Read Tobelo O YEHEZKIEL 25 Bible Online

O YEHEZKIEL 25 - Tobelo bible

O YEHEZKIEL 25

¹ Ma Jou wohitemo ngohino,

²”Hei o nyawa nokokakaliua, nalolai o amon maberera.

³Nähuloko o höana gënanga ihigihene okia Ngohi, o Jou Duru toko Kurutil̄e totemo onangika, ’Ngini nisanangi niamake Ahi Tau yapëseke deʼ o Israel manga tönaka yakilianga ikali o Yahudi manyawa yaao o tabuangika.

⁴Hababu gënanga ngini Ti ni mal̄aika ini hihanga hagala o höana deʼ berera o tonaka makokakaha o wange ma hiwaroka deʼ yaiha. Onanga aha ihigoko manga tau-tau nia bereraka daha yogogere genangoka. Onanga aha yaol̄omo hagala niagota mahohoko deʼ ya okere nia gigini ma huhu.

⁵O Raba makota aha Tangali idadi o unta yogoa-goana manga ngï, deʼ o Amon maberera mata-mata idadi o duba yogoa-goana manga ngï. Done nihiöriki ngini Ngohila o Jou.’ ”

⁶Ma Jou Duru woko Kurutil̄e wotemo, ”Ngini nipopoka ikali niselo nimorene. Ngini nia legaikaua o Israeloka manga tonaka.

⁷Hababu gënanga Ngohi aha tinihilapahi o hoana manga ngöeika aha yal̄ë deʼ yao hagala tingini madutu. Ngini aha Tinibinaha hoko gënanga marupa, hiädono nidadi okauaoli o höana moi deʼ koiwakaoli tingini nia berera madutu. Done nihi öriki ngini Ngohila o Jou.”

⁸ Ma Jou Duru woko Kurutil̄e wotemo, ”O Moab yotemo o Yehuda gënanga kaimatero hokä o höana deʼ o berera ma ago-agomo mahomoa.

⁹Hababu gënanga hagala o kota o Moab maberera mabati-batingi magogoana aha Tamal̄aika yäparangi o haturu idogoika hagala o kota duru mahohailoa, enagënanga: Bet-Yesimot, o Baal-Meon deʼ Kiryataim.

¹⁰Ngohi aha tamal̄aika o hoana deʼ o berera ma ago-agomo tonaka makokakaha o wange mahiwaroko deʼ yaiha yahohihanga o Moab kamamoi o Amon maberera, hiädono o Moab imahirupa okaua moi o hoana deʼ o berera.

¹¹Ngohi aha tahukumu o Moab, done önanga ihi öriki Ngohi o Jou.”

¹² Ma Jou Duru woko Kurutil̄e wotemo, ”O Edom yodiaioka o howono ma ago-agomo karana yodiai mahayanga koiwa o Yehudaika hokä yodiai o hininga madohata magogono mabalahi.

¹³Hababu gënanga Ngohi tohi ngahu Ngohi aha tahukumu o Edom deʼ Tatoma moi-moi o nyawa deʼ moi-moi o aiwani dokengoka. O berera gënanga yamode-modekika, o Téman makota deʼ yaino hiädono o Dedan makotaika, Tohidadi duru kairïdika; makawaha aha yohonenge o parangi magoronaka.

¹⁴Ahi nyawa o Israeloka aha Tapake mangale yabalahi o hininga madohata magogono o Edomika, deʼ o Edom aha Tahidiai i mamoteke de Ahi dohata homodo-modongo. O Edom aha ihi öriki sarakia yamao idadi Ahi dohata mameta. Ngohi o Jou Duru toko Kurutil̄e totemoka.”

¹⁵ Ma Jou Duru woko Kurutil̄e watemo, ”O Filistinoka manyawa imä balahoka o hininga madohata magogono deʼ mahayanga koö iwa-iwa manga haturuika önanga manga ete deʼ manga tohora deʼ yabinaha önanga deʼ manga dohata itototomo.

¹⁶Hababu gënanga Ngohi tohingahu Ngohi aha tä parangi o Filistinoka manyawa deʼ Tabinaha önanga. O nyawa moi-moi mahou-houohi o Filistin mahohana madaeraoka aha Tätoma.

¹⁷Ngohi aha tähukumu önanga deʼ duru kohadubuho deʼ Ahi dohata Tohi duku-dukumuku tohiaiki hiädono i yaoaka. Nako önanga yamao Ahi gangamo, önanga ihi öriki Ngohi o Jou.”