Read Tobelo O YEHEZKIEL 27 Bible Online

O YEHEZKIEL 27 - Tobelo bible

O YEHEZKIEL 27

¹Ma Jou Duru woko Kurutil̄e wohitemo ngohino, ”Hei o nyawa nokokakaliua, nohinyanyi o jere manyanyi nënanga mangale o Tirus, o hohanino makota imakubukunu deʼ hagala o gahi madatekino manyawa: Tirus, deʼ ani edenge ngona notemo, ’Ahi hailoa igoungu itö-totomo!ʼ

⁴Ngonaika o ngöto ma ago-agomo hokä o tau. Ngona ini higoko hokä o kapa mahohailoa.

⁵Ani bebeno o aras magota o Hermon mal̄oku ani liaro oliwewuru ma gota o Libanonino.

⁶Hagala ani harimi yadiai hagala o gota ma ago-agomo o Basanino. Ani aoto yadiai o liwewuru magota, ma ahali o Siprus manühino, maporomu yobooteke o gadingi deʼ maija-ijaoka.

⁷Ani hidete de ani leleanga o lenanino o Mesir, yododiai, deʼ yahihu irupa-irupa. Igoungu kohamangaluhu hagala ani tenda mapakakaha, o ngöere o Siprusino marupa ma ungu-ungu.

⁸Inihi oru-oru o Sidon de o Arwadino. Ani kapa manyawa mahirete yosawaro o ngötoka.

⁹O tau yododiai yokarajaanga o kapaoka ganga yogö gao-gao o Gebalino. O berera yogetongo de yaino hagala o kapa iboa Imau idadi o dodohanga imahukunu.

¹⁰Hagala o tentara o Persiaino, o Lidiaino de o Libiaino yowohama nia tentara. Onanga ihi lakete toönanga manga dadatoko deʼ manga sapeo o waja nia kota mabebeno o mehelika. Onanga ini riwoka yahohihanga hagala o haturu deʼ yodogo kainï heto-hetongo.

¹¹Hagala o tentara o Arwadino yogoana hagala nia bebeno o meheloka; hagala nia menara yogoana hagala o nyawa Gamadino. Toönanga manga dadatoko ihi lakete ihi rei-rei nia bebenoika. Onangala yodongodumu nia karamata.

¹²Ngona nahukumu hagala o baranga ani bubukunu mangoë duru deʼ maboloi gënanga o Spanyoloka, deʼ hokä mabobangu ngona natarima o haaka, o behi, o hori magare-garehe de o hori ma daro-daromo.

¹³Ngona noma hukunu o Yunanioka, o Tubaloka, deʼ o Mesekhoka, deʼ hokä mabobangu ngona natarima onangino o gogilaongo deʼ hagala o baranga o tabagaino.

¹⁴Ngona nohitagali ani bara-baranga deʼ o kuda ihi kokereta, o kuda yobare-barene deʼ o bagal o Bet-Togarmaino.

¹⁵O Rodus manyawa nimä kubukunu dede ngona deʼ o gahi mangigorino madaera manyawa yaija hagala o baranga ani bubukunu deʼ o gadingi deʼ o mologotu.

¹⁶Imahö huku-hukunu o Siria mabereraino yaija o baranga ani bubukunu deʼ hagala ani hasili iwö wöe-wöe gënanga. Onanga yafangu o gurasi deʼ o haaka o Zamrud mahelewoino, o ngöere madoka-dokara ma ungu-ungu, o ngöere ihihihu, o lenan ma aluhu, o helewo ma ija-ijaka o koral mahelewoino deʼ o helewo madoka-dokara o delima.

¹⁷O Yehuda deʼ o Israel ihitagali nia baranga nia huku-hukunu deʼ o gandum, deʼ o ohungu magula, o zaitun maminya deʼ o rampa-rampa.

¹⁸O Damaskus manyawa ima ija nia baranga nia huku-hukunu deʼ hagala nia hasili deʼ ihi fangu deʼ o angguru o Helbonino, o duba magogo o Saharino, o behi itü tutuku deʼ o rampa-rampa.

²⁰O Dedan manyawa yafangu nia bara-baranga deʼ o kuda maporetuku magogogere mangöere.

²¹O Arab manyawa deʼ o Kedar matonaka yakokuaha yaija nia bara-baranga deʼ o duba mangohaka, o duba manauru de o kabingi.

²²Mangale yaija nia bara-baranga imahö huku-hukunu o Syebaino de o Raema yoao hagala o gurasi de o haaka, o gurasi de o rampa-rampa duru maoa-oa.

²³Hagala o kota o Haran, o Kane, o Eden, ima huku-hukunu o Syebaino, o Asyur makota de o Kilmad, mata-mata ima hukunu deʼ deʼ ngona.

²⁴Onanga ini bukunu nginika o pakeanga mahohailoa, o ngöere madoka-dokara ma ungu-ungu, o ngöere ihihihu, hagala o tikara mahowono irupa-rupa, deʼ hagala rupa o dewili ikö kua-kuata.

²⁵ Nia baranga nia huku-hukunu yaao deʼ imakinïki o kapa ima huku-hukunu ma ago-agomo. Ngona hokä o kapa magina itotubuho, o kapa ya toa-toaka o ngöto ma ago-agomo.

²⁶Inihiö oru-oru iniao o ngöto yanönonuika. Ngona ini parono o wange mahiwara mahidal̄oko irama-rama.

²⁷Hagala nia gina nia baranga nia huku-hukunu, mata-mata yongö ngoti-ngotiri ikali nia kapa manyawa, mata-mata o tau yododiai de nia nyawa ima huku-hukunu, o tentara magetongo o kapaka gënanga, önanga mata-mata yohonenge yalutu maöraha ngona nowöro.

²⁸Yongö ngoti-ngotiri yopöaka karana yohawana manga böaka ihaluhu o ngöto madate-datekoka.

²⁹O öraha nënanga o kapa gënanga yamal̄a, mata-mata nia nyawa yongoti-ngotiri yodöa o dudungiha.

³⁰Onanga yogari nia wowango yotaiyana deʼ yododora deʼ manga hininga ihuha. Onanga yoderero o kuhuhunu manga häekoka deʼ imalulu o kafo magoronaka manonako yoduka.

³¹Mangale ngona önanga yatoongoro manga häeke, yapake o pakeanga o karongo iomanga o hininga maduka. Onanga yoari manga hininga i huha deʼ yödodora nia ngango.

³²Daha önanga yonyanyi moi o jere manyanyi, ’Tirus, o nagona inihitero? Tirus, o ngötoka ngona nomamouoka.

³³Maöraha o ngöto ma amo-amokika nodöaka deʼ magina madol̄a ioma-omanga, nohitotomo o hoana deʼ o berera ma ago-agomo manga paralu; o kokoano nahidadi yokaya.

³⁴O öraha nënanga ngona inilutuoka, nowedere o ngöto mabukuku. Ani nyawa yongodumu deʼ mata-mata ani gina ihihanga imakinïki deʼ deʼ ngona o ngöto mahi dogoronaka.’

³⁵Mata-mata o nyawa yogogogere o gahi madatekino yohahara yoihene okia idadi ngonaika. Toönanga manga kokoano duru komanga hawana; yoborohono yamake toönanga manga bio-bionoka.

³⁶Ngona nohihanga mangale kahi ado-adonika. Imahö huku-hukunu o dunia ya mode-modekika idadi yo hahara karana yo hawana aha yadaene okia idadadi hokä hoko gënanga.”