Read Tobelo O YEHEZKIEL 24 Bible Online

O YEHEZKIEL 24 - Tobelo bible

O YEHEZKIEL 24

¹O wange mangimoioka, o mede mangimoi, o taongo mahiwo magoronaka maöraha ngomi imi tabuanga, ma Jou wohitemo ngohino,

² ”Hei o nyawa nokokakaliua, natulihi matagali o wange nënanga, karana o wange nënanga o Babel manga koano womulaenge wohigiloliti o Yerusalem.

³Ngohi, o Jou, to Ngohi moi ahi hitotero mangale nahiädono Ahi umatika yoigo-igo imalawani: Noguhe o akere o panci magoronauku daha nakelenga o uku mal̄okuoka.

⁴Nonoa ohiode ma akeme magoronauku ohiode ma akeme duru maoa-oa mabelaka ma akeme deʼ mauguru ma akeme ikali hagala makobongo maniara ilo amo-amoko.

⁵Napake o duba ma akeme maboburere deʼ magö nodogo isosadia o gota ihi dofo-dofo. Mal̄aika ma akere ituhara iwaka-waka nabohoko o hiode ma akeme gënanga kamamoi makobo-kobongo.”

⁶Ma Jou Duru wokoKurutil̄e wotemo, ”Ibodito o kota iömanga deʼ o doma gënanga! Kota gënanga hokä o bohoko mapopariama komaiwahi yafika. Ohiode ma akeme naga magoronaka ihi hupu o luiti moi-moi hiädono o luiti moiö mä koiwa igogogerohi.

⁷O kotaoka gënanga idadi o doma, mä o huhuba ma awunu ikopoaua o tonakuku, ma o helewo itotogowini mal̄okuuku, hiädono yakunua yöpohuku.

⁸O awunu gënanga Tamal̄aika genangoka hiädono yakunu yamake deʼ yodotagahoko mabalahi.”

⁹Ma Jou Duru woko Kurutil̄e wotemo, ”Ibodito o kota iomanga deʼ o doma gënanga! Ngohi mahirete aha todatoro o gota mangale yatuhuku.

¹⁰Nodogo magota! Nodal̄oko mauku! Nabohoko ohiode ma akeme! Naumo ma teongo! Naharongo makobo-kobongo!

¹¹O öraha nënanga nödirï o bohoko o tabaga mahomoa gënanga o uku mal̄okuoka deʼ namal̄aika hiädono itokara ingabo-ngaboho. Mapariama youku iböto, o bohoko gënanga aha itebinokali imamoteke o agama madatoro.

¹²Mä mata-mataua mapariama aha ihihanga o uku yalahiri.

¹³Hei Yerusalem, ani jojobo-jojobo itotorou yapësekoka ani diri. Ngohi tohitailoka tonitebini, makoiwa maguna, hababu ngona kahirahi nopëseke. Ngona aha notebinokauaoli hiädono Tonidipidili Ahi gangamo ngonauku.

¹⁴Ngohi, o Jou Duru toko Kurutil̄e totemooka. Maöraha yadonoka Ngohino mangale todiai. Ngohi aha tawohangua ani baradoha deʼ Tonihi apongua ekola Tonidora ngona. Ngona aha Tonihukumu imamoteke deʼ hagala ani manarama. Ngohi o Jou Duru toko Kurutil̄e totemooka.”

¹⁵Ma Jou wohitemo ngohino,

¹⁶”Hei o nyawa nokokakaliua, deʼ itodokanino aha Tal̄ë o nyawa duru naö igo-igo. Mangona yakunua nododora deʼ noari, ekola namal̄aika ani kongo iuihi.

¹⁷Uha hiädono ani gari yoihene. Uha nomadagi noma kokuduua ekola nomal̄ou mahohol̄eua, hokä o nyawa imahipake duka manonako. Uhaoli natamunoka ani biono, deʼ uha naol̄omo o duka manonako maroti.”

¹⁸O ngoru-ngoru mino ngohi tatemo o hoanika gënanga deʼ mahutuku ngohi hekata mohonenge. Iarehino ngohi tadiai okia ihipopareta ngohino.

¹⁹O kawaha yoleha, ”Yadodoa Bapa nodiai hoko nënanga? Okia mamangarati mangale ngomi?”

²⁰Daha tätemo onangika, ”Ma Jou wohihuloko ngohi

²¹tohiädono o behehongo nënanga nginika: ngini nia hininga ilamoko ma Jou Ai Tau makuata. Ngini nioigo nia pulono deʼ niolega, mä ma Jou aha wapëseke Ai tau. De nia tau manyawa kayo gö gö ohi, yogögogogere o Yerusalemoka, aha yätoma o parangi magoronaka.

²²Dahao ngini aha niadiai hokä Tadodiai o öraha nënanga. Ngini aha nia tamunoka nia bionoko ekola nia ol̄omo o duka manonako maroti.

²³Ngini aha nimadagi nia häeke nia tamunua ekola nia l̄ou mahohol̄eua, nidodoraua ekola niariua. Ngini aha iholoi kani popanyakeika karana hagala nia baradoha; ngini aha nitaiana moi deʼ moiika.

²⁴Done ngohi, O Yehezkiel aha todadi o dulada nginiika; ngini aha niadiai hokä tadodiai o öraha nënanga. Ma Jou wotemo nako o hali gënanga idadi, ngini aha nihi öriki Unanga ma Jou Duru woko Kurutil̄e.”

²⁵Ma Jou wohitemo ngohino, ”Ah, o nyawa nokokakaliua, aha Tal̄ë onangino ahi Tau ikö kua-kuata gënanga idadioka toönanga manga hininga ilamoko deʼ isanangi, deʼ önanga yapulono deʼ yölega deʼ manga hininga mamorene. Dahaö Ta l̄ëoli toönanga manga ngoha-ngohaka.

²⁶Mawange ngohi todiai o hali gënanga, womatengo o binahaoka deʼ wohasili wootana gënanga aha woboa, deʼ wohiädono o abari gënanga nginiika.

²⁷O wange gënangö ngona aha nakunu notemo-temokali deʼ nomouokauaoli. Daha ngona aha nima ade-ade deʼ o nyawa gënanga. Hoko gënanga ngona aha nodadi o nonako mangale önanga; done ihi öriki önanga Ngohi o Jou.”