Read Tobelo O YEHEZKIEL 26 Bible Online

O YEHEZKIEL 26 - Tobelo bible

O YEHEZKIEL 26

¹ Mawange mamoioka mamede itantu-tantu mataongo mangimoi deʼ mamoi magoronaka maöraha ngomi imi tabuanga, ma Jou wohitemo ngohino, wato,

²”Hei o nyawa nokokakaliua, o Tirus manyawa imä uli-uliloka ikali yotemo, ’O Yerusalem iwederoka! Makuata imahukunu magoronaka ihihangoka! Enanga i dadiokaua ima keteroli ngone!ʼ ”

³Ma Jou woko Kurutil̄e wätemo, ”Ngohi ani haturu, hei Tirus! Ngohi aha taao o hoana de o berera manga ngöe mangale ini parangi, deʼ önanga aha yoboa hokä o ngöto mamoku-moku.

⁴Onanga aha yawedere hagala nia bebeno o mehele deʼ yaruba hagala nia menara. Hagala o tonaka naga dokengoka aha Tahehara hiädono igogogere duga-duga moi o helewo madodoongoro o ngöto mahi dogoronaka.

⁵O nawoko yotö tago-tagoko aha yawoëre toönanga manga jä o helewo gëanga mal̄okuoka. Ngohi o Jou Duru toko Kurutil̄e totemooka. O Tirus aha idadi manga inomo mangale o hoano de o berera manga ngöe.

⁶Onanga aha ini ora yätoma hagala o kotaka manyawa o Tirus matonaka madududungoka. Done o Tirus manyawa ihi öriki Ngohila o Jou.”

⁷Ma Jou Duru woko Kurutil̄e wotemo, ”Ngohi aha tiao ma Koano Nebukadnezar o Babelino mangale woniparangi ngona, hei Tirus. Okoano duru wokua-kuata gënanga aha woböa o koremie deʼ wail̄e, deʼ o tentara kamanga ngöe, deʼ mangöe o kuda deʼ hagala o kereta ihipoparangi ikali o kudauku yobare-barene manga duduono.

⁸Hagala o kota manyawa o tonaka madududungoka aha yätoma o parangi gënanga magoronaka. O haturu aha yofaiti hagala o baraka yogoa-goana yodoporono hagala o bebeno o mehele ihi gogilolitino deʼ yatatoro hagala o dadatoko ma ago-agomo önanga yapake hokä o bebeno o mehele ini lawani ngona.

⁹Onanga aha yatoropaha hagala ani bebeno o mehele deʼ o pakakaha ihi kokilianga deʼ yaruba hagala ani menara deʼ o linggisi.

¹⁰Hagala toönanga manga kuda hoko gënanga mangöe, hiädono madihihiri yadiai o kafo ihihaili ini kilolitino ngona. Mailingi maruruhu maduduono o kuda yatau-tauru o bilaono makereta deʼ o kereta ihipoparangi aha yahahara hagala ani bebeno o mehele maöraha önanga yatilakuru hagala o ngorana ma ago-agomo de yongohama o kota idadioka kamado doropaha gënanga.

¹¹O kudauku yobare-barene manga duduono gënanga aha ini parangi hagala nia ngekomoka deʼ yätoma nia nyawa de toönanga manga o oworo. Hagala nia tugu ihohailoa deʼ ikuata aha yaruba.

¹²Hagala nia haturu gënanga aha yaora hagala nia kaya deʼ niahö huku-hukunu. Onanga aha yakilianga hagala nia bebeno o mehele deʼ yaruba hagala nia tau mahohailoa. Onanga aha yal̄ë hagala mahelewo, hagala ma aoto deʼ matonaka, daha wohikaweli o ngöto magoronauku.

¹³ Ngohi aha tatogumu hagala nia nyanyi deʼ nia kecapi mamusik.

¹⁴Ta mal̄aika duga-duga moi o helewo madodoongoro dika, o nawoko yotago-tagoko toönanga manga jä mangongoëre mangï. O kota gënanga aha ihi gokookauaoli. Ngohi, o Jou Duru toko Kurutil̄e totemoka.”

¹⁵Ma Jou Duru woko Kurutil̄e wotemo o Tirus makotaika, ”O hohanino madaera manyawa aha yohawana yohaharoka nako yoihene nihihanga maböaka deʼ hagala o nyawa manga böaka magogiria yätoma.

¹⁶ Hamake nia wowango, o kokoano o hoana de o berera ma ago-agomino o ngöto madatekoka aha imaoko manga kuruhi maparetaoka, yaiki manga juba i momulia deʼ toönanga manga baju ihihihu, daha yogogeruku yohaharoka o tonakoka. Onanga aha duru yohawana hiädono yakunua yorïdi.

¹⁷Ipaha önanga aha ihi nyanyi o jere manyanyi nënanga nginika: Iwederoka o kota ihigö gogiriri! Hagala makapa yahehara o ngöto malago-agomoka. Manyawa mahira yakuaha o ngötoka yadiai hagala o nyawa o hohanino yohawana.

¹⁸O öraha nënanga, mawange ngona ini hohihanga, hagala o nühu manyawa yohaharoka. Yatodokana önanga mata-mata yamake nia binaha hakunua haetongo.”

¹⁹Ma Jou Duru woko Kurutil̄e wotemo, ”Tonï hidadi ngona duru kai rïdika hokä o kota koiwa manyawa. Ngohi aha toni tamunu ngona deʼ o akere o ngöto ma ago-agomo mabukuil̄e.

²⁰Daha ngona Tonihidingoto o nyawa yohone-honenge manga duniaika mangale imakodogo deʼ hagala o nyawa maöraha mahiraino. Toni mal̄aika ngona nogogere o nyawa yohone-honenge manga duniaoka gënanga, hagala magilianga ikokakali mahidö dogoronaka, kamamoi de o nyawa yohone-honenge. Done ani tonaka aha nogogerokauaoli, deʼ ngona aha ini hetongokaua o nyawa yowango-wango manga hidogoronaka.

²¹ Ngona toni hidadi o dulada hoböborohono, deʼ gënangala ani jarita mabobaha. Hagala o nyawa aha ini lingiri ngona, ma ngona aha inimakeua. Ngohi o Jou Duru toko Kurutil̄e totemoka.”