Read Tobelo O YEHEZKIEL 28 Bible Online

O YEHEZKIEL 28 - Tobelo bible

O YEHEZKIEL 28

¹Ma Jou wohitemo ngohino,

²”Hei o nyawa nokokakaliua, nohiädono o Tirus manga koanoika, okia Ngohi o Jou Duru toko Kurutil̄e totemo unangika, ’De ani ëdenge ngona napülono ani diri o gikiri mapareta makuruhi o ngöto mahidö dogoronaka. Kaiyakunu dika ngona noma ëdenge hokä o gikiri, mä nohininga, ngona duga-duga o nyawa biaha.

³Ngona natobote iholoi nosawaro ngaro deʼ o Danel, hiädono koiwa o rahasia i iu-iunu mangale ngona.

⁴Napake o barija deʼ o mangarati mangale notoomu o arata, o gurasi deʼ haaka.

⁵Igoungu, ngona nosawaro noma hukunu deʼ o öraha nënanga duru nokayaka, de ani kaya gënanga inidiai ngona noëdenge!ʼ ”

⁶Ma Jou Duru woko Kurutil̄e wotemo, ”Hei Tirus, karana ngona napulono ani diri imatero hokä ma Jou Madutu,

⁷ngohi aha tahidingoto o tentara maparetino duru manga dora koö iwa-iwa mangale ini parangi ngona. Onanga aha yawedere hagala nomahö hil̄e-hil̄e namo make-makeoka o barakati o barija deʼ o mangarati.

⁸Ngona aha initoma deʼ inijere o ngöto magoronauku.

⁹Aa, nako iboa maöraha gënanga, kai yakunohi ngona notemo ngona ma Jou Madutu? Initö toma-toma manga himangoka, inyata ngona duga-duga kao nyawa dika.

¹⁰Ngona aha nohonenge hokä o nyawa o kia-kiaua yadaene karana initoma o nyawa maporetino iwinö nako-nakoua ma Jou Madutu. Ngohi, o Jou Duru toko Kurutil̄e totemoka.”

¹¹Ma Jou wohi temoli ngohino, wato,

¹²”Hei o nyawa nokokakaliua, nidodora mangale o Tirus manga koano. Nohiädono okia Ngohi, o Jou Duru toko Kurutil̄e totemo unangika, ’Ngona mamoi iböto nodadi itö totomo manonako; mahira ngona igoungu nobarija deʼ nohailoa!

¹³Ani gogere mangï o Edenoka, ma Jou Madutu Ai dumule. Ani pakeanga imahiporomu o helewo dema ija-ijaka irupa-rupa: o delima mahelewo, deʼ o itanga, o topas, o pirus mahelewo, o yakut mahelewo, o ratna, o sapaka, o nilam mahelewo, o zamrud deʼ o alkali madoka-dokara mahelewo. Ani poromu o gurasiö, mangöe. O bara-baranga gënanga yadiai mangale ngona mawange ngona inidiai.

¹⁴O malaikat hoboborohono Tohi gogere genangoka mangale i nï goana ngona. Ngona nogogere Ahi l̄oku itebi-tebini mal̄okuoka deʼ notagi o helewo demaija-ijaka maloleletongo mahi dogoronaka.

¹⁵Ani kalakuanga itotomo maöraha ngona ini hidadi hiädono ngona mulaenge nodiai o dorou.

¹⁶Ngona norïdukua noma hukunu deʼ nomä ija, deʼ gënanga ngona iniao nomatogowini deʼ o baradohaika. Done Toniduhu ngona Ahi l̄oku iTebi-tebinoka, deʼ o malaikati ini goa-goana iniduhu ngona o helewo dema ijaka maloleletongo gënanga mahidodogoronaka.

¹⁷Ani rupa mahohailoa inidiai ngona noedenge deʼ kaini heto-hetongo idadi hababu ngona nodiai ibodo. Hababu gënanga ngona Tonihipaka o tonakuku deʼ Todiai o hohininga mangale o kokoano mahomoa.’ ”

¹⁸Ma Jou wotemo, ”Hei Tirus, ngona napëseke ani puji mangï-mangï karana hagala ani howono deʼ ani hininga irikotua maöraha noma hukunu de nomä ija. Hababu gënanga Toni tuhuku ngona hiädono idadi kai rataika de o tonaka. Mata-mata o nyawa ini pulono ngona duga-duga yamake o kafo.

¹⁹Ngona nohihangoka mangale kahi ado-adonika. Mata-mata o hoano deʼ o berera ininönako-nako ngona idadi yohahara karana yo hawana aha ya mao manga wo wango hokä hoko gënanga.”

²⁰ Ma Jou wohitemo ngohino,

²¹”Hei o nyawa nokokakaliua, nohilolai o Sidon makota.

²²Nohiädono manyawaika Ngohi o Jou Duru toko Kurutil̄e totemo onangika, ’Ngohi nënanga ani haturu, hei Sidon. Hagala o nyawa aha ihi higiriri karana Ahi manarama ngonaika. Maöraha Ngohi tahukumu ani nyawa, önanga aha ihi öriki Ngohila o Jou totö tebi-tebini.

²³Ngohi aha todotagao o panyake o bobaku, deʼ Tamal̄aika o awunu ihahuru hagala ani ngekomoka. Ngona aha ini parangi o haturu hagala okiaino honanga, deʼ ani nyawa aha yätoma. Done ngona nohi öriki Ngohi o Jou.’ ”

²⁴Ma Jou wotemo, ”Hagala o berera nimakokadateke mamoi iböto yahikokauku o Israel, koiwakaoli marupa o momo i ruba-ruba deʼ ihohihika yadiai o hiri o Israeloka. Onanga aha yamao Ngohila o Jou Duru toko Kurutil̄e.”

²⁵Ma Jou Duru woko Kurutil̄e wotemo, ”Ngohi aha tatoomu o Israeloka manyawa hagala o berera magogurutokaino toönanga mangï Tahi kokabarihoka, deʼ mata-mata o hoana deʼ o berera aha ihi öriki Ngohi totebini. O Israeloka manyawa aha yogogeroli toönanga manga tonakoka mahirete, o tonaka Tihidö döa-döakoka Ahi gilaongika o Yakub.

²⁶Onanga aha yowango deʼ maruae koiwa genangoka deʼ ihigoko hagala o tau ikali yodiai o angguru madumule-dumule. Ngohi aha tahukumu mata-mata önanga ima kokadateke yahikokaukuoka önanga, hiädono o Israeloka yodadi maruae koiwa. Done önanga ihi öriki Ngohila o Jou toönanga manga Jou Madutu.”