Read Tobelo O YEHEZKIEL 23 Bible Online

O YEHEZKIEL 23 - Tobelo bible

O YEHEZKIEL 23

²”Hei o nyawa nokokakaliua, naga yahinoto ongoheka, o riadodoto.

³Maöraha imä göikahi, önanga yogogere o Mesiroka. Dokengoka önanga ihihanga manga moholehe maboro, daha önanga yodadi manga roëhe yahuku-hukunu.

⁴Mariaka ami romanga ongo Ohola; munanga ihinonako o Samaria. Ngomi dodoto ami romanga ongo Oholiba; munanga ihinonako o Yerusalem. Ngohi tokawingi dede önanga deʼ tamake o ngohaka yaborihinotöino.

⁵Ngaroka ongo Ohola modadioka Ngohi hekata, munanga kahirahi ami roëhe mahuku-hukunu, deʼ ami nahihu kohagiria maleleani hagala ami mamane o Asyurino.

⁶Onanga gënanga o tentara manga pakeanga kaorupa moi madokara magoguhurungu, o nyawa yomomulia deʼ o pangka-pangkati magogurutil̄e; mata-mata o kudauku yobare-barene manga duduono mabalu-baluhu manga biono mahohailoa.

⁷De o nyawa yolago-agomo gënanga ongo Ohola mohowono. Ikali karana duru ami nahihu magiria, munanga mapeseke ami diri deʼ mahuba toönanga manga goma-gomanga.

⁸Munanga hoko genangika dika mahukunu ami roëhe hokä mahira madodiai o Mesiroka, kiaka munanga ihihanga ami moholehe maboro. Maöraha kamietetekohi, munanga imihiduoka deʼ imidiai hokä manga roëhe yahuku-hukunu.

⁹Hababu gënanga Tomihilapahi munanga ami momamaneika, hagala o Asyur manyawa duru maö igo-igo gënanga.

¹⁰Munanga imihekono önanga de mabuturungu, daha imitoma de o oworo, deʼ ami ngoha-ngohaka yaora. Kiaka hononga amiwowango gënanga idadi ongongoheka kamanga uru makaioka.

¹¹O ngo Oholiba, ngomi dodoto mamake idödadadi gënanga, mä munanga iholoi monahihu madiai o howono ngaro deʼ o ngo Ohola.

¹²O ngo Oholibaö duru mänahihu hagala o Asyur manyawa gënanga, enagënanga o gogoduru yohö hailoa o kudauku yobare-barene manga duduonino, o nyawa yomomulia deʼ manga pangkati magogurutil̄e, ikali o tentara manga pakeanga o rupa moi madokara magoguhurungu.

¹³Ngohi tamake ongo Oholiba gënanga igoungu ami kalakuanga itorou, imatero hokä ngomi riaka.

¹⁴Iholoi itedekana iholoi itorou ami kalakuanga o ngo Oholiba. Munanga duru ami hininga yatauru o dulada-duladaika gogarade o bebenoika, deʼ ihi rupa deʼ o cat imadaene mamodokara o awunu. O dulada-dulada gënanga ihinonako o Babel manga tentara manga balu-baluhu deʼ manga gorona maninikutu mahohailoa deʼ manga haëke maninikutu o hohihiaruku.

¹⁵

¹⁶O ngo Oholiba mamake o dulada-dulada gënanga, ami nahihu irama deʼ munanga mohidingoto o gogahoko o tentara manga balu-balu hika gënanga o Babeloka.

¹⁷Done önanga yoboa deʼ imaidu dede munanga. Onanga iminoda hoko gënanga marupa hiädono mabaha munanga idadi mä emono dede önanga.

¹⁸Iböto gënanga de mohi totararonuku munanga mahukunu ami roëhe deʼ mohitomina ami diri o kawahaika. Ngohi tomi emono tomi make munanga, hokä Ngohi tomi emono ngomi riaka.

¹⁹Iholoi itedekana iholoi mamoi-mamoi munanga mohowono, ima howo nua hokä maöraha momagö ikahi maöraha munanga mahukunu ami roëhe o Mesiroka.

²⁰Munanga ami nahihu kohagiria o nau-naurika ami nahihu ihebu-hebulu, deʼ ami nahihu irama kaimatero maamoko o kuda manauru manahihu. (

²¹Hei Oholiba, ngona noigo nogilioli o peseke nadodiai maöraha nomagö ikahi, maöraha o Mesir manyawa nimä tekenahihu dede ngona.)”

²²Ma Jou Duru woko Kurutil̄e wotemo, ”Hei Oholiba, ngona nagihounoka deʼ ani mamane-mamane, mä Ngohi aha tadofo-dofo önanga hupaya önanga iningamo ngonaika deʼ ini higiloliti.

²³Ngohi aha tatoomu deʼ Taao ngonaika mata-mata ani mamane o Babelino, o Pekod, o Soa, o Koa, o Asyur, ikali o Kaldea manyawa. Taao ngonaika o gogoduru yohohailoa manga pangkati magogurutil̄e, o nyawa yomomulia, o pangkati yolago-agomo de o kudauku yobare-barene manga duduono manga kapita.

²⁴Onanga aha iniparangi dau o koremieil̄e deʼ o tentara kamanga ngoë, deʼ o kereta ihi poparangi deʼ o kereta ihi ao-ao o bilaono. Deʼ yatatokino deʼ o dadatoko deʼ o sapeo o waja, önanga aha inihigiloliti. Aha Tamal̄aika önanga ini juru hakimi imamoteke toönanga manga tita mahirete.

²⁵Karana Ngohi toningamo ngonaika, Tä mal̄aika önanga ini hidiai dema hayanga koiwa. Ani ngunungu deʼ ani ngauku önanga aha yaluiti deʼ ani ngoha-ngohaka yal̄e deʼ yatuhuku yahingangoika.

²⁶Ngona aha ini hekono deʼ hagala ani poromu aha yaora.

²⁷Hoko gënanga Ngohi aha tatogumu ani nahihu nimakoröehe moi deʼ hagala o hudali nadodiai maöraha ngona naga o Mesir mabereraka. Ngona aha nonganonokauaoli o gomangika okianö ekola nahininga o Mesirika.”

²⁸Ma Jou Duru woko Kurutil̄e wotemo, ”Ngohi aha toni hilapahi ngona o nyawa ini emo-emonika nadö doha-dohata.

²⁹Karana önanga inïdohata ngonaika, hagala ani kangela mahasili aha önanga yaora. Ngona aha ini dogumal̄aika kani heko-noka ani bululunoka hokä manga roëhe yahuku-hukunu deʼ idadi yawuningi o kawaha. Ani nahihu nimakoroëhe moi deʼ ani hudali

³⁰ini dotagao o wowango itotorou nënanga ngonaika. Ngona nodadi manga roëhe yahuku-hukunu mangale o hoana deʼ o berera, deʼ napeseke ani diri de toönanga manga goma-gomanga.

³¹Ngona nanïki ami manarama ngoni riaka, hababu gënanga ngona aha Toni hukumu de o hukumanga kaimatero.”

³²Ma Jou Duru woko Kurutil̄e wotemo, ”Ngoni riaka ami belu-belu madol̄a kokiani ngona nalahiri. O belu-belu gënanga ipako deʼ iluku. Madol̄a iomanga ima higogule deʼ o hohedu, kokiani natagongo moi-moi o nyawaino.

³³Ngoni riaka o Samaria ami belu-belu, madol̄a o hawana deʼ o binaha. Naokere ibötino madol̄a mata-mata ngona aha inidaluku deʼ nohangihara. Deʼ mabela-belaka o belu-belu gënanga ngona aha yakakakihi ani alu mangunungu Ngohi, o Jou Duru toko Kurutil̄e totemoka.”

³⁴

³⁵Ma Jou Duru woko Kurutil̄e wotemo, ”Karana ngona nohi wohangoka Ngohi deʼ nohï poretoka Ngohi, ngona aha nohangihara mahasili ani nahihu nimakoroëhe moi deʼ ani hudali.”

³⁶Ma Jou wohitemo ngohino, ”Hei o nyawa nokokakaliua, ngona noma hidiaioka nä juru hakimi o ngo Ohola deʼ o ngo Oholiba? Nahidaaere önanga yakorona odorou önanga yododiaioka.

³⁷Onanga yadiaioka o hudali deʼ o doma; önanga yohudaloka de hagala o gomanga deʼ yatoma Ahi ngoha-ngohaka önanga yahi ngoha-ngohaka. O ngoha-ngohaka gënanga önanga yahihubaka toönanga manga goma-gomangika.

³⁸Deʼ kagenangua dika. Onangö yapeseke Ahi Tau deʼ o Sabat mawange Tohi totatapuoka gënanga.

³⁹Mawange önanga yatoma Ahi ngoha-ngohaka deʼ yahihuba hagala o gomangika, o riadodoto yahinoto gënanga yoboa Ahi Tauika deʼ yapeseke!

⁴⁰Onanga koaholi ihi dingingoto o gogahoko hagala o nau-naurika o berera-berera magogurutika, o riadodoto yahinoto gënanga imaohiki, yapake o lakoino magegehe deʼ yapake hagala o poromu.

⁴¹Daha önanga yogogeruku manga ngidu-ngidu mangï marorahai mal̄okuoka. Mahimangoka naga o meja iomanga de o inomo ihi dodiaiuku, idogoika o dupa deʼ o zaitun maminya Tahi doä-doäka onangika.

⁴²Maporetino toihene manga ilingi yogigoro o nyawa manga ngoë imahi sosanangi. Hagala o nyawa gënanga yä ahoko o tonaka makokakahaka deyaino. Onanga imahinoa o gogoli manga giamoko o riadodoto gënanga, deʼ imahitamunu hagala o makota mahohailoa manga haëkuku.

⁴³Daha Tapikiri, ’Kayomodekohi hagala o nyawa gënanga yomane de hagala manga roëhe yahuku-hukunu yomomaiuku karana o hudali?ʼ

⁴⁴De madodagi ima teketagali hagala o nyawa yadotoboa o ngo Ohola deʼ o ngo Oholiba, yahinoto manga roëhe yahuku-hukunu itotorouoka gënanga.

⁴⁵Mä hagala o nyawa yotebi-tebini aha yä juruhakimi o riadodoto gënanga de mahababu o hudali deʼ o doma, hababu önanga igoungu yahowono.”

⁴⁶Ma Jou Duru woko Kurutil̄e wotemo, ”Nä ahoko o nyawa o doomu moi mangale yahangihara deʼ yäora yahinoto manga roëhe yahuku-hukunu gënanga.

⁴⁷Mal̄aika önanga yakaweli de o helewo deʼ yaparangi de o oworo. Mal̄aika toönanga mangangoha-ngohaka yätoma deʼ hagala manga tau yatuhuku.

⁴⁸O berera yamode-modekika aha Tahohihanga o dorou hokä hoko gënanga. Ahi jojobo gënanga aha idadi o hohininga mangale o ngongoheka magetongo hupaya uha yohudali hokä yahinoto o riadodoto gënanga.

⁴⁹Hei o Ohola deʼ o Oholiba, Ngohi aha tinihukumu ngini karana ngini nihudali deʼ niahuba o gomanga. Done nihi öriki ngini Ngohila o Jou Duru toko Kurutil̄e.”