanga done önanga aha yatagoko karana hagala toönanga manga baradoha.

²⁴Ngohi, o Jou Duru toko Kurutil̄e totemo onangika, ’Hagala nia baradoha ihi örikoka deʼ mata-mata o nyawa ihi öriki ngini niahowono. Niadorou yamake niajojobo magetongo magoronaka. Oraha nënanga yadonoka maöraha ngini tinihukumu deʼ ngini aha Tinihilapahi nia haturuika.’

²⁵Deʼ o Israel manga koanoika Ngohi totemo, ’Hei koano madorou deʼ nosetiaua! Maöraha mangale ani hukumanga mabobaha itigioka.

²⁶Ngohi, o Jou Duru toko Kurutil̄e totemoka. Naiki ani makota deʼ nahohe ani haëke maliliko. Oraha nënanga, mahali ingalioka. Nia gorakil̄e manga gogere o mihikini manyawa deʼ niahidoäka o kuaha!

²⁷O kota nënanga aha tawedere kamamoiuku, hiädono kiaka honanga kama gogilianga. Mä o hali gënanga daha idadi nako o nyawa Tä iri-irikoka mangale yahukumu o kota nënanga iboaka. Unangika aha Tohilapahi o kota nënanga.”

²⁸ Hei o nyawa nokokakaliua, nohidodemo! Nahingahu o Amon manyawaika yahikokaukuoka o Israeloka, Ngohi, o Jou Duru toko Kurutil̄e totemo, ’Moi o oworo ibotukuoka mangale yätoma; o oworo i ihoroka mameletongo hokä o leletongo, hupaya imahidiai mangale yätoma.

²⁹O lolega ngini niamö make-make ganga madutua, deʼ o hidodemo ngini nia heto-hetongo duru ielu-eluku. Ngini initorou ikali nisetiaua, deʼ maöraha mangale inïhibobaha itigioka. O oworo gënanga aha yatobiki nia tomara.

³⁰Hei o Amon manyawa, nia harumokali nia oworo! Ngini aha Ti nï juru hakimi ngini inihidö dadadi deʼ inihi ngoha-ngohaka mangïoka.

³¹Ngohi aha tidoburaraha nginiuku Ahi gangamo ihö hiru-hiru. deʼ ngini aha Tinihilapahi hagala o nyawa manga hayanga koiwa-iwaika imadotoko imahibiaha inibinaha.

³²Ngini aha o uku ini ol̄omo inimata. Nia awunu aha ikopoa niabereraka mahirete, deʼ o nyawa kaima tengö ma koiwa ini hininga nginika. Ngohi o Jou totemoka.’ ”